AMC Building Regulations siamthatna tur pawm

Nimin-a Aizawl Municipal Corporation (AMC) Board of Corporators thukhawm chuan AMC Building Regulations siamthat rawtna an pawm.

Nimin-a AMC Board of Corporators thukhawm hian In sak khuahkhirh dan, AMC Building Regulations huamchhunga Factory leh Commercial Center ten an ram neih ang an hman tangkai lehzualna tur rawtna an pawm a. Aizawl Mayor Lalrinenga Sailo kaihhruai a thutkhawm ah hian AMC Building Regulations 2012 siamtha tura rawtna lut sawihona a nih hnu ah lungrual taka pawm a ni a, Building Regulation Amendment hi Standalone Factory leh Flatted Factory te bakah Commercial Center chhunga building ten an ram neih ang te hmang tangkai lehzual tura Building Regulation siamthat rawtna a ni a, State sawrkarah pawmpui tura thehluh leh tur a ni. Hei bakah hian ‘Aizawl khawpui chhunga Restaurant, Hotel leh Hostel te hi AMC Licensing Regulations hnuaia awma establishment neiin register an nih angin an inenkawlna thianghlim leh that dan endik sak ni rawh se,’ tih chu sawihoin lungrual takin pawm a ni bawk.

Nimin-a AMC Board of Corporators thutkhawm ah hian AMC Corporator atana Ward No. XIX atanga thlan Dr. C. Malsawmtluangi leh Ward No. VI atanga thlan H. Lalremtluanga te pawh an tel ve nghal a ni.