Kolasib District-a NH. 306 leh 06 thawmthat mek dinhmun thlirhona hun hman a ni

Kolasib District chhunga National Highway 306 leh 06 thawmthat hna thawh mekah PWD chan chinah zaa 55 leh NHIDCL chan chinah zaa 45 velah hmalakna hmuh a ni tawh.

Nimin khan Kolasib DC Robert C. Lalhmangaiha hovin National Highway 306 leh 06 thawmthat hnathawh kal mekah Monitoring Committee Review Meeting neih a ni a, Kolasib District chhunga National Highway 306 leh 06 kawng chhia avanga Kolasib District Truck Owners Association leh JAC Co-Ordination Committee ten August 22-a National Highway Road Block an neih hnua inremna leh hna chak zawk a thawk tura intiamkamna lehkha August ni 23, 2024 a an ziah ah, an hun intiamkam chhung a zawh tawh avanga an hmalakna thlirletna hun hi hman a ni a. He hunah hian JAC te chuan kawng siam that kal mek an vilna atanga an hmuh dan leh rawtna te an tarlang a, MPWD leh NHIDCL ten an hmalak tawhna report an pe bawk a ni.

KDTOA leh JAC Co-ordination Committee te hian an report a an tarlan danin kawng chu an intiamkamna anga chhutin Mizoram PWD NH Division-III chan ah hmalakna 55% vel leh NHIDCL chanah hmalakna 45% vel hmu ah in ngaiin theihtawp a tan an lak zual zel a ngai tih an sawi a. Hemi chungchangah ah hian NHIDCL-a Manager (P) Saksham Tyagi chuan NHIDCL hnathawh dan tlangpui sawilangin, NHIDCL chuan Development Work, Fourlane ah a insawrbing a, Maintenance atan hian Fund a tlem hle a, chuvang chuan hna thawh a harsat thu a sawi a. An harsatna liantham a tarlan zingah Quarry neitute hnathawhna avanga kawng leh Side Drain a an Stone Dust leh lei nawi tla nasa lutuk chuan hnathawh a tih harsat bakah tui nasa takin a tling thin a, chu chuan hmasawnna a timuang hle a ni, a ti a. Black Topping na tur Tender pawh tunah hian chhang tan an awm nual tawh a, November thla atangin Black topping pawh hmun thenkhat laiah kalpui tan theih a ni tawh ang tih a sawi a ni.

Thutkhawm kaihruaitu Kolasib DC Robert C. Lalhmangaiha chuan tunhnaiah kawng chhia avangin mi tamtak in harsatna an tawk tih sawiin, lirthei lian duh anga a tlan theih loh avangin Mizoram-ah tuialhthei leh ei leh bar ah harsatna a thleng mek a, he harsatna sukiang tura theihtawp chhuahtu KDTOA leh JAC Co-ordination Committee te chungah lawmthu a sawi a. Tun dinhmunah harsatna hrang hrang avangin kawng chu duhthusam la ni lo mahse hmasawnna a awm chho zel a a hriat thu sawiin, theihtawp a tan la lehzual turin NHIDCL leh PWD hotute a chah bawk.