Aizawl-ah ni 2 awh Commonwealth Parliamentary Association Annual Conference neih a ni dawn

Tunkar Zirtawpni leh Inrinni, September 27 leh 28, 2024 chhung khian 21st Annual Conference of Commonwealth Parliamentary Association, India Region, Zone-III chu Aizawl-ah neih a ni dawn.

Ruahman lawk ang chuan he Annual Conference hmang turte chu Sept. 26-ah Aizawl rawn thleng tura beisei niin hemi ni tlai hian Executive Committee Meeting an nei nghal anga. A tuk September ni 27 (Ningani) chawhma ah Lok Sabha Speaker Om Birla chuan MLA Library-a Archive Cell thar a hawng ang a, CPA Annual Conference neih zui a ni ang. He hunah hian Mizoram Speaker Lalbiakzama'n palai lawmna thu a sawi zawhah Nagaland Speaker leh CPA Zone-III Chairman ni bawk Sharingain Longkumer-in keynote address a sawi ang a; Mizoram Chief Minister Lalduhoma, Rajya Sabha Dy. Chairman Harivansh Nayaran Singh leh Lok Sabha Speaker Om Birla ten thu an sawi zui dawn a ni. A ni khatnaa Plenary Session-ah an ngaihtuah leh sawiho tur thupui chu 'Inclusion of the Northeast Region in the Indian-ASEAN Vision for Trade and Cooperation' a ni ang.

CPA Annual Conference-ah hian a ni hnihna ah 'Merging the Ministry of DONER with NEC for better strategic planning and coordination of various projects in the region' tih thupui chu sawiho a ni dawn a. Mizoram Parliamentary Affairs Minister Vanlalhlana'n lawmthu sawina hun hmangin Conference hun a khar ang. Conference neih chhung hian palaite tan Cultural Programme leh zanriah kilhona buatsaih a ni thin bawk ang.