CMS-a Bharat Scouts & Guides ten Camp an nei

Chawngbuangi Memorial School, Serchhip-a Bharat Scouts & Guides te chuan niminpiah atang khan zan khat awh Camp Programme hmangin nimin khan Bawrhsap Paul L. Khuma chuan a hmanpui a ni.

CMS Picnic Spot, Serchhip-a CMS Bharat Scouts & Guides ten he hun an hman ah hian niminpiah chawhnu lam khan tuihleuh zirin zan lamah Camp Fire Programme an hmang leh a, nimin zing-ah Hiking neiin hemi hnu hian Tui hleuh zirin hrui suih dan chi hrang hrangte an zirho leh bawk a ni.

Hemi hnu hian Special Programme hmang zuiin he hun hi Bawrhsap leh Serchhip District Bharat Scouts and Guides President Paul L. Khuma chuan a hmanpui a, Scouts and Guides Movement chu a din tirh atanga Vawiin thlengin ram leh khawtlang tana mi puitling chherchhuaktu a ni a, he movement hi khawvela NGO hrang hrang zingah a lian ber leh darh zau ber te zinga mi a ni a, chutiang pawl ropuia an tel thei chu an vanneihzia inhre turin Scouts and Guides te a chah a ni.

Bawrhsap chuan Scouts and Guides Motto chu ‘Inring renga awm’ (Be prepared) tih a nih angin eng pawh hmachhawn thei turin taksa, rilru leh thlaraua kan inbuatsaih reng a ngai tih a sawi a. Scouts and Guides chuan mahni mihringpui te rawngbawlsak te, mi dangte thiana siam te, tanpui ngaite tanpui te, mi dik leh rinawm ni turte in naupangte a buatsaih a; Vawiin a Scouts leh Guides ni mek te chu an puitlin thlenga an pawl thil tum leh inkaihhruaina te vawng a, nunpui a, khawtlang leh ram tana malsawmna nih tum theuh turin a fuih a ni. 

Nimin-a he hun hman hi Serchhip District Bharat Scouts and Guides Secretary CVL. Hruaia pawhin hmanpuiin thu a sawi a, Bharat Scouts & Guides-a District Deputy Commissioner leh DIPRO Lalnunmawii pawhin he hun hi a hmanpui bawk a ni.