Supply Minister in Rel kawng chhia a hmunah a tlawh

Kumin August 28-a Tlawng lui lian in Assam State huamchhung, Hailakandi District a Killarbak khaw bula Rel kawng a tihchhiat chu nimin khan Supply Minister B. Lalchhanzova chuan a hmunah tlawhin he Rel kawng siamthat hna hi Indian Railway lam chuan an thawk mek a ni.

Nimin-a helai hmun a tlawhna ah hian Supply Minister hi Indian Railway-a Deputy CE Sankalp Aggarwal chuan lo dawngsawngin, Jamira Railway Station bul mai a tuilianin Rel kawng a tihchhiat chu siamtha turin theih tawp chhuahin chhun zan zawma an thawh thu a sawi a, Minister hi a hmun tlawhpuiin, Railway hotute leh hna thawktuten October thla chhungin an hna zawh hman an tum thu Minister hi an hrilh a ni.

Supply Minister B. Lalchhanzova chuan tuilianin Reil kawng a tihchhiat dan te a en hnuah siamthat an tum dan plan te a thlir a. Chawl lova hna an thawk chu fakawm a tih thu a sawi a. Rel kawng chhia chu Mizoram bakah Churra-chanpur lam buhfai supply luhna hnuk pawimawh tak anih angin siamthat thuai anih theih nan tan la lehzual turin a chah a. Supply Minsiter chuan Mizoram Chief Minister Lalduhoma pawhin September ni 3 khan Railway Minister Ashwini Vaishnaw hnenah Jamira Station bula Rel kawng chhia hi siamtha thuai tura alo ngen tawh thu a sawi a. A hmun atang hian PR Kumar, DRM/Lumding pawh phone a be pawp nghalin Rel kawng chhia chu siamthat thuai anih theih nan tan la sauh sauh turin a chah a ni.

Supply Minister B. Lalchhanzova hian Gharmurra hmuna Synod Mission Compound pawh tlawh nghalin thawktute nen an inkawm a. Tawngtaina hun te hmangin a tul apianga an hman atan Presbyterian Mission School Headmaster HC Laldinmawia kutah Rs. 10,000/- a hlan bawk.