Ranvulh chhiarpui nei dawn

Kumin hian India rampumah ranvulh chhiarpui neih a ni leh dawn a, hemi atan hian AH&Vety Department pawh a inbuatsaih mek a ni.

India rama Livestock Census hi kum 1919 atang khan neih tan niin, kum 5 dan zela neih thin a ni a. Mizoram-ah chuan kum 1972 atanga neih tan niin, National Level-a Livestock Census vawi 9-na neih kum a ni a. Kumin hian 21st Livestock Census neih tur niin September thla chhungin training zawh vek tur a ni a, October atangin Census neih tan tum a ni.

Livestock Census-ah hian ran chi (species) hrang hrang – Bawng, Lawi, Vawk, Kel, Beram, Sakawr, Ui, Sai, Sazupui, Ar, Varak leh Arva chi dang vulhte chhiar vek tur a ni a. Enumerator-te In tin leh Office, dawr leh ranvulhna hmun zawng zawngah kalchhuakin ranvulh hi chhiar vek tur a ni a. Census hi India sawrkar Programme niin, Census hnuhnung bera a titha pathum (3) zingah Mizoram chu a tel pha a. Kumin atangin data rintlak leh dik neih theihna turin Livestock Census Data hi mobile app hmangin lakkhawm tura duan a ni.

Mizoram-a Livestock Census neih tur atan hian tun thla ni 19 leh 20 khan Mizoram District pasarih (7) – Mamit, Kolasib, Aizawl, Cham-phai, Khawzawl, Saitual leh Serchhip-a Enumerator-te tan Livestock Census 2024 training hi neih a lo ni tawh a, District dang 4 – Lunglei, Hnahthial, Lawngtlai leh Siaha District te tan nimin leh niminpiah khan Lunglei-ah neih a ni bawk.

Ranvulh hian India ram economy-ah pawimawhna tak neiin, a thawhhlawk em em a. Chhungkaw sang tam takin eizawn nan hmangin chaw tha kan neih theihna bulpui a ni a. Hei vang hian India sawrkar chuan Livestock Sector lama hmasawnna tur Scheme hrang hrang duangin a kalpui mek a, chutiang Scheme leh Programme tihhlawhtlinna atana ruahmanna siamna’n Census Data hi hman thin a ni.