Lenkawl

Green Mizoram Day 2024 chu June 11, 2024 khian Serchhip District-ah pawh hman a ni leh dawn a, he hunah hian kumin Thal laia kangmei venna kawnga hma la tha khua te hnenah chawimawina hlan leh tur a ni ang.

Tunhnaia ruahsur ah khan Serchhip P&E Veng leh IOC Veng inkar kawngpui, Serchhip Addl. SP Quarters bul-a leimin ah kawngchhuat thlanglam chu a bal a, hei vang hian Serchhip Addl. SP chuan mipuite kan lo him tlan zawk nan MV Act 1988 (Act of 1988) Section 115-na leh Mizoram sawrkar in thuneihna a pek angin he kawng-ah hian Two Wheeler/Auto Rickshaw/ LMV chin bak kaltlang phal a ni lo tih thupek a siam a. Hei bakah hian kawng a bal zel loh nan Maxi Cab leh Pick-up bungrua/passenger phur tan pawh kaltlang phal a ni lo tih a tarlang bawk. 

Serchhip District chhungah June ni 15, 2024 atanga August ni 31, 2024 chhung atan lei laih leh leivung hmanga kawr hnawh chungchang ah khapna thupek tihchhuah a ni. Hemi chungchang ah hian Serchhip District Magistrate David Lalthantluanga chuan thupek tichhuakin Mizoram-ah Furpui laia lei laih avangin chhiatna leh nunna chan phahna thleng palh thei a nih avangin Serchhip District chhungah lei laih phal loh hun chhung siam tula hriat a nih thu leh Section 144 of Cr.PC 1973 tlawhchhanin mipui him tlanna turin Serchhip District chhungah June ni 15, 2024 atanga August ni 31, 2024 chhungin mimal tan Insakna emaw, thil tul dang atana lei laih leh leivung hmanga ruam/kawr chhunkhah khap a nih thu a tarlang a. He thupek bawchhiate chu dan angin an chungah hremna lek a ni ang. He thupek hian NH-54 Widening & Construction hnathawk te, Sawrkar hmalakna hnathawh te leh Deputy Commissioner, Serchhip atanga phalna nei te a huam dawn lo thung a ni.

PHE Department chuan Serchhip mipuite chu ruahtui khawl uar lehzual turin an ngen.

Vawin May 31, 2024 hi ‘World No Tobacco Day’ a ni a, he ni hi Kumtin in khawvel pumah thupui neiin zuk leh hmuam, vaihlo that loh zia inzirtirna ni atan a hman thin a ni. World Health Organization (WHO) chuan World No Tobacco Day 2024 thupui atan, ‘Protecting Children from Tobacco Industry Interference’ tih a rawn thlang a. A Mizo tawng chuan ‘Vaihhlo siamchhuaktu te lak a naupang te venhim’ tih te pawh in a dah theih awm e. Vaihlo zuk leh hmuam that loh zia hre thar tura thangtharte zingah zirtirna uar lehzual a pe turin hma kan lak a pawimawh em em a ni. 

Cyclone Remal si perin a ken tel ruahsur nasa vanga leiminin chenna In a hnawl vanga nunna chante zinga ruang pakhat chu nimin khan hmuh leh a ni a, nimin-a ruang hmuh hi Hlimen-a chhiatna thlenga nunna chan hnamdang pakhat niin Hlimen-a chhiatna thlenga nunna chan nia hriat te ruang chu hmuh kim a ni ta a ni. Heti hian nimin tlai thleng khan Melthum a chhiatna thlengah ruang 15 hmuh ni tawhin mi 4 chin hriat loh an la awm a, Hlimen-ah ruang 6 hmuh niin Salem-ah ruang 3, Falkawn-ah ruang 2 leh Kelsih leh Lungsei-ah ruang pakhat ve ve hmuh a ni tawh a. Melthum-ah mi 4 leh Aibawk-ah mi pahnih chin hriat loh in an la awm a ni.

Tunhnaia thli tleh leh ruahsur avanga Zoram Medical College (ZMC) in ni thum chhung vel harsatna an tawh chu sutkian tan a ni ta a, nimin atang khan thawktute pawh an inthlak tan ve leh thei tawh a ni. ZMC leh a velah hian hmun 30 vel zet leimin a awm a, Power Supply a chhiat bakah tui pipe tam tak leimin in a tihchhiat avangin damdawi In leh Quarters zawng zawng kaltlang theih loh in a awm hman a ni.

Nimin zing-a Thli leh ruah thawkin Kolasib Tuitha Veng-a Lalrema te chenna In chu a chung a tichhia a, nimin vek khan Kolasib Tuitha Veng YMA leh Village Council-te hmalakna in In chhia senghawi leh thawmthat hnatlang neih nghal niin In neitute hian an Inchung tur Rangva leh thil tul dangte in ngaihtuahin, sawrkar tibuai lova inbuaipui an tum a, hnatlang hian an In hi luah theih turin an siam sak leh nghal a ni.

Lai Autonomous District Council (LADC)-a Chief Executive Member C. Lalmuanthanga'n Executive Member atana a rawt mi pakua (9) te chu Mizoram Governor-in May 27, 2024-a a pawmpui hnuah nimin khan Executive Member atan lakluh an ni a. Executive Member lakluhna hun LADC Hall, Lawngtlai-a neih ah Lawngtlai District Bawrhsap Cheemala Siva Gopal Reddy chuan heng Executive Member thar te hi rinawmna thu tiam tirin a lalut a ni.

State Apex Committee (SAC) chu nimin khan an Chairman leh Chief Secretary Dr. Renu Sharma IAS hovin Inter-Operable Criminal Justice System (ICJS) chungchang ngaihtuahin Chief Secretary Conference Hall-ah an thukhawm a, he thutkhawm ah hian State Action Plan for Inter-Operable Criminal Justice System (ICJS) 2.0 tana ruahmanna hrang hrang te chu thlirho niin a tul ang te siamrem a nih hnuin State Action Plan for ICJS 2.0 chu pawm a ni. Inter-Operable Criminal Justice System hi Cabinet Committee on Economic Affairs (CCEA) in November 2015 khan a pawmpui niin a thil tum ber chu heng ICJS hnuaia banpui hrang hrang - Police, Prisons, Prosecution leh Forensics te inkara data leh information awlsam leh felfai zawk pek-chhuah a nih theih nana Cloud service hmanga platform khat hman theih tura duan a ni.

Mizoram Police te chuan Inrinni kalta khan Aizawl leh Agartala (Tripura) inkara tlan Maxi Cab pakhat atangin nungcha chi hrang hrang dan lova phurh an man.

Vawk hri leng African Swine Fever (ASF) avangin Mizoram-ah thu leh awm hma chuan Vawk, Vawksa leh Vawksa atanga siam thil eng pawh ramchhunga State dang leh ramdang atanga lakluh khap a ni.

Aizawl Municipal Corporation (AMC) leh National Institutes of Technology, Mizoram hotute chuan nimin khan Municipal Commissioner Er. Lalhriatpuia kaihhruaiin Aizawl khawpui bawlhhlawh sawngbawl dan felfai zawk duang tura thawhho dan tur an sawiho a. Khawpui bawlhhlawh nihphung zirchianna neih dan tur te, mipui inzirtirna kalpui zel dan tur te, felfai zawka bawlhhlawh khawnkhawm a sawngbawl dan tur Plan siam kawnga thawhho dan turte sawiho a ni a. Bawlhhlawh paih mumal zawka thliarhran dan tur leh sawngbawl chungchanga hmasawnna a awm theih nan Local Council te nena tun dinhmun aia tha zawka kal dan turte, bawlhhlawh atanga mipui mamawh siamchhuah dan tur te leh thawhho dan turte pawh sawiho a ni bawk.

Mizoram-a Cyclone Remal avanga chhiatna thleng chungchang sawihona chu nimin khan Chief Secretary Dr. Renu Sharma hovin Chief Secretary Conference Room-ah neih a ni.

Chief Minister Lalduhoma chuan HIV/AIDS vei te tan ART lak chu enkawl nana thil tha ber anih avangin natna tuar mek ten pan hram se an duh thu a sawi.

Mizoram-a Political party panga (5) te chuan Lok Sabha Inthlanpui a Duty Mizoram Police 1047 te Vote thlak thei lova siam an nih chungchang ah an lungawi loh thu nimin khan Prime Minister leh Chief Election Commissioner te hnenah ziakin an thlen a, vote an thlak ngei theihna tura hma la turin an ngen bawk.

Lok Sabha Inthlanpuia Serchhip District-a Vote tla te chhiar turin inbuatsaihna kalpui mek zel a ni a, nimin khan Vote chhiar tura ruat te tan Training hmasa neih a ni.

Tunhnaia thli leh ruah thawk in Serchhip District chhunga chhiatna chi hrang hrang a thlen chungchangah Serchhip Bawrhsap David Lalthantluanga chuan nimin khan District thuneitute leh PHE, PWD, P&E bakah NHIDCL hotute kokhawmin hmalak dan tur sawiho a ni.

Zoram Drivers’ Union (ZDU) Sub-Hqrs. Ser-chhip chuan nizan hmasa khan Executive Meeting neiin Serchhip District huamchhunga National Highway-54 kawngpui siam zawh a ni chho mek chu lawmawm an tih thu sawiin, chutihrual chuan nunna hlu tak chan awm awm chho chu pawi an tih thu an sawi a. Hun lo kal zel turah kan kawngpui te him tak hman a nih theih nan venhim hna leh khuahkhirh hna thawh chungchang chu Serchhip District Bawrhsap sawipui nise an ti bawk.

Tunhnaia ruahsur leh thli tleh avangin hriat theih chinah Mizoram-a khaw 167-ah chhiatna a thleng. Disaster Management & Rehabilitation Department Secretary K. Lalrinzuali chuan Cyclone Remal avang hian Mizoram-a khaw 167-ah chhiatna a thleng tih sawiin, Aizawl District-a hmun 59, Lunglei District-a hmun 30, Siaha District-a hmun 9, Champhai District-a hmun 12, Kolasib District-ah hmun 8, Serchhip District-a hmun 11, Lawngtlai District-ah hmun 8, Mamit District-ah hmun 11, Saitual District-ah hmun 10, Khawzawl District-ah hmun 5 leh Hnahthial District-ah hmun 4-ah te chhiatna hrang hrang a thlen thu a sawi a ni.

Tunhnaia ruahsur avanga leimin in chenna In a hnawl zinga mihring a hnawl tel te zawn hna chu nimin khan thawh chhunzawm leh niin nimin khan ruang pahnih hmuh belh leh a ni.

Tunhnaia ruahsur nasa avanga Tlawng lui lian ah Sairang khuaa chhungkaw 57 chu hmun him lama thiarchhuah an ni tawh a, heng bakah hian Kali Mandir, Muslim biak In, School leh Angan-wadi te chu tuilian hian a chim bawk a ni. Sairang Branch YMA Secretary  HVL. Muanpuia chuan tun tuma tuilian in a chim chin chu an hriat theih chinah a san ber tum a ni a, Kum 2018-a Disaster Management and Rehabilitation Department in tuilian in a chim chin lung a phun pawh tun tuma tuilian hian a pel tih a sawi a ni.

Nimin khan Mizoram-a pawl panga (5) te chuan Chief Minister’s Relief Fund-ah pawisa an chhunglut a, Mizoram Civil Service Association chuan Rs. 50,000/- chunglutin Chase Academy, Vaivakawn in Rs. 50,000/- bawk an chhunglut a, Mizoram Government School Teacher's Union (MIGOSTU) in Rs. 30,000/- an chhunluh bakah Central Bank of India, Aizawl Branch in Rs. 10,000/- leh  Special Educator Association in Rs. 5000/- an chhunglut bawk a ni.

Mizoram Pradesh Congress Committee (MPCC) chuan tunhnaia Mizoram hmun hrang hranga chhiatna thleng vanga nunna chan te chu nimin khan ralna sum Rs. 5000/- theuh an hlan a, chhiatna tuartu Veng YMA te hnenah Rs. 1000/- theuh hlanin hetianga khuarel chhiatna a lo thlen changa Mizo tlawmngaihna parvul tir a, mawhphurhna la thin YMA kan nei chu kan vannei hle tih an sawi bawk.

Aizawl-a awm Assam Rifles Lakhimpur Battalion te chuan kumin High School Leaving Certificate (HSLC) leh Higher Secondary School Leaving Certificate (HSSLC) Exam-a zirlai tithate chawimawina hun nimin khan Gajraj Hall, Lakhimpur Battalion ah an hmang a. He hunah hian Lt. Col. Ashish Prakash, Second-in-Command of Lakhimpur Battalion chuan HSLC leh HSSLC Topper- te chu an kalna tur Stream thlang thiam turin a fuih a. Chawimawina thuziak a hlan nghal bawk. Zirlai titha chawimawina hunah hian Lt. Col. Ashish Prakash bakah hian Major Akash Deep Vohra leh V.L. Engmawia Addl. Secretary Mizoram ten hun an hmanpui a ni. 

Home Minister K.Sapdanga chuan Aizawl khawpui hmun hrang hranga Cyclone Remal avanga nunna chante ralna cheng nuai 2 theuh a hlan. Home Minister chuan sawrkar ruahmanna angin nunna chante hi cheng nuai 4 -a ral tur an nih thu sawiin, tunah hian cheng nuai 2 hlan an nih phawt thu leh hun remchang hmasa berah nuai 2 dang hlan leh an nih tur thu a sawi a ni. Hei bakah hian Home Minister chuan chhiat tawh nikhua a, zonun zemawi lantir a ni thin chu ropui a tih thu a sawi a. Tlawm-ngai pawlte inpekna leh Kohhran leh khawtlang hruaitute bakah mimal tlawmngai chhiat tawkte tanpui tura an thawkchhuak nghal thin chu a Kris-tian hle a a hriat thu sawiin, Sawrkar lama Concern Department-te hmalakna leh thawhrimna a chhuanawmin a thlamuan thlak tih a sawi bawk.

Peoples’ Conference (PC) Party chuan tunhnaia Zoram hmun hrang hranga khuarel chhiatna namen lovin a tlakbuak nunna hlu tak chân chhungkuate, hliampui tuara In leh lo chân te, Veng leh khuaa vanduaina chi hrang hrang tuartute zawng zawng an tawrhpui thu thuchhuah siamin an tarlang a. Heng chhiatna leh vanduaina tawkte chunga theihtawp chhuaha tanpuina leh chhawmdawlna thlentu tlawmngai pawl te, mimal leh chhungkua leh sawrkar official te chungah lawmthu an sawi bawk.

MNF President Zoramthanga chuan nimin khan Cyclone Remal vanga chhiatna thlenna hmun thenkhat tlawhin chhanchhuah hna thawktute chhuanawm a tih thu a sawi. Chhiatna tuar nasa ber, Melthum leh Hlimen-a leiminna hmun a tlawhnaah MNF President Zoramthanga chuan nunna chanta te thinlung taka a sun thu leh hliam tuarte pawh an dam leh thuai a duhsak thu a sawi a, leimin in an In leh lo leh an lirthei leh thil hlu dang a tihchhiat sakte pawh tawrhpui thu sawiin, Cyclone Remal vanga Zoram dung leh vanga chhiatna tuartute chu MNF Party chuan thinlung takin a tawrhpui a, tih theih an neih apiangah theihtawp chhuahpui zel an tum tih a sawi. MNF President chuan khaw chhe hnuaia mahni nunna thapa chhanchhuah hna thawktu, Mizo tlangval rualte inpekna chu chhuanawm a tih thu a sawi bawk.

Khawzawl District AIDS Control and Prevention Committee chu nimin khan thukhawmin HIV/AIDS darh zel tur venna kawnga hmalak dan tur hrang hrang an sawiho.

Kolasib District Bawrhsap John LT. Sanga chuan nimin khan ruahsur nasa avanga Tlawng lui lianin Bairabi khua hmun thenkhat a harsatna a thlen te a enfiah.

MJA General Hqrs. hruaitute chuan nimin khan Chief Minister Lalduhoma hmuin an pawl mamawh hrang hrang an thlen.

PHE Minister Prof. Lalnilawma chuan tunhnaia ruahsur nasa leh thli tleh vanga Tui Pump leh sem kawnga harsatna an tawh hrang hrangte nimin khan MJA hruaitute a hrilhfiah.

Chief Minister Lalduhoma chuan sawrkar hmalakna inthuah leh inhnai lutuk te tihbo a nih theih nan Department tin in an project duan te chu Planning Board kaltlang zela thehluh tawh tur an tih thu a sawi.

Niminpiah atanga nimin thlenga ruahsur leh thlipui tleh avangin Serchhip-ah chhiatna thleng a awm nual a, vanneihthlak takin mihring nunna khawih pawi khawp chhiatna thleng erawh a awm lo thung a ni.

Niminpiah atanga ruahsur nasa avanga Tuilian in Serchhip Mat Phai-a thlai chinna hmun zau tak a chim leh a, inkalpawhna kawng leh Thlam te pawh chimin tuilian hi ala kam loh avangin chhiatna thlen dan kimchang erawh hriat theih ala ni lo.

Chief Minister Lalduhoma hovin Thawhtanni khan Mizoram Institute of Advanced Studies (MIAS) dinhmunte thlira sawiho a ni.

Lok Sabha Inthlanpui 2024 duty tura tirh-chhuah Mizoram Armed Police mi 1047 ten tun thlenga vote an thlak theih loh chungchangah Rajya Sabha MP K. Vanlalvena chuan nimin khan Chief Election Commissioner, Election Commission of India hnenah lehkha a thehlut a. A lehkha ah hian Lok Sabha MP Election 2024 duty tura Mizoram atanga tirhchhuah Mizoram Armed Police mi 1047 te tun thlenga vote thlaktir loha an la awm chu an dikna chanvo hupbeh sakna a nih thu leh a dik loh thu te, vote thlak chu India khua leh tui an nih anga an dikna chanvo a nih thu leh vote an thlak ngei theihna tura ngaihtuah nawn leh turin ECI a ngen thu te a lehkha ah hian a tarlang a ni.

President Draupadi Murmu, Vice President Jagdeep Dhankar leh Union Home Minister Amit Shah te chuan Cyclone Remal avanga Mizorama thihna thleng chu pawi an tih thu an sawi a. President hian nimin khan Social Media-ah thli tleh leh ruahsur avanga nunna chante a tawrhpui thu sawiin, lusun chhungte a tawrhpui thu leh a tawng-taipui reng thu sawiin, chhanchhuah hna chak taka thawh anih theih nan duhsakna a hlan a. Vice President Jagdeep Dhankar pawhin Hlimen-a chenna In leiminin a hnawla thi te a tawrhpui thu leh hliam tuarte pawh an dam leh thuai theih nan duhsakna a hlan a. Home Minister Amit Shah pawhin vanduaina tawkte a tawrhpui thu a sawi a ni.

Tunhnaia ruahsur nasa avangin nizan hmasa khan Kolasib Hmar Veng-a Lalhmangaihzuali te chenna In chu lemin in a hnawl a, Kolasib New Diakkawn leh Thingdawl-ah thing tlu in In pakhat ve ve a tichhe bawk. Mamit-ah pawh High School Veng bakah Bawngva leh Tuirum khuaah chenna In pakhat theuh a chhe bawk. Heng bakah hian Mizoram hmun hrang hrang ah leimin in inkalpawhna kawng a hnawh a, Tuilian avangin hmun hrang hrangah chhungkaw engemaw zat chu hmun him lamah thiarchhuah an ni bawk a, Vawiin lam hian hmun thenkhat ah chuan ruah hi la sur turin khawchin thlirna ah tarlan a ni bawk.

Mizoram Information Service Association (MISA) hruaitute chuan nimin khan Chief Minister Lalduhoma chu a chenna Bangla-ah hmuin Cyclone Remal avanga chhiatna tawkte tanpuina atan Chief Minister Relief Fund-ah Rs. 20,000/- an chhunglut.

Chief Minister Lalduhoma chuan thlipui leh ruahpui vanga hmun hrang hranga chhiatna thlenga nunna chan te, In leh lo chan te leh harsatna dang tawk tam tak avangin pawi a tih thu nimin khan Social Media kaltlangin a tarlang a. Chhiatna thleng mekah District Disaster Management Authority (DDMA) tin te chu theihtawp chhuaha hma lo la tura ngenin tlawmngai pawl leh a thei apiangte tanpui ngai te tanpuia lo che chhuak turin a sawm a. Mipui nunau te chu mahni In lamah emaw, hmun himah lo awm a, chhiatna nasa zawk a then loh nana mahni zawnah theuh lo fimkhur turin a ngen bawk. Chief Minister chuan Remal Cyclone avanga chhiatna tuar te chhawmdawl nan Mizoram sawrkar chuan cheng vbc. 15 a ruahman thu leh mitthi te ex-gratia cheng nuai 4 zel pek an nih tur thu a sawi bawk.

Lok Sabha Inthlanpui a Vote tla te chhiar turin inbuatsaihna kalpui mek zel a ni a, District hrang hrangah Vote chhiar turte tan Training neih chhoh mek a ni bawk. Champhai-ah chuan nimin khan Counting Supervisor leh Counting Assistant-te tana Training hmasa ber neih a ni a, Counting Micro-Observer-te tana Training hmasa ber pawh neih nghal a ni bawk. Khawzawl-ah pawh nimin khan Counting Official – Counting Micro Observer, Supervisor leh Assistant-te tan training hmasa ber neih a ni a, Mamit District-ah pawh Vote chhiar ni-a duty tur Counting Supervisor 33, Counting Assistant 33 leh Micro Observer 40 te tan nimin khan 1st Randomization neih a ni a. Saitual-ah pawh nimin khan District Election Officer Dr. Lalngura Tlau hovin Vote chhiar tura inbuatsaihna leh hmalakna te sawiho a ni bawk.

Mizoram Governor Dr. Hari Babu Kambhampati chuan kumin a HSSLC leh HSLC Exam Result chhuaka Mizoram pum-a pakhatna te chu niminpiah khan Raj Bhavan-a leng-ah sawmin chawimawina thuziak leh pawisafai a hlan.

Samagra Shiksa Lunglei District bultumin, Mizo Academy of Sciences Sub-Headquarters Lunglei leh Mizoram Mathetics Society Lunglei tangkawp chuan Lunglei-a Zirlai, Pawl 11-a Science lak tum te tan Science leh Mathematics Bridge Course an buatsaih dawn.

National AIDS Control Organization (NACO), 2022 tarlan danin Champhai District mipui za zela 2.97 (1664) te chuan HIV an vei.

Cyclone Remal-in Mizoram hmun hrang hranga kawlphetha pekna a tihchhiat te chak taka siamthat a nih theih dan tur chu nimin khan P&E Minister F. Rodingliana hovin Department hotu ten an sawiho.

Mizoram-a Political party hrang hrangte chuan ruah leh thlipui thawk avanga Mizoram-a chhiatna thleng chu pawi an tih thu an sawi.

Cyclone Remal leh a kentel ruahsur in nizan hmasa zankhua leh nimin thlenga Mizoram a nuai avangin hmun tam takah chhiatna thleng a awm a, tun tuma chhiatna thleng ah hian nunna chan mi 20 chuang awmin leimin in a hnawl mi thenkhat chu chin hriatloh in an la awm bawk a. Vanduaina thlenna hmun te hi nimin khan Chief Minister chuan a tlawh a ni.

Govt. Higher Secondary School Serchhip chuan kumin-a Higher Secondary School Leaving Certificate (HSSLC) Exam-a an School atanga zirlai pass thar te lawmpuina hun nimin khan hmangin zirlai tithate hnenah chawimawina leh lawmpuina pawisafai an hlan bawk.

State Meteorological Centre-in a puan lawk angin Bay of Bengal tuipui atanga Cyclone insiam si per chuan nimin lam atang khan Mizoram a tuam mek a, nimin khan Serchhip-ah pawh ruah hi nileng deuhthaw in a sur a, nimin tlai lam atang khan thli pawh na deuh takin a thawk a ni. Khaw awmdan thlirlawkna atanga a lan danin Vawiin lam hian ruah la surin thli erawh zia deuh tura ngaih a ni.

Serchhip Bawngchawm tlang-a Paraglyding Take-off Point-a Guest House chu tunhnai khan misual tu tih hriatloh ten an rawk a, helai hmun atang hian Dunlop (Single) 21, Rizai 28, Blanket 12 leh Generator lian battery pakhat an lachhuak nia hriat a ni a, heng an thil ruk hi Rs. 86,500/- man vel nia chhut a ni. Hemi chungchangah hian Mizoram Aero-Sports Association (MASA) chuan Serchhip Police Station-ah FIR thehlutin hetiang thil lo zuar hria chuan Ph. 9436376069 /9089213981-ah emaw, Police te hnenah emaw hriattir turin MASA hruaitute chuan an ngen a ni.

Nimin khan Serchhip District-ah African Swine Fever (ASF) vanga Vawk thi chhinchhiah belh awm lovin Chhingchhip khua ah vawk 7 te chu hri darh zel tur venna atan suat a ni a, Hmuntha khua a Vawk thi Sample enfiah ah ASF kai nia rinhlelh a nih avangin a Sample lain hmunpui lamah enfiah leh tur a ni ang.

ZPM Party chuan nimin khan Aizawl-a an Party Office-ah Chhung Inkhawm neiin he hunah hian Supply Minister B. Lalchhanzova chuan dinhmun harsate'n an chanvo an chan theih ngeina turin Ration Card ennawn hna chu thawh chhoh zel tum a nih thu a sawi a. “Kum nga kalta chhûng khan hriat theih chinah Tender hmanga buhfai lei a awm ngai lo a, mipui mamawh aia tam buhfai phurhluhte pawh a awm thin a, ZPM sawrkâr hnuaiah erawh buhfai lei dan phung siam that a ni; a sem danah pawh dik zawka kalpui tura ruahmanna siam mêk a ni,” a ti a. “Retailer-te dinhmun ennawn a, an lawmman-te pawh tihpun tum niin buhfai buk dik zawka an hralh theihna tura ruahmanna siam mek a ni,” a ti bawk. Supply Minister chuan tunhnaiah ZPM Sawrkar hnuaia hna thawh felhlel tam tak awm angin phochhuah a nih thin thu pawh sawiin, heng hi mipuite'n lo zir chiang hmasa thin se an duh thu pawh a sawi bawk.

MNF party chuan nimin khan Aizawl-a Mizo Hnam Run-ah Chhung Inkhawm neiin he hunah hian MLA hlui leh MNF General Secretary Prof. F. Lalnunmawia chuan MNF in sawrkarna an chan leh ngei theihna turin rualkhai taka ke an pen a tul thu a sawi a. “Kawng hrang hrangah thawhpui zawn thiam a, theihtawp kan chhuah tlan a tul a. Lungrual takin theihtawp chhuahin bei ila, kan sawrkar leh ngei ang,” tiin Inthlanpui-a an chak loh chhan ah tumah in mawhpuh tur an awm lo tih a sawi bawk.

Lawngtlai District Mualbu 'L' a Upper Primary School Building chu nimin zing khan thli in a chhem tlu a, mihring thi leh hliam an awm lo. He School building hi kum 2006-a sak kha niin he School Headmaster Zolalsanga chuan School Building a that tawhloh avangin khua a chhiata thli thawk thei tur dinhmuna a awm chuan School pawh an kalpui ngam lo thin tih sawiin, nimin ah pawh khan School kal lo mai tura naupangte an hriattir thu a sawi bawk. He School-ah hian zirlai naupang 31 an awm mek a ni.

Mizoram Rural Bank (MRB) chuan an hlawkna atanga vantlang tana an pek let thin, CSR kaltlangin nimin khan Synod Hospital, Durtlang hnenah Haemodialysis Machine an pe a. Thilpek hlanna hunah MRB Chairman Sheryl L. Vanchhong chuan Synod Hospital chu State mipui in an thlamuanpui thu sawiin, mipuite chhawr tangkai theih tûr thil engemaw CSR kaltlanga ti theia MRB a awm chu lawmawm a tih thu a sawi bawk.

Nimin khan Khawzawl-ah District Level Committee on Green Mizoram chu an Chairman leh District Bawrhsap K. Lalrohlua hova thukhawmin kumin a Green Mizoram Day hman dan tur an rel a. Green Mizoram Day hi Khawzawl DC Conference Hall-a hman relin hemi hnu hian NH-06 (Khawzawl – Champhai)-ah thing phun tur a ni anga, Tuimuk lei atanga Champhai lam kilometer 1.5 a thui-ah thingtiak 500 tal phun tura ruahmanna siam a ni.

Chief Minister Lalduhoma chuan nimin khan a Office-ah Zoram Research Foundation (ZRF) hruaitute kawmin an hmalakna te a sawipui a, Chief Minister hian tunhma deuhva sawrkar leh ZRF ten an kalpui Mizoram Institute of Advance Studies chu tha taka lo kalpui zel turin a hrilh a. Hnam tobul zawnchhuahna tura hmalakna an lo neih tawh te chu chhunzawm thaa a rin thu pawh sawiin, Seminar leh Workshop tha tak tak buatsaih zel pawh tha a tih thu a sawi a. An hmalakna Save Chite Lui chungchang pawh a sawipui bawk.

Kumin-a a hmasa ber atan Mizoram-ah Vaimin eichhetu Pangang, Fall Armyworm hmuh leh a ni.

Nimin khan Khawzawl-ah District Inspection and Monitoring Committee on Prevention of Illegal Transportation of Children chu an Chairman leh Khawzawl DC hova thukhawmin Dan kalha naupang kumtlinglo hruai bo tihtawp leh ven dan tur an sawiho.

Sawrkar Department hrang hrangin mipuite rawngbawl hna mumal zawk leh tha zawka an thawh theihna tura dan siam, The Mizoram Right to Public Service (RTPS) Act 2015 chu tun thlengin hmang tangkai an la awm lo.

Champhai District Bawrhsap leh District Level Committee on Myanmar and Bangladesh Refugees (DLCM&BR)-a Chairman James Lalrinchhana chuan Myanmar atanga raltlante chhawmdawlna pek chungchang chu nimin khan Relief Agency hrangte hrangte a sawipui a. Champhai District chu raltlan ngah ber District a nih thu sawiin, Raltlan chhawmdawl leh tanpui kawnga Relief Agency hrang hrangte hmalakna fakawm a tih thu sawiin, theihtawp chhuah chhunzawm zel turin a fuih a. Tunhnaiah Vaikhawtlang, Khuangphah leh Hnahlan khua ah te raltlan lut thar mi engemaw zat an awm belh thu sawiin, Relief Agency-te chu raltlante tanpui leh chhawmdawl kawngah thawhhopuiah a sawm nghal bawk.

Zo Re-Unification Organisation (ZORO) chuan tunhnaiah kan Unau ZRA Eastern Command leh Chin National Army (CNA) leh a thurualpui te in hmu thiamlo a silai hial an lek chu pawi an tih thu an sawi a. ZRA Eastern Command leh Chin National Army (CNA) leh a thurualpuite hi unau thlahkhat, thisen a inzawm an nih thu leh engemaw thu inhmuh fuh loh vanga in tibuai mai nia an lan thu sawiin, “Uunau inhmelhai a tha lo a ni tih hriaa an in hmuh thiamlohna chhunzawm lova an in beihna hi ti tawp turin kan beisei in, kan ngen nghal bawk a ni,” an ti.

National Skill Competition-Indiaskills 2024-a Mizoram atanga tel Mizo thalai Medal la mi 8 te chu nimin khan Chief Minister Lalduhoma chuan lawmpuina thingpui a inpui.

Home Secretary H. Lalengmawia'n tunhnai-a Assam Sawrkar-in Mizoram ramri-a Commando Camp an sak chungchangah Assam Chief Minister-in Assam nek anga Mizoram a puh chu thu awmze nei lo a nih thu a sawi.

Mizoram sawrkar-a Home Secretary H. Lalengmawia chuan State pawna Mizoram Police duty-te'n vote an thlak theih loh chhan chu sawrkar inthlahdah vang a nih loh thu a sawi a. Mizoram DGP Anil Shukla pawhin, “Police-te'n vote an thlak theihna atan theihtawp tak meuh meuh kan chhuah,” a ti.

Mizoram-a Political party pahnih, Aam Aadmi Party (AAP) Mizoram leh Peoples Conference (PC) Party te chuan Mizoram-a MLA 16 te chu Dan kalha an thuneihna piah lama nihna chelh nia an hriat avangin Dan anga hma la turin Assembly Speaker an ngen a. Speaker chuan heng MLA te hian Dan an bawhchhe lo niin a sawi thung.

African Swine Fever (ASF) avanga Vawk thi ala awm belh zel a, Inrinni khan Mizoram-ah ASF vanga Vawk thi 12 awmin Vawk 10 suat a ni a, nimin khan Vawk thi pathum awm lehin vawk 11 suat a ni leh bawk. Heng te nen hian Mizoram-ah kumin hian ASF vangin Vawk 1039 a thi tawh a, Vawk 1644 suat ni tawh bawkin Mizoram-a District 11 zinga District 6-ah ASF hri hi hmuh a ni tawh a, ASF lenna te hi Aizawl, Champhai, Lunglei, Saitual, Khaw-zawl leh Serchhip District te niin Mamit, Kolasib, Hnahthial, Lawngtlai leh Siaha District-ah chuan ASF vanga Vawk thi report hi ala awm lo a ni.

 

Mizoram State Project Monitoring Committee (MSPMC) chuan NH-54, Aizawl - Tuipang kawngpui siam meka Serchhip leh Keitum chhehvel leivung paihin a nghawng dan Zirtawpni khan an enfiah.

State Mateorological Centre, Govt. of Mizoram in thuchhuah a siama a tarlan angin Bay of Bengal chhim chhak lam-a thlipui in siam in a hrut theih tur zingah Mizoram tel lo mahse nimin leh Vawiin lam hian Mizoram-ah ruah leh thli (50-70 Kmph) rawn thlen thei tura ngaih a ni a. Hei vang hian Serchhip DC leh DDMC Chairman David Lal-thantluanga chuan mipuite chi-ai lo tura chahin, thlipui leh ruah thleng thut thei laka fimkhur turin a hriattir a. Mipuite tana hriat tur inkaihhruaina hrang hrang siamin, chhiatna a lo thlenin District Emergency Operation Centre No. 9862116104 emaw Bialtu Zonal Officers hnenah a rang thei ang bera hriattir tur a ni tih a tarlang bawik.

Serchhip IOC Veng PHE Booster Pump a Electric Transformer chu Zirtawpni tlai-a ruahsur lai khan a chhia a, hei vang hian Booster Pump atang hian Serchhip Bazar lam-ah Tui pump theih a ni lo a, Zirtawpni leh Inrinni-a tui dawng tur thenkhat ten la dawng thei lovin Thawhtanni-a tui dawng thin te pawhin Vawiin lam hian an la dawng thei dawn lo bawk a ni.

District & Session Judge leh Aizawl Judicial District-a District Legal Services Authority Chairman Joel Joseph Denga MJS chuan Zirtawpni tlai khan Serchhip District Jail tlawhin an dinhmun te a enfiah bakah thawktute a kawm nghal bawk.

Mizoram Presbyterian Kohhran-a New Serchhip Pastor Bial chuan ‘Ruihhlo Do Pawl Committee’ an din thar.

Myanmar ram buaina vanga Rakhine State-ah eitur leh tuialhthei mamawhna a san vangin March thla laihawl vel atang khan tuialhthei leh eitur lam chi thahnem tak chu Mizoram chhung, Siaha District kaltlangin Rakhine State-ah thawnluh thin a ni a, hemi chungchang ah hian khua leh tuite him zawk nan Central Young Lai Association chuan Inrinni, May 25, 2024 zanlai dar 12:00 hnu lamah chuan Lawngtlai District chhung leh District kaltlangin Rakhine State-ah engmah thawnlut lo turin hetiang lama inhnamhnawihte chu an ngen a ni.

Lok Sabha Inthlanpui a Vote tla te chhiar tura inbuatsaihna kel mekah Chief Electoral Officer (CEO), Mizoram Madhup Vyas IAS chuan Inrinni khan Hnahthial District a tlawh a, Hnahthial District Bawrhsap leh District Election Officer Chuauhnuna leh SP Shivendu Bhushan IPS bakah thawktu dang ten lo dawngsawngin MP inthlanna hman EVM dahna Strong Room, MP inthlana Vote chhiarna tur DC Conference Hall-a Counting Hall siam te, CCTV te a enfiah hnuah DC Office Meeting Hall-ah Officers te a kawm bawk. CEO chuan Mizoram-ah MLA leh MP inthlan a hmachhawn tawh tih sawiin, inthlanna felfai leh thianghlim tak a awm thin chu lawmawm a tih thu te, Hnahthial District pawh MP inthlan felfai tak an hmachhawn hnua Vote chhiar tura an inbuatsaihna te chu tha thawkhat hle a a hriat thu a sawi a, Vote chhiar chu ECI duh dan ang ngeia kalpui chhunzawm turin a chah nghal bawk.

Mara Kohran pahnih, Evangelical Church of Maraland (ECM) leh Congregational Church of India Maraland (CCIM) te chu kum 35 (1989-2024) chhung Assembly rorelna pakhat hnuaiah an awm tawh loh hnu Zirtawpni zan khan Kohhran pahnih te hian inpumkhatna atana hming ziakin CCIM chu thiah a ni a, Evangelical Church of Maraland (ECM) tih hming puin an awm tawh dawn a ni. Heng Kohhran pahnih te inpumkhatna tur atan hian May 24-26, 2024 chhungin ECM Local Church New Siaha-ah Special Assembly neiin Rev. T Laikai chuan inremna puanzar a pawtpharh a ni.

Mizoram-a Phar enkawlna damdawi In awmchhun, Tlabung Leprosy Hospital-a Phar enkawllai awmchhun chu tunhnaia a thih avangin he damdawi In-ah hian Phar natna vei enkawllai an awm rih lo.

ZPM Thalai Hqrs. leh Save The Riparian te huaihawtin Inrinni khan Aizawl Khatla lui thianfaia hnatlang neih a ni a, hnatlang neih tan hmaa inkhawm tawi ZPM Thalai President Jeje Lalpekhlua kaihhruai a neih ah UD&PA Department changtu Minister K. Sapdanga chuan Aizawl khawpui in harh tharna a chang mek tih sawiin, “Save The Riparian ten hma hruaiin Aizawl chauh ni lo, Mizoram hmun hrang hrangah luidung thenfai nachang kan hre ta. Mizo mipuite hian zui tur dik kan hmuh phawt chuan hmun tawp leh tawp lo thliar lovin luidung pawh kan suar peih mek a ni,” a ti a. “Aizawl khawpui hian faina kawngah hma kan hruai a ngai a, State Capital ber hi entawntlaka khawsak kan zir a ngai a ni,” a ti bawk.

MNF Sr. Vice President Dr. R. Lalthangliana'n Lok Sabha MP thlanna April ni 19-a neih takah Mizoram Armed Police 1047 zet te vote thlak thei lova siam an ni chu an Party chuan pawi an tih thu leh Mizoram sawrkar inthlahdah vang a nih thu a sawi.

Myanmar atanga dan lova kuhva tawlh a nih loh nan Bilkhawthlir Kuhva Chingtu Co-Operative Society Ltd. chuan duty an la kalpui reng a. Khawchhak atanga kuhva tawlh an awm vang hian kumin hian kuhva lei tuma dawrtu pawh an la awm lo.

Ramchhunga Civil chawimawina sang, Padma Shree Award dawngtu TNT Founder Sangthankima chawimawina dawn lawmna inkhawm Inrinni-a TNT, Muanna Veng-a neih chu Chief Minister Lalduhoma leh Home Minister K. Sapdanga ten an telpui.

Myanmar ramchhunga buaina chhuak in ziaawm lam ala pan theih tak tak loh avangin Mizoram-ah raltlan rawn lut an la awm belh zel a, Inrinni thleng khan raltlan rawn lut hi awmin Mizoram pumah Myanmar atanga raltlan mi 35,624 zet an tling tawh nia hriat a ni.

State Mateorological Centre, Govt. of Mizoram in a tihchhuah angin Bay of Bengal chhim chhak lam thlipui in siam mek chuan a hrut theih tur zingah Mizoram tel lo mahse Mizoramah ruah leh thli a rawn thlen tura ngaih a ni a. May ni 26, 2024 leh May ni 27, 2024 ah niin, Mizoram hmun thenkhatah thli na vak lo (50-70 Kmph) vela thawk theia ngaih a ni. 

Kumin chhungin Serchhip District-ah nimin thleng khan African Swine Fever (ASF) vanga Vawk thi 68 awm tawhin Vawk 273 suat a ni tawh.

Mizoram Board of School Education chuan June ni 19, 2024 (Nilaini) hian High School Leaving Certificate (Compartmental) Examination, 2024 leh Higher Secondary School Leaving Certificate (Compartmental) Examination, 2024 a buatsaih dawn a, Exam neihna tur hian District tinah Centre pakhat zel ruahman niin Serchhip District-ah pawh Govt. Serchhip Higher Secondary School, Serchhip-ah Exam hi neih tur a ni ang. HSLC leh HSSLC Exam 2024 neih zawh taka zirlai hlawhtlinna changte zingah hmasawn lehzual inbeisei a exam tha leh duh tan an duh ber subject pakhat (theory) ah Improvement Examination an neih phal sak an ni bawk a, Zirlai exam duh tan Centre Superintendent hnenah Fee pe in dilna thehluh theih a ni.

India rama khua leh tui chawimawina sang Padma Award hrang hrang – Padma Vibhushan, Padma Bhushan leh Padma Shri dilna hun chu hawn leh mek a ni a, Padma Awards hi kawng hrang hranga hnathawk tha leh mi hmingtha te tan dil theih niin- Art, Literature & Education, Sports, Medicine, Social Work, Science & Engineering, Public Affairs, Civil Service, Trade & Industry leh a dangte ah dil theih a ni. He chawimawina hi May 1, 2024 atanga September 15, 2024 thleng dilna hun hawn a ni a, Rashtriya Puraskar portal awards.gov.in kaltlang a dil theih a ni. Hrechiang duh tan website: padmaawards.gov.in ah en theih a ni bawk.

Kolasib khaw chhung bawlhhlawh lakkhawm sawngbawlna 'Solid Waste Management Centre' Dihmunzawl-a mi chu Kolasib District MJA ten an tlawh hnuah nimin khan UD&PA Department Director Andrew H. Vanlaldika chuan a hmun ah a tlawh a, Department in bawlhhlawh sawngbawlna an kalpui dan ah an hlawhchham rih tih a pawm thu sawiin, helai hmun hi Model Project a nih theih nan hmalak a nih tur thu a sawi bawk.

Mamit District Task Force on Immunization chu nimin khan Mamit DC Office-a Taitesena Buk-ah thukhawmin 2023-2024 chhunga hmalakna hrang hrangte thlirho a ni a, Mamit District chhunga District Hospital, CHC leh PHC a vaiin hmun 10 ah naupang vaccine pek tura ruahman lawk (target) 1525 ah naupang 1406 te vaccine pek an ni a, hei hi 92.1% a ni tih tarlan a ni.

State Emergency Operation Centre (SEOC) chhinchhiah danin kumin hian khuarel chhiatna vangin Mizoram-ah chenna In chhia 4,726 a awm tawh a, heng zinga 201 chu luahzui tlak loha chhia niin In dang 630 chu nasa taka chhia a ni a, In 3895 te chu chhe nel nual a ni bawk.

Mizoram Legislative Assembly-a Committee on Estimates chuan nimin khan an Chairman leh Dy. Govt. Chief Whip W. Chhuanawma hovin Thingsulthliah RD Block hnuaia Thingsulthliah leh Sesawng khuaa Sihpui Zau leh Kaihlet Zau a WDC-PMKSY 2.0 kaltlanga Rural Development Department in Project a thawh tawh te leh thawk mekte a hmunah an enfiah a. He Scheme hnuaia Project khawihte a en mai bakah hian beneficiaries te kokhawmin an inkawm nghal bawk a, he Scheme hnuaia hamthatna an dawn te bakah beneficiaries ten harsatna an tawh chungchangte an sawiho a ni.

Disaster Management & Rehabilitation Department ruahmana in nimin khan Aizawl-a Secretariat Conference Hall-ah District tina District inrelbawlna hotute tan Furpui lo thleng tur atana inbuatsaihna chungchang sawihona neih a ni a. He hun hi DM&R Minister K. Sapdanga chuan telpuiin District tin hotute chu thahnem ngai taka chhiatna thlengte endik thuai a chhawmdawl ngai te chhawmdawl nan hma lo la rang thin turin a ngen a. Chhawmdawl ngaite chhawmdawlna tur pawisa pawh Sawrkar lamin a theih ang angin a ngaihtuah zel tur thu a sawi a. Hetihlai hian dan in a phal chin te uluk taka lo enchik thin turin a chah bawk. He hunah hian Khuarel chhiatna thleng thei laka District tin lo inpuahchah dan leh chhawmdawlna awm theite leh kaihhruaina a hriat tur tulte zirho a ni a, chhawmdawlna sum hman dan leh an mamawh dante leh khuarel chhiatna lo thlen thulha hmalak dan tur hrang hrang pawh sawiho a ni bawk.

BJP Mizoram President Vanlalhmuaka chuan Sawrkar kan hrawn thin ten Mizoram mipui min ti beidawng niin a sawi.

MNF Adviser leh MLA hlui TC. Pachhunga chuan ZPM sawrkar chu a bilhah a tho lo nasa em em nia sawiin, “An insawi ang an ni lo a, mipui beisei an pha lo nasa em em a ni,” a ti.

Tunhnai khan Myanmar atangin Vohbik, Home-a enkawllai mi 80 chuang chu Mizoram-ah raltlan in an rawn lut. Thudawn danin heng Vohbik te hi an vaiin mi 86 an ni a, Home-a enkawllai niin Tahan atangin Champhai District-a Zokhawthar-ah Nilaini khan an rawn lut a, YMA Hall-ah khawtlang hruaitute’n an awmtir rih a, anni bakah hian anmahni enkawltu mi thenkhat te an tel bawk nia thudawn a ni. Zokhawthar VC President Lalmuanpuia chuan heng mite hi ‘Chhanchhuahna Home’ a awm nia sawiin, an Home-a bomb a tla a, chumi hnua Mizoram pana chhuak an ni tih a sawi. An hriat danin, Bomb vang hian mi pathumin nunna an chan a, hei hi a ni tak hriat a ni rih lo. An ralmuan loh avangin a huhovin Mizoram hi an pan ta a ni.

Mizoram Pradesh Congress Committee (MPCC) General Secretary PC. Laltlansanga chuan chhawr tlak leh hnathawk tak tak thei tur thiamna pe tura Eduication kan siamthat a ngai tih sawi.

Hachhek Bial Kuhva Chingtu Pawl (HBKCP) chuan Kuhva tawlhru te dang turin an Duty leh dawn tih sawiin, sawrkar in thlai thenkhat a Minimum Support Price a siam turah Kuhva telh ve ngei turin an ngen bawk.

Chief Minister Lalduhoma chuan 'Save the Riparian' huaihawt luikawr dung thenfai hnatlang neih mek, Mega River Cleaning Programme nimin-a Tuikual lui-a neih chu a telpui a, Sports Minister Lalnghinglova Hmar pawhin he hnatlang hi a telpui bawk a ni.

Land, Revenue & Settlement Department chuan ‘GIS Based Comprehensive Land Record Management System’ an buatsaih thar chu enchhinna hun hmangin he hun hi Revenue Minister B. Lalchhanzova chuan a telpui.

Mizoram Police te chuan North East Frontier Railway thuneitu ten Railways bungraw bo leh thubuaiah te Police ten hma an la tawklo anga ngaih theih tura thu thehdarh lo awm chu thu belhchian dawl lo a ni tih sawiin, “Rel kawng siam mekah hian pawikhawihna a thlenin Police ten theihtawpin chhuichhuah hna an thawk thin,” an ti.

Serchhip District chhunga awm Kanghmun South Branch YMA chuan an dinchampha kum 50-na (Golden Jubilee) lawm neiin he Jubilee lawmna hun hi nimin khan Serchhip District Bawrhsap David Lalthantluanga chuan khuallian niin a hmanpui a ni.

Serchhip Chanmari Branch YMA-a YMA Chhang te chuan nimin khan Serchhip DIET Multipurpose Hall-ah Awareness Campaign an buatsaih a, he hunah hian YMA Chhang Member mi 100 chuang telin Zuk leh hmuam leh ruih-theih thil chi hrang hrang that loh dan te leh tih ve chhin a pawi theih dan te, Zirna kawnga naupangte hriat tur thil pawimawh hrang hrangte leh Nundan mawi te inzirtir a nih bakah Faina kawnga hmalak dan tur hrang hrangte inzirtir a ni bawk.

Nimin khan Mizoram-ah ASF vanga Vawk thi 45 awm belh lehin Vawk 11 suat leh a ni a, heng te nen hian kumin chhungin Mizoram-ah ASF vanga Vawk thi 961 awm tawhin Vawk 1315 suat a ni tawh bawk a ni. Serchhip District-a Khumtung khua ah nimin khan Vawk 9 suat niin Chhingchhip khua ah Vawk 2 suat a ni bawk a, Keitum khuaa Vawk thi chu RAT hmanga enfiah niin ASF hri kai nia rinhlelh a ni a, enfiah leh tur a ni ang.

Aizawl Traffic Police te chuan kumin January thla atanga April thla tawp thleng khan Dan zawm lo lirthei 3168 an man tawh a, heng mite pawisa chawi tlingkhawm chu Rs. 21,88,400/- tlingin dan zawm lo man zingah hian lirthei dahna hmun ni lo-a dah chu a tam ber a ni a, Aizawl khawpui-ah AMC in lirthei dah phalna hmun a siam ni lo-a dah te chu man thin a nih thu an sawi bawk.

Mizoram Journalist Association (MJA), Kolasib District member te chuan nimin khan Kolasib khawpui bawlhhlawh lakkawm sawng-bawlna hmun, Solid Waste Management Centre, Dihmuntlang, Bairabi Road-a mi chu an tlawh a, he bawlhhlawh sawngbawlna hian ngaihsak a hlawh tawk lo nia an hriat thu sawiin, Management a fel tawk loh avangin Dumping Ground leh a chhehvelah bawlhhlawh chhunkhawm a tam hle niin an sawi a. Helai hmun an tlawh lai hian bawlhhlawh hi Dumping Ground-ah a khat deuh vek nia sawiin, bawlhhlawh thliarhranna tur- Waste Resource Centre-a bawlhhlawh an thliar-hranna pawhin duhthu a sam lovin, Waste Resource Centre chhehvel ah pawh hian bawlhhlawh paih a tam hle niin an sawi bawk.

Champhai Police-te chuan Champhai DC Multipurpose Hall atanga kuhva rah ro man tawh rukchhuah tum mi pasarih an man. Champhai Police-te hian kar hmasa Inrinni tlai khan Champhai SDO (Sadar) hnen atanga FIR dawngin, DC Multipurpose Hall, Keifangtlang-a kuhva rah ro man sa an dahkhawm chu mi thenkhatin an lak chhuah thu leh ruk tura an chhawpchhuah nia hriat bag 21 hmuhchhuah a nih thu a thlen a, hemi an bawhzuinaah hian kuhva rah ro rukchhuah tumtu mi 6- Laltharzuala, Albert Lalduhzuala, Laltha-kima, Tlanglianthanga, Lalhriatthara, Lalrindika leh K. Vanneia te chu DC Multipurpose Hall-ah hian kuhva rah ro an la chhuak leh tur an man a ni. Heng kuhva rah ro te hi Champhai Bawrhsap hlui Maria CT. Zuali hunlaia man tawh kha nia hriat a ni a, pawikhawihtu-a puhte hi thubuai siam sak nghal an ni.

Mizoram Football Association (MFA) chuan nimin khan Aijal Club-ah General Body Meeting an nei a, he hunah hian District 11 atangin DFA aiawhte telin an hmalakna hrang hrangte an tarlan bakah Season thar thar lo awm tura an hmalakna turte pawh an thlirho nghal bawk a ni. He hunah hian MFA President kalchhuak tur Lal Thanzara chuan President a nih chhunga an hmalakna hrang hrangte tarlangin, heng hlawhtlinna an chan hrang hrangah te lawmthu a sawi bawk a ni. MFA General Body Meeting-ah hian kum 2024-2028 chhunga an hruaitu tur thlang nghalin President-ah Honorary Secretary nilai Lalnghinglova Hmar chu thlantlin a ni bawk.

Mizo Students’ Union (MSU) Hqrs. Chawngte chuan Kamalanagar Higher Secondary School-a Education Lecturer chu September ni 1, 2023 khan a pension tawh thu leh sawrkar in a aiawh tur a dah mai loh avangin a mimal thahnem ngaihna in hlawh pawh phut miah lovin HSSLC exam hma zawng a thawk char char tih sawiin, an lawm hle tih an sawi a. Economics Lecturer pawh taksa lama harsatna a neih avangin October ni 1, 2023 khan Govt. Zemabawk Higher Secondary School, Aizawl ah transfer niin a aiawh dah a ni lo bawk tih an sawi a. Education leh Economics-a Lecturer an neih loh avang hian zirlai ten harsatna an tawk nasa em em tih MSU Hqrs. Chawngte chuan sawiin, an result pawhin a tawrh phah niin an sawi a. Hei vang hian June 4, 2024 ralhma ngeiin Education leh Economics Lecturer dah tura sawrkar chu ngenin, an ngennate tih hlawhtlin a nih loh chuan MBSE in School tan hun tur a a ruat, June 5, 2024-ah Kamalanagar Higher Secondary School zirlaite chuan School tan ve loh mai nise an ti.

Sakawrhmuituai tlang-a Skywalk leh Chaltlang - Durtlang inkara Ropeway siam chungchang chu Anti-Corruption Bureau (ACB)-in an la chhui mek.

Myanmar ramchhung Chin State hmar lam Tonzang leh Cikha khua a Myanmar sipai Hmunpui te Chin National Army (CNA) leh an thawhpui PDF pawl hrang hrangin an lak hnua indona kal zelah Mizoram-ah raltlan an la pun belh zel.

Lok Sabha Inthlanpui neih a State pawn lama venhimna hna thawk tura kal Mizoram Police 1,047 te chuan vote an thlak ve thei dawn lo tih a chiang tawh.

Mizo Zirlai Pawl (MZP) General Hqrs. chuan High School Leaving Certificate (HSLC) Examination 2024-a Top 10-a Mizo tlingte chawimawina hun nimin khan Aizawl Vanapa Hall-ah an buatsaih a, Minister Prof. Lalnilawma chuan he hun hi khuallian niin a hmanpui a ni.

Lok Sabha Inthlanpui a Serchhip District-a Vote tla te chhiar turin ruahmanna siam fel a ni tawh a, karleh lamah Vote chhiar turte tana Training pawh buatsaih a ni ang.

Serchhip District chhunga African Swine Fever (ASF) hri lenna khaw pahnih ah nimin khan Vawk thi chhinchhiah thar awm lovin niminpiah ah Vawk thi hi chhinchhiah thar a awm loh bawk avangin ni hnih (2) chhung ASF vanga Vawk thi an awm lo ta a. Hetihlai hian Chhingchhip-ah nimin khan Vawk 7 suat niin Khumtung khua ah Vawk 8 suat a ni leh bawk a ni.

Lok Sabha Inthlanpui felfai tak a awm theih nan Election Commission in thupek a lo siam tawh angin Serchhip District Magistrate David Lalthantluanga chuan Section 144 CrPC 1973-in thuneihna a pek hmangin Election puan a nih hnua Silai kenchhuah khapna thupek a siam leh a, he thupek hian Dan kengkawhtu Sipai leh Police te huam lovin he thupek hian Order tihchhuah a nih atanga vote chhiar zawh chawlhkar khat chhung a huam dawn a ni. He thupek zawm lo te chu Section 188 IPC hmanga hrem an ni ang.

Nimin May 22, 2024 khan ‘Public Library Day’ lawmna atan Mizoram State Library, Art & Culture Department chuan Aizawl-a Millennium Center tual-ah Library Membership cum Awareness Drive an nei a, he hunah hian Library-a lehkhabu thenkhat phochhuakin, a duh apiang tana hawh theih leh chhiar theih tura siam a ni bawk. Kum 2015 khan Raja Ram Mohan Roy Library Foundation (RRRLF) chuan Raja Ram Mohan Roy-a piancham May ni 22 hi Public Library Day atan a puang a, he ni pual hian Mizoram Public Library hrang hrangte chuan hun an buatsaih a ni.

Nimin khan Kolasib-ah District Level Coordination Committee on Africa Swine Fever chu thukhawmin ASF laka an District a him theih dan turte sawiho a ni a. He huna tarlan a nih danin Nov. 30, 2024 thleng khan Kolasib District-ah ASF vanga Vawk thi 2575 a awm tawh thu leh kumin chhungin ASF hri vangin Kolasib District chhung ah vawk thi an la hmuh loh thu tarlan a ni a. Amaherawh chu Mizoram chhung khaw hrang hrangah he hri hi a darh mek avangin fimkhur tak a hmalak ran a tul thu he hunah hian tarlan a ni bawk.

Mizoram sawrkar-a Information & Public Relation Department leh Mizoram Film Forum (MFF) tangkawp buatsaih ni 5 chhung awh tur ‘Acting Training’ chu nimin khan Aizawl-a I&PR Auditorium-ah neih tan a ni a, he hunah hian lem-chan lama tui mi 31 telin Mizo Lemchan huanga mi hlun tak tak ten an tawiawm bawk a ni. He hunah hian MFF hmalakna hrang hrang tarlan a nih bakah Lemchan puitling nihphung leh Lem-chang mite hriattur pawimawh tarlan niin Vawiin hian Training hi chhunzawm leh a ni ang.