Kumin ah Library tan Lehkhabu 118 lei dawn

Mizoram State Library chuan kumtin-a lehkhabu a lei thin ah kum kal mek 2023-24 atan lehkhabu 118 lei an tum a, hei hi tihfel a ni tawh.

Mizoram State Library hian India sawrkar hnuaia Raja Rammohun Roy Library Foundation (RRRLF) atangin pawisa an dawng a, hei hi lehkhabu lei nan an hmang thin a, heng an lehkhabu lei te hi Library hrang hrangah an sem darh leh a, hei hi lehkhabu thehdarhna tha tak niin State Library hnuaiah hian Recognised Library 511 a awm mek a, heng Library te hnenah hian an lehkhabu lei te hi an semchhuak thin a ni. State Library enkawltute chuan RRRLF hian kum khat chhunga an sum hmuh tur zat hi an hrilh tih sawiin, chuta tanga 10% chu State sawrkarin a lo tum ve tur a ni a, Lehkhabu lei nan an hmang thin tih an sawi a. An sum hmuh zat azirin an lehkhabu lei theih zat pawh kumtin a inang lo thei tih an sawi bawk.

Sawrkar kum kal mek 2023-24 hian lehkhabu hrang hrang 118 chu State Library hian an lei dawn a, lehkhabu man azirin lehkhabu pakhat an lei zat (a copy zat) hi a inang lo a. Kuminah hian an ngaihtuah laiin Library 513 an nei a, lehkhabu an lei tur zingah bu 513 a awm a. Tunhnaiah Library pahnih chu Recognised an nihna a tawp a, Library 511-ah lehkhabu hi sem a ni anga. Kum hmasa 2022-23 khan lehkhabu 152 leiin hemi kum hian RRRLF lamin pawisa an pek tak mai loh avangin Lehkhabu man hi State Library hian an pe thei lawk lo a. Kum 2019-20 khan Lehkhabu 147 leiin kum 2020-21 khan lehkhabu 154 leh kum 2021-22 khan lehkhabu 145 an lei bawk a ni.

Mizoram State Library hnuaia recognised Library-ah hian a tam ber chu YMA enkawl a ni a, RRRLF hian a theih ang angin an enkawl thin a. State Library enkawltute chuan Library thenkhat chu lehkhabu leh vantlang bungrua te inawm pawlh nuaina te a ni tih sawiin, Ccommittee Room atana hmang te an awm bawk a, heng hian RRRLF lam Mit a tlung lo thin tih an sawi bawk.