Congress in buhfai enfiah turin CM Office-ah an pe

Congress Thalaite chuan nimin khan Zuangtui Godown-a buhfai dahna In pathum endikin heng buhfaite hi Grade ‘A’ leh Grade ‘C’ tihchian a ni lo niin an sawi a, mipui hnena buhfai tha lo pek chu enfiah turin Chief Minister Office-ah an pe bawk.

MPYCC President Laltawnliana chuan Ration Buhfai chhia ei ngaihna an hre lo tih sawiin, “Vawk pul hri avangin vawk chaw atana hman theih a ni lova, leitha atan te an hmang mai mai a. Hetihlai hian ZPM sawrkar chuan ration buhfai kg 1-ah Rs. 30 (100%) in October thla atanga a tihsan tur chu Mizoram mipui an lungngai takzet a, kan sawrkar hrawn mek hian miretheite lû chunga vaivut takngial pawh an ît a, pachhiate an rûksak mek a ni,” a ti. 

Hemi chungchanga Mizoram Pradesh Youth Congress Committee (MPYCC) thuchhuah in a tarlan danin Central sawrkar atanga Buhfai a thlawna kan dawn bak hi a Supply tu tur Mizoram sawrkar chuan Tender chhuahin a thlang thin tih an tarlang a, Mizoram hian thla 1-ah Buhfai quintal 59,478 a thlawnin sawrkar laipui atangin kan dawn thin thu leh hemi baka kan mamawh nia Supply Minister-in a sawi chu Quintal 37,522 a ni tih an sawi a. ZPM sawrkarah Buhfai supply hna chhangtu pariat awmin, RL Store, Kulikawn Aizawl chuan chhang hniam berin, Buhfai Quintal 1-ah Rs. 3,400.50 in an supply thei a. Buhfai supply tur thlanna (Limited Tender) ah a chhang hniam ber pek ni lovin an duhsak zawng te hnenah Rs. 3,550/- in supply tir an nih thu leh a supply tu turte hian midang supply tir lehchhawn nia hriat a nih thu an sawi a, hetah hian thil dik lo tam tak a awm nia an hriat thu leh mipui hnena thil nihna dik tak puang tura sawrkar an phut thu an sawi a. Hetianga uchuak taka induhsakna hleihluak tak avang hian kum khatah Mizoramin Rs. 67,314,468 a chawi thlawn dawn nia sawiin, “Mi tlemte hlawkna Mizoram mipuiin an tuar chho zel tur hi Congress thalai chuan vanduai thlak a ti takzet a ni,” an ti bawk.