Ruang phurhna rate-ah STA in hma la mek

September, 2024 atanga Mizoram sawrkarin ruang phurhna rate a bituk chu ruang phurtu Ambulance-ten an pawm theih loh avangin sawrkar rate thar siam hi hman theih a la ni lo a. Ruang phurhna rate thar siam tur hian State Transport Authority (STA) chuan hma an la mek.

ZALEN-in Social Welfare Department thawktute hnen atanga thu a dawn danin ruang phurhna rate hi anmahni bithliah mai theih a nih loh avangin rate bithliah turin STA-ah an thlen niin an sawi a. STA hian hun remchang hmasa berah ngaihtuah an tum nia thudawn a ni a. STA thawktute chuan ambulance chu ruang phurhna tur ni lovin damlo phurhna tur a nih avangin a hranpaa rate bithliah a ni ngai lo tih an sawi a, ruang phurhna atan an hman tho si avangin an hrethiam mai chauh niin an sawi thung a. Ruang phurhna atan hian MST-ah chiah rate bithliah an nei tih sawi bawkin a bak hi chu inremsiamna angin an phur mai thin niin an sawi a. Mahse, sawrkar senso-a ruang phurh a nih dawn takah chuan a rang lama rate hi an bithliah a ngai dawn niin an sawi bawk.

Social Welfare, Tribal Affairs, Women & Child Development Department-in ruang phurhna atana ruahmanna rate a siam dan chuan lirthei nuai 7 hnuailam chu km khat-ah Rs. 25; nuai 7 atanga nuai 12 inkarah km khat-ah Rs. 30 leh nuai 12 atanga 17 inkarah km khat-ah Rs. 35 te a ni a. Lirthei nuai 17 chuang man chu man chawia ruang phurhna atan STA chuan hman a remti lo a. Hetih lai hian ruang phurhna atana hman ambulance hi km khatah Rs. 80 (up down)-in an tlan mek a ni.

Mizoram Private Ambulance Association (MPAA) President CVL. Ngheta chuan sawrkar rate siam ang chuan an tan tlan ngaihna a awm lo tih sawiin, anmahni rate siam km khata Rs. 40 (a let lehna nen Rs. 80)-in an la tlan zel niin a sawi a. MPAA-ah hian member 13 an awm mek a, an vai hian Aizawl khawpuia khawsa vek an ni.