KVK Mizoram in lawmman pahnihna dawng

India hmarchhak-a Krishi Vigyan Kendras (KVK) te tana Annual Zonal Workshop neih chu Inrinni khan zawhfel niin Mizoram atanga kal KVK te chuan Workshop denchhena Exhibition buatsaih ah lawmman pahnihna an dawng a ni.

ICAR- Agricultural Technology Application Research Institute (ATARI) Zone VII, Umiam (Meghalaya) leh College of Fisheries Lembucherra (Tripura) tangdun buatsaih Mizoram, Meghalaya, Manipur, Nagaland leh Tripura-a Krishi Vigyan Kendras (KVK) hrang hrang 43 te tana Annual Zonal Workshop hi tun thla ni 19-21 chhung khan Tripura-a Lembucherra-ah neih a ni a, he Workshop-ah hian kuthnathawktute thiamna leh mamawh pek kawnga tangkai zawka KVK-in hma a lak theih dan tur sawiho a nih bakah ei leh bar-a hmarchhak State a intodelh theihna kawnga tan lak a tul thu leh a bikin dil/ lui sangha khawi leh sawngbawl lama eizawnna ngelnghet siam a tul zia te sawiho a ni.

He Workshop denchhen hian hmarchhak State hrang hranga KVK te chuan an hmalakna phochhuakin Exhibition an nei nghal a, he Exhibition-ah hian Mizoram chuan lawmman pahnihna dawngin Mizoram atanga kal zingah hian KVK Serchhip District North Vanlaiphai-a Senior Scientist & Head, Dr. T. Vanlalngurzauva chu a tel a ni. He Workshop-ah hian ‘Best KVK of Zone-VII’ thlanna neih nghal niin KVK Sepahijala, Tripura chu thlan an ni.