Lenkawl

Nimin atang khan District Blindness Control Society leh Eye Care Hospital, Aizawl te tangkawp buatsaihin East Lungdar PHC-ah Cataract Operation/Free Eye Camp neih a ni a, nimin tlai dar 3:00 thleng khan mi 100 vel zet an Mit enfiah sak an ni. He hunah hian Serchhip, Ngentiang, Khawlailung, N. Vanlaiphai leh E. Lungdar bial-a Mit naute paw (Cataract) zai ngai hmuhchhuah tawh sa te pawh zai nghal an ni dawn a, nimin khan mi 16 zai hman niin Vawiin leh naktuk-ah chhunzawm leh a ni ang. He hun hmang tur hian Aizawl atangin National Programme for Control of Blindness (NPCB) State Programe Officer Dr. Lalbiaksiami hovin mi 10 zet an kal bawk a ni.

Nimin atang khan pawl 10 zirlai ten High School Leaving Certificate (HSLC) Exam nei tanin Vawiin hian pawl 12 zirlai ten Higher Secondary Sdchool Leaving Certificate (HSSLC) Exam an nei tan bawk ang.

Serchhip Town Development Committee (STDC) chu nimin khan thukhawmin Serchhip khawpui chhunga hmalakna tur hrang hrangte an ngaihtuah.

Serchhip-a awm 23 Sector Assam Rifles hnuaia 42 Bn. te chuan nimin atang khan ni 15 chhung awh tur ‘Brain Break Extra Co-Curricular Activities Camp’ chu Serchhip-a Assam Rifles Public School-ah an nei tan a, he hun hi zirlai ten School-a an thil zir piah lamah anmahni tana tangkai thil chi hrang hrang an zir theihna atana ruahman niin Art & Craft, Karate & Yoga, Music & Instrument, Vocational Training hrang hrang neihpui an ni dawn a, a ni khatna, nimin khan naupaang 60 zet an inziaklut a ni.

College of Horticulture, CAU Thenzawl-a B.Sc (Horti) Final year zirlai titha thlanchhuah mi pahnih, Nyari Taku (Arunachal Pradesh) leh Lijanbeni Ovung (Nagaland) te chu thla khat chhung awh tur Thailand-a Queen Sirikit Botanic Garden, Chiang Mai-a Workshop on 'Entrepreneurship opportunities in Agriculture and related aspects' (under IDP, NAHEP) neih turah kal tura thlan an ni a, nimin khan Horticulture College, Thenzawl Vengthar atangin Dean Dr. Shri Dhar chuan a vailiam a ni.

Govt. Serchhip College-a Principal mawh-phurhna la mektu K. Laldinpuii chu Pension in a chhuak ve dawn ta a, Vawiin hian a thawhpui ten a thlahna hun an hmang ang. Govt. Serchhip College Principal mawhphurhna la tur hian H. Zonuntluanga, Associate Professor (Political Science) chu ruat niin Vawiin hian mawhphurhna an inhlan nghal dawn a ni.

Mizoram Legislative Assembly Budget Session neih mek chu ruahman lawk ang chuan Vawiin hian zawhfel a ni dawn a, ruahman lawk sa ang chuan Vawiin thutkhawm hun hmasa lamah zawhna leh chhanna hun hmangin hemi hnu hian Chief Minister Zoramthanga bakah C. Lalrin-sanga leh Robert Romawia Royte te Department chan enkawlna tura sum ruahman te sawiho a ni anga, thutkhawm hi zawhfel nghal a ni ang.

Japan International Cooperation Agency (JICA) tanpuinaa cheng vbc. 700 senga din tur Mizoram State Super-Speciality Cancer and Research Centre atana loan agreement chu nimin khan New Delhi-ah India sawrkar leh Japan sawrkar te’n Ministry of Finance, North Block, New Delhi-ah an ziakfel a. Health Minister Dr. R. Lalthangliana chuan, “JICA Project buaipui hi thil khirhkhan leh hautak tak a ni a, Health, Home, External Affairs, DoNER leh Finance Ministry te, NITI Aayog te a paltlang vek a. Ministry leh department hrang hrangte a zawhkual hnua hlawhtlinna kan han hmu thei hi a lawmawmin Mizoram tan thil chhinchhiah tlak a ni,” a ti.

Mizoram tharchhuah Hmarcha MT 7.5 chu USA-ah thawn a ni dawn a, chumi atana buaipui ngai awm te buaipui fel a ni tawh. Nimin a Assembly Budget Session-ah Agriculture Minister C. Lalrinsanga tarlan danin, US atangin Mizoram-a Hmarcha thar te lei an duh a, Organic a nih leh nih loh chian a ngai a, chumi tur chuan Bangalore-ah sample la in test a ni a. Kar hmasa khan test result chhuakin, Orgranic a tling tih hmuh a ni a, reilote ah tuna Lunglei a dahkhawl sa MT 7.5 te chu USA a thawn turin vailiam theih beisei a ni. Minister chuan, “Kan hma hun kal zel turah USA a thawn tura kan peih theih hi thil lawmawm tak a ni,” a ti bawk.

Kumin April thla atanga NFSA hnuaia hamthatna dawngtute hnena sem tura ruahman ‘Fortified Rice’ chu buhfai her dip leh mihring tana chakna, Iron, Folic acid leh Vitamin B12 te chawhpawlh hnua buhfai ang thei ber tura khawl hmanga siamchhuah a nih thu Supply Minister K. Lalrinliana chuan Assembly Budget Session neih mekah zawhna chhangin a sawi a, Fortified Rice hi chaw hrisel zawk leh chakna tam zawk hmuh theih nana siam a ni a, buhfai dang chhum mai tawh turah zaa 1 telh thin a ni, a ti a. Nikum June thla atang khan Mamit District-a NFSA beneficiary te hnenah sem a lo ni tawh tih Minister chuan a sawi bawk.

Hnahthial District chhunga Tuipui 'D' khawtlang chuan an khaw mi H.Chungnunga (91) vanduaina tawh chungchangah lungawilohna leh hetiang thil thleng nawn tawhlo se an duh thu au chhuahpuiin nimin khan an khua ah kawng an zawh a. Zirtawpni kalta zing khan mahni-a khawsa H. Chungnunga hi a chenna In-a Mut pindan ah hliam na tak tuara thi chhawnga hmuh niin Hnahthial District Hospital panpui a nih hnuah Inrinni zing khan a hliam tuar lovin a boral zui a. A tukkhum-ah hliam na tak tuarin amah beitu hian a rawn zui nghal ni ngeia hriat a ni.

Govt. Mizoram Law College (GMLC) Students Bar Council chuan an building January 4, 2022-a zawh hman tura tih Vawiin thlenga zawh a la ni lo chu hriatthiam harsa an tih thu leh building sak lai chu a sak a chhiat avanga leh an hmanraw hman te a that tawk loh avangin chhunzawm chi-ah an ngaih loh thu an sawi.

Sawrkar laipui-a Minister of State for Tribal Affairs Renuka Singh Saruta-i chuan zan khat riak turin nimin khan Mizoram a rawn thleng.

Mizoram Governor Hari Babu Kambham-pati chuan Ek Bharat Shreshtha Bharat North East Yuva Sangam (EBSB North East Yuva Sangam) program-a tel tur NIT Mizoram leh Govt. Aizawl North College-a zirlai 25 leh Zirtirtu 4 te chu nimin zing khan Aizawl atangin a vailiam.

Lai Students’ Association (LSA) General Headquarters Lawngtlai chuan District Council & Minority Affairs Department changtu Minister R. Lalzirliana chu Assembly House-a a thu sawi chungchangah ngaihdam dil tur an phut thu an sawi.

Agriculture Minister C. Lalrinsanga'n SEDP hnuaia Vaimim chintir atangin MT 19,085 tharchhuah a ni tih House hrilhin, chhunzawm zel tlakah an ngai tih a sawi.

Nimin-a Mizoram Legislative Assembly thutkhawm ah Dampa bialtu MLA Lalrintluanga Sailo leh Serchhip bialtu MLA Lalduhoma te chu Chief Minister Zoramthanga thubuai neih leh neih loh ah inhnialin, Home Minister Lalchamliana chuan, Home Department ngaihdan ah chuan Chief Minister hian thubuai a nei lo niin a sawi.

Chekawn leh Artahkawn inkar kawngpui siam hna chu thawh mek niin Inrinni khan Tuichangral VC Association hruaitute chuan he hna thawh mek hi a hmunah an enfiah.

Thenzawl-a Integrated AYUSH Hospital chu Inrinni zing khan Health Minister Dr. R. Lalthangliana chuan tlawhin an dinhmun leh an mamawh te a enfiah.

Mizoram UPC hnuaia thalai pawl, Pentecostal Youth Department (PYD) Serchhip Bial Conference vawi 28-na chu nimin Pathianni hmang khan Elim Kohhran Biak In, Serchhip Darnam Veng-ah neih a ni a, he Conference hi Zirtawpni zan atang khan neih niin Report ngaihthlak a ni a, Inrinni khan Rorel Inkhawm neih a ni bawk.

Serchhip District Bawrhsap Nazuk Kumar IAS chuan kangmei a lo chhuah palh thuta kan tihtur leh tih loh turte chiang taka mitinin naupang chena kan hriat a tul thu a sawi.

Mizoram Journalist Association (MJA) Serchhip District Annual Conference vawi 23-na chu Zirtawpni khan Serchhip Press Club-ah neih niin I&PR Deputy Director leh Serchhip DIPRO K. Saitluanga chuan khuallian niin a hmanpui a ni.

Serchhip District a SEDP Pilot Project hnuaia Ar vulhtute tanpuina hnuhnung ber chu Zirtawpni khan sem a ni.

Mizoram Thalai Kristian Pawl (MTKP) in kumin chhunga Pastor Bial hrang hranga TKP ten thisen pek hun tur an ruahman angin Serchhip Pastor Bial TKP te chuan Inrinni khan Serchhip District Hospital Blood Bank-a dah turin thisen Unit 22 an pe a, thisen petute hi mipa 16 leh hmeichhia 6 niin Serchhip Blood bank-ah kalin thisen hi an pe a ni.

Mizoram chuan Power Bill ba cheng vbc. 53.51 a nei mek. Assembly Session neih mekah MLA-te zawhna ziaka chhangin Power & Electricity Department changtu Minister R. Lalzirliana chuan chawhrualin kum khat chhunga Power leina atana sen zat chu cheng vbc. 410 vel a ni tih a sawi a. Hetihlai hian kum khat chhunga consumer-te bill atanga pawisa hmuh chu chawhrualin vbc. 268.39 a ni tih a sawi. Power Minister chuan kum 2021-22 chhunga State pawn atanga Power lei zat chu 614.58 MU a ni tih sawiin, hemi kum veka Mizoram in Power a siamchhuah (gross generation) zat chu 30 MU a ni tih a sawi bawk.

Chief Minister Zoramthanga chuan NEDP atanga sum hmuh cheng vbc. 7 hmanga sak, Zarkawt Community Hall chu Inrinni khan a hawng a, sawrkar hmasain a sakna tur sum ruahmana bul a lo tan tawh Community Hall changtlung tak hawn a ni ta chu lawmawm a tih thu sawiin, khawtlang tana tangkai tak a nih ngei a duhsak thu a sawi bawk.

Mizoram-ah Sangha chi tha neih a nih theih nan Sanghapui khawi turin sawrkarin hma an la mek tih Fisheries Minister K. Lalrinliana’n a sawi.

Home Minister Lalchamliana’n thenawm ram atanga sahimna zawnga Mizoram-a rawn raltlante sawrkarin theihtawpa lo enkawl a tum thu sawiin, sawrkar pachhe tak an nih avangin tih theih erawh a tam lo hle niin a sawi.

March 1, 2023 atangin Mizoram-ah Satel Helmet khum phal a ni tawh dawn lo a, Helmet chungchangah khauh lehzuala dan lekkawh tur niin a hremna pawh a na dawn.

Zirtawpni kalta-a Assembly thutkhawm ah Private Member‘s Resolution pahnih sawihoin lungrual taka pawm a ni.

Mizoram khawpui Aizawl in kum 133 a tlin lawmna pui ber leh a kharna chu Inrinni khan Aizawl Municipal Corporation (AMC) buatsaihin Aizawl Sipai Lammual-ah ropui taka neih a ni a. ‘Aizawl Day’ hi kumtin February 25-ah lawm tura ruahmanna siam a ni bawk.

Serchhip District Superintendent of Police Stephen Lalrinawma chuan Serchhip District-ah mihring a sumdawnna kaihhnawih (Human Trafficking) thubuai ziahluh a la awm lo tih sawiin, Mizoram pumah kum 2000 hnu lamah thubuai 35 ziahluh a nih tawh thu a sawi.

Mizoram sawrkar in Dan hnuaia Grape Wine zawrh a phal hnuah Serchhip District-a phalna a pek te chuan Grape atang siam Wine an zuarchhuak tan ta.

Sum leh pai kaihhnawih ah Digital hmanga indawrtawnna chungchang inzirtirna leh Serchhip District huap Campaign hawnna chu nimin khan Keitum khua ah neih a ni.

Keitum Branch YMA ten an huamchhung a chhungkaw pakhat chenna In an sak sak chu nimin khan luah theih tura peihfel a ni.

Mizoram Legislative Assembly thutkhawm ah nimin khan Minister Dr. R. Lalthangliana, R. Lalzirliana leh TJ. Lalnuntluanga-te Department enkawlna tur sum ruahman chu sawiho a nih hnuah pawm a ni a. Vawiin hian thutkhawm chhunzawm lehin zawhna leh chhanna hun hman a nih hnuah Minister demand sawiho lo in Private Member Resolution sawiho a ni ang.

Sesawng Field Veng Branch YMA te chuan an thudawn bawhzuiin nimin khan Tuirini lui kam ah Kuhva ro phur lirthei 2 an man a, heng Kuhvaro te hi TATA 207 Truck leh Isuzu SML Medium Truck hmanga phurh niin Motor khalhtu te hian Kuhva ro hi Dawnnovi, Aizawl Dinthar Veng ta niin an sawi a, Kohvaro leh Motor te hi Seling Police kutah hlan nghal an ni.

Fostering Climate Resilient Upland Farming System in the North-East (FOCUS) kaltlangin nimin khan Champhai District-a Leisenzo khuaa Farmer Interest Group (FIG) te hnenah District Bawrhsap ames Lalrinchhana chuan Alu chi semin Alu chin dan zirhona neih a ni a. He hunah hian FIG 10 hnuaia chhungkua 129 te hnenah Alu chi hi sem niin, a vaiin quintal 75 (bag 170) vel semchhuah a ni a, ruahman dan chuan February-March thla chho hian chin tur a ni ang. Tun dinhmunah Champhai District chhunga khua 60-ah FOCUS hnuaia inziaklut FIG 629 an awm mek a ni.

Mizoram Primary Teachers' Association (MPTA) chuan nimin khan Aizawl-a Synod Conference Centre-ah Councillor Meeting vawi 38-na neiin Primary School Text Book chu Mizo-ram leh Hnam mila siam ni rawh se tiin an rel a, NEP 2020 in ruahmanna a siam anga Primary School-ah Balvatika leh Class V te Primary School-ah dah tawh an duh thu te, Headmaster Separate scale, UG Headmaster Pay Condonation leh Headmaster Group B Gazzetted Status sawrkar in tih hlawhtlin sak se an duh thu te an sawi bawk.

Higher & Technical Education Minister Dr. R. Lalthangliana chuan MZU Southern Campus Lunglei-a Class tan har chhan chu Campus sakna tur DPR approval sawrkar laipui atanga hmuh ala nih loh vang a nih thu nimin khan Assembly House a hrilh a, MZU Southern Campus din turah Temporary Campus atana hman tur Pukpui ram a Engineering College chei leh buatsaih chu peihfel ala nih loh thu pawh sawiin, Building awm mah se, a panna kawng km 3 a thui siamna bakah Eng leh Tui pekna atan vbc. 10 aia tlem lo a la ngaih thu leh hetiang zat thehchhuah hi State sawrkar tan a harsat thu a sawi bawk.

Tun thla ni 18 zing dar 2:50 vela Aizawl Republic Veng-a SBI ATM Gelatine hmanga beitu nia hriat Emmanuel Lalbiakzauva (24), Mamit District chhunga Bawngthah khua, Aizawl Ramhlun North a khawsa mek nia insawi chu niminpiah khan Police ten an man.

 PC Party President Vanlalruata chuan Chief Minister Office (CMO) inrelbawlna hautak lutuk chu veiawm a tih thu sawiin, Minister 11 dang te inenkawlna aiin a hautak zawk niin a sawi.

ZPM Thalaite chuan Assembly Speaker chu Inquiry Commission din tura an phut thu an sawi.

Rubber Board of India Executive Director Dr. KN. Raghavan leh a thawhpuite chuan nimin zing khan Chief Minister Zoramthanga chu kawmin Mizoram-a Rubber chin kalpui mek chungchang an sawipui.

Chief Minister Zoramthanga'n Sawrkar Flagship Programme, SEDP kalpui mekah tum khata cheng nuai 3 sem nghal mai a rem loh avangin kum khatah chhungkaw pakhat tan Rs. 50,000 a kalpui phawt a ni tih a sawi.

Scouts & Guides Movement bultantu Lord Robert Baden-Powell leh a nupui Lady Olave Baden-Powell te pianchampha puala Scouts & Guides ten an hman thin ‘World Thinking Day’ chu nimin Feb. 22, 2023 khan hman leh niin Serchhip District Bharat Scouts & Guides te pawhin he ni pual hian hun an hmang a ni.

Nimin khan Govt. Serchhip College-ah Consumer Club din niin hruaitu tur pawh inruat nghal a ni.

Serchhip District Local Administration Officer (DLAO) chuan tunhnai khan Serchhip District-a VC hrang hrangte hnenah lehkha thawnin State Level Sub-Committee on Fire Prevention chuan March 15, 2023 aia tlai lo ah Lo leh huan hal tur nei ten hal vek nise tia a rel thu leh he thupek ang hian Serchhip District-ah pawh March 15, 2023 hmain lo leh huan neitu ten hal vek tur a ni tih a tarlang a. Thupek bawhchhiate chungah Dan anga action lak a nih dawn thu leh a enkawltu Village Council te pawh an chungah Dan lekkawh theih a ni ang tih a tarlang tel bawk.

Serchhip District chhunga awm Thenzawl a Police Training Centre-ah kum 4 chhungin mi 1677 te an training tawh a, tunah hian mi 271 an Training mek bawk a ni.

East Lungdar Village Council/Court chuan Mizoram sawrkarin tunhnaia Block Agriculture Office E. Lungdar-a a dah chungchangah thudik tawklo leh thu belhchian dawllo vawrhdarh a ni chu pawi an tih thu an sawi.

Mizoram Sawrkar Department hrang hrang hnuaia Centrally Sponsored Scheme (CSS) Employees hruaitute chu nimin khan Aizawl-ah inhmukhawm in harsatna an tawh leh hmalak dan turte an sawiho a, CSS hnuaia Employees zawng zawngte hamthatna tur buaipui tur Coordination Committee din an remtih anga dinin hruaitu tur pawh an in ruat nghal bawk.

Sawrkar laipui-a Rubber Board Executive Director Dr. KN. Raghavan chuan Mizoram in hlawk zawka Rubber a chin theih nan kawng hrang hrangin hma an lak thu nimin-a Aizawl Press Club-a thuthar thehdarhtute a kawmna ah a sawi a, Mizoram-ah ram hactare 4,520-ah mi 450-in Rubber an chin mek thu leh kumin ah hactare 1600 enfiah a nih thu a sawi bawk.

Mizoram Legislative Assembly thutkhawm nimin-a chhunzawm-ah Minister ten an Department enkawlna tura sum an ruahman chu sawihona neih tan a ni a, nimin khan Cabinet Minister 3, K. Lalrinliana, Lalchhandama Ralte leh Er. Lalrinawma te Department enkawlna tur sum ruahman te sawiho a ni a, Vawiin hian Dr. R. Lalthangliana, R. Lalzirliana leh TJ. Lalnuntluanga-te sum ruahman sawiho leh a ni ang.

Mizoram University-a Department of Food Technology leh Hnahlan Grape Farming & Processing Co-operative Society chuan nimin khan thawhhona thuthlung an ziak a. He thu-thlung hnuaiah hian Grape chin leh sawngbawl chungchangah changtlung zawka hmalakna neih anih theih dan te ngaihtuah a ni ang. He thawh-hona thuthlung hi Mizoram University Registrar, Prof. Lalnundanga leh Hnahlan Grape Farming & Processing Co-operative Society-a Chairman te'n an ziak a ni.

Chiahpuam sum hmuhlet leh (recovery) Rs. 7,30,51,853 chu SBI, Aizawl Branch-ah dah niin engtia kalpui zel nge tih ah Court thubuai kal lai a nih vangin Judgement Order nghah mek a ni.

Mizoram-a a vawikhatna atan nimin khan Zoram Medical College-ah Phir, an taksa inzawm (conjoined twins) chu hlawhtling taka zai hran an ni.

Mizoram sawrkarin IT Skill Development & Training Centre pasarih (7) din a tum tih Information & Communication Technology (ICT) Minister Robert Romawia Royte chuan Assembly House a hrilh.

MNF Party chuan Mizoram rorelna In sang berah Opposition Group Leader Lalduhoma’n thu diklo a sawi ngei tih hailan a ni chu zahthlak an tih thu an sawi.

Assembly Session neih meka Sports Minister Robert Romawia Royte leh ZPM Member Lalduhoma ten thu inchuh an neih chungchang ah Speaker Lalrinliana Sailo chuan Assembly Official te hmuh danin, Sports Minister Robert Romawia Royte-in thudik a sawi zawk tih a puang.

Nikum November thla hnu lamah Lawngtlai District-ah Bangladesh atanga raltlan rawn lut mi 541 an awm tawh a, heng mite hi Relief Camp 8-ah dah mek an ni.

Rural Development Minister Lalruatkima'n PMAY (Gramin) hnuaia In sak tanpuina First Installment dawng tawhte chu sawrkar laipui atanga sum dawn mil leh State Treasury-in sum a pekchhuah ang zela pek chhunzawm an nih tur thu Assembly House a hrilh.

Chief Ministe Zoramthanga chuan Health Care Scheme chu tlin lo chung chungin kalpui a ni tih nimin-a Assembly Inkhawm ah sawiin, Asian Development Bank atangin cheng vbc. 1000 puk theih an inbeisei a, kumin budget-ah cheng nuai 60 dah a ni bawk a; harsatna tinreng karah mipuite tana hamthatna a awm theih nan theihtawp chhuah a ni, a ti a. Mizoram chu India State zinga leiba nei tlem ber dawttu a nih thu pawh a sawi bawk.

Serchhip Dinthar Branch YMA-a Nung-cha Humhalh Committee te chuan niminpiah khan hnatlang neiin Sesah lui hnar-a an ramngaw humhalh-ah Sava bu siamchawp engemaw zat an dah a. Serchhip Dinthar Branch YMA hian Serchhip khawpui chhunga awm Sesah lui hum-halh hna hi hun engemaw chen lo thawk tawhin ramngaw chhunga thing leh Mau te lak an khap bakah Nungcha awm reng reng eng hmanrua mahin man an phal lo a. Sava te an lo inthlahpun theihna tur atan Rua atanga siam Sava Bu te chu Sesah hnar huamchhunga thingkung ah dahin, kawng hrang hranga hmalak chhunzawm zel an tum thu an sawi bawk.

North Vanlaiphai khua atanga Block Agriculture Officer (BAO) Office sawnchhuah tum duhloh lantirna atan nimin khan North Vanlaiphai-ah mipui ten kawng an zawh a, BAO Office sawnchhuahna tur Order chu hal a ni bawk.

Serchhip-a awm 42 Battalion Assam Rifles hotute chuan nimin khan MJA Serchhip District te chu leng-ah sawmin Assam Rifles leh khawtual mi ten thawhhona tha zawk an neih theih dan tur hrang hrang an sawiho a. Mizo thalai tam zawk Sipai-ah an luh theihna tura thawhho dan tur ruahmanna an siam bawk.

MNF Serchhip East Block chuan Chief Minister Zoramthanga chu Mizoram min hruai zel tura an rintawk thu an sawi.

Nimin February 21, 2023 kha ‘International Mother Language Day’ niin Govt. Serchhip College Seminar Hall-ah he ni pual hian hun hman a ni.

Mizoram Upa Pawl (MUP) Thenzawl Area chuan District Demand Committee din an rel.

Nimin khan Kolasib DC Conference Hall ah ruihhlo dona sawt zawka kalpui a nih theih nan dan hnuaia hmalak dan inzirtirna, Legal Awareness neih a ni a, he hun hi Kolasib DC John LT. Sanga chuan kaihruaiin Fast Track Court-a Judge Julie Lalrinzami leh CJM Cacy Malsawm-tluangi Ralte ten zirtirna an pe a ni.

Sports Minister Robert Romawia Royte chuan tun sawrkar chhungin PMJVK hnuai atangin Sports Infrastructure tih hmasawnnan Central sawrkar atangin Sanction Approval cheng nuai 42203.67 hmuh a ni tawh tih nimin Assembly thutkhawm ah a sawi a. Mizoram sawrkarin District Sports Complex siam turin hma a lak mek thu pawh a sawi bawk.

Nimin khan Aizawl District Bawrhsap Dr. Lalhriatzuali Ralte hovin Central Jail Joint Visit neih a ni a, Central Jail hi mi 436 tan theihna niin tun dinhmunah tang mi 825 an awm mek a, Central Women Jail  pawh mi 96 tan theihna niin mi 214 an tang mek bawk a, Jail tang zinga tam ber hi ND&PS Act hnuaia thubuai nei an ni.

Mizoram sawrkarin Mizoram Youth Commission (MYC) hnuaia IAS Coaching kalpuina atan Rs. 2,27,52,145 a seng tawh. Assembly Budget Session neih mekah Dr. Vanlalthlana zawhna Labour, Employment, Skill Development & Entrepreneurship Department changtu Minister Lalchhandama Ralte in ziaka a chhan danin, kum 2019 atanga tun thlenga MYC hnuaia IAS Coaching kalpui atana sum sen tawh zat chu Rs. 2,27,52,145 a ni a. MYC Perhkhuang buaipuina atana Rs. 18,37,313 sen ni bawkin, chumi kaltlanga zaithiam contract sign te chu mi 5 an ni a, contract amount chu cheng nuai khat (1) hu a ni.

Chief Minister Zoramthanga chuan Mizo-ram hmun hrang hranga Health Clinic sak chu sawrkarin a enkawlna pawh engemaw chen a tum tih Mizoram Assembly thutkhawm nimin-a neih ah Aizawl West-I bialtu MLA Zothantluanga zawhna chhangin a sawi a. Zawh belhna chhangin Chief Minister Zoramthanga chuan MLA te chu an theih ang anga enkawl chhunzawm ve tura chahinm sawrkar pawhin a theih angin Health Clinic hmasawnnnan hma a lak zel tur thu a sawi a, Thorang Bialtu MLA Zodintluanga Ralte zawhbelhna pawh sawifiahin Chief Minister chuan, Sethawn-a Jordan Centre Electric Bill Rs. 2,02,933 leh tui Bill Rs. 1,78,276 ba chu an hriatloh thu leh pek nghal a nih tur thu House a hrilh bawk.

Mizo hmeichhe Footballer pakhat hliam inenkawlna sum pek chungchang ah Sports Minister leh ZPM Group Leader-te thu a inhmuh loh avangin nimin khan Assembly House-ah an inhnial buai nual a, Speaker remtihna-in thudik haichhuak tura House rorelna enlet tura tih a ni.

Central YMA hruaitute chuan niminpiah khan BSF hotute kawmin Parva-III khua in harsatna an tawh chungchang an sawipui.

Chin National Day vawi 75-na pualin nizan hmasa khan Aizawl Vanapa Hall-ah inkhawm neih niin he hun hi Chief Minister Zoramthanga chuan a hmanpui a ni.

Chief Minister Zoramthanga'n COVID-19 hri leng vanga harsatna thleng chu Sawrkar dang Minister ten mahni intihhlum phahna atan hial an hman a nih avangin sawi nep chi a ni lo tih a sawi.

Chhiahtlang Hmar Veng Branch YMA ten 'Zokhua' an siam thar chu nimin khan Art and Culture Department Director Carol VLMS. Dawngkimi chuan a hawng a. Mizoram hmun hrang hranga Zokhua siam a ni thin chu lawmawm a tih thu sawiin, mipuite pawhin kan ngaihhlut a pawimawh thu a sawi.

Govt. Serchhip College-a Women's Hostel sak thar chu nimin tlai khan Higher & Technical Education Minister Dr. R. Lalthangliana chuan a hawng.

Mizoram in State a hmuh champha, Mizoram State Day vawi 36-na chu nimin khan District khawpui dangte rualin Serchhip-ah pawh a lawmna neih a ni.

Serchhip District Sports Committee hnuaia Sports Association hrang hrangte chuan Mizo-ram Sawrkar in District Sports Committee te kalphung tura a duan chu zawm ve nise an ti.

Prime Minister Narendra Modi-a chuan Mizoram mipuite chu an State nih kum 37-na ah nimin khan duhsakna chibai a buk a, a ram mawina te, taima hnam an nihna leh hnam nunphung leh ziarang an neihte chu mite hriat hlawhna a ni tih sawiin, hun lo kal zelah pawh Mizoram mipuite chu dawmkan zel an ni ang a ti bawk.  Nimin kha Arunachal Pradesh State nih champha ni bawkin Prime Minister hian duhsakna chibai a buk bawk a ni.

Aizawl in March ni 2-a G20 hnuaia B20 Business Meeting/Conference a thlen turah he intawhkhawmna a thupui thlansa mil a Mizoram a sum peipunna kawng hrang hrang awm thei (investment opportunities) chungchanga Department ten presentation an siam te chu nimin khan Chief Minister Zoramthanga hovin CM Office Office Conference Hall-ah thlirho a ni a, Sawrkar atangin presentation 3 leh mimal sumdawng mi 2 ten an presentation an siam a ni.

Mizoram-ah kumin thla khat leh a chanve chhungin ruihhlo (Heroin) vanga thi mi 19 an awm tawh a, nikum 2022 chhunga ruihhlo vanga Mizoram-a thi zat zahve deuhthaw a tling tawh a ni. Excise & Narcotics Department (END) chhinchhiah danin, Mizoram-ah kumin chhungin February ni 16 thleng khan ruihhlo vanga thi mipa 17 leh hmeichhia 2, an vaiin mi 19 an awm tawh a, an vai hian Heroin vanga thi an ni a. Nikum 2022 chhung khan Heroin vanga thi mi 43 an awm a, kumin-ah thla khat leh a chanve vel chauh chhungin nikum-a thi zat zahve deuhthaw an thi tawh a. Kum 1984 atanga chhutin Mizoram-ah ruihhlo vanga thi mi 1736 an awm tawh a, mipa 1,531 leh hmeichhia 205 an ni.

Union Minister of State for Communications Devusinh Jesingbhai Chauhan chuan nimin khan Chief Minister Zoramthanga chu a chenna Bungalow-ah kawmin Mizoram-a Communication dinhmun leh hmalakna chungchangte an sawidun a. Hei bakah hian Mizoram economy hmasawnna leh economy hmasawnna leh Communication hmasawnna chu kalkawp tlat leh ngaihpawimawh ngai tak a nih thu te an sawidun bawk a ni. Union Minister of State Devusinh Jesingbhai Chauhan hian Zirtawpni khan Mizo-ram rawn thlengin Serchhip District a tlawh bakah Postal leh Telecom Service hotute kawmin nimin khan Delhi a pan leh a ni.

Governor Hari Babu Kambhampati chuan nimin chawhnu khan Prime Minister Narendra Modi chu PM Office, South Block, Raisina Hill, New Delhi-ah hmuin Mizorama hmalakna pawi-mawh leh Mizoram State mamawh te leh State dinhmun tlangpui te a sawipui a. Tun kum kal mek a Mizoram chhunga State leh Central Sawrkar hmalakna pawimawh kalpui mek/thawh mek chungchang pawh an sawidun bawk.

Mizoram State Day 36-na chu nimin khan Aizawl-a Vanapa Hall-ah Chief Minister Zoramthanga hovin lawm a ni.

Mizoram sawrkarin Mau chi (Bamboo species) chi thum (3) leiin, a vaia lei zat chu 8,49,425 a ni a, hemi atan hian Rs. 6,48,16,750 sen niin NBM, NEC leh SEDP Fund atanga lei an ni.

Mizoram Kohhran Hruaitute Committee (MKHC) in Mizoram in inthlanpui a hmachhawn turah Political Party te chu a taka tih theih loh tur zuara mipui bumna ang thil tiam lo turin a ngen.

Zomi Cultural Society, Aizawl Joint Committee huaihawtin nimin khan Bawngkawn Chhim Veng Cultural Hall-ah ‘Zomi Namni’ vawi 75-na lawm a ni a, he hun hi Law & Judicial Minister TJ. Lalnuntluanga chuan hmanpuiin Mizoram sawrkar chuan hnam inpumkhatna a ngaih pawi-mawh avangin an sawrkar tirh atangin Mizoram chhehvela kan unaute nena inpawhna tha zawk kan neih theihna turin hma a lak nghal thu a sawi.

Kum 2010-11 atanga kum liamta, 2021-22 chhung a Mizoram buh thar zat chu Metric Ton (MT) 47,201 leh MT 62,089 inkarah a awm a, buh thar zat hi a pung mawh hle. Hetihlai hian Mizoram-ah leilet (WRC) siam theihna hmun Hectare (ha) 74,644 awmin, leileta siam theih tura ngaih la siam loh zau zawng chu ha 57,927 a tling.

Serlui Group YMA chuan Inrinni khan Saiphai-ah Committee neiin Dan lova Myanmar atanga Kuhva ro lo lut thin leh chumi in kuthnathawktute tan harsatna a siam dan chungchang an sawiho a. Tun dinhmunah Bilkhawthlir Kuhva Chingtu Pawl in an kaldan pangngaia dan lova kuhva phurh te man tura Duty la kalpui zel an duh laiin Vairengte in Joint Meeting nei-a sawiho leh an duh thu an sawi thung a. Hetianga ngaihdan inang lo an neih avang hian Kuhvaro-a sum-dawnna chungchang ah sawrkar hmalakna ngaihchan rih phawt nise tiin nikum Dec. 14 a\anga Duty pawh Bilkhwthlir hian an titawp rih a ni.

Chief Minister Zoramthanga chuan Inrinni khan Govt. Serchhip College Administrative Building sakna tur lungphum a phum a. SASCI thar lo awm leh tur hmangin Serchhip-ah PWD Staff Quarters sak a nih dawn thu Chief Minister chuan a sawi bawk.

Serchhip District chu 1st Inter-District Cricket Tournament-ah an Champion zo ta lo.

Serchhip-a rawn zin Union Minister of State for Communication Devusinh Chauhan chuan Inrinni khan Serchhip Kawlri tlang tlawhin Eklavya Model Residential School-a zirlaite a kawm bakah Serchhip-a Agriculture Complex a tlawh bawk.

Vawiin February 20, 2023 hi State dinhmun a Mizoram hlankaina ni champha, Mizoram State Day a ni a, Mizoram District khawpui hrang hrangah he ni lawmna hi neih tura ruahman a ni angin Serchhip-ah pawh Vawiin chawhma dar 11:00 hian Serchhip DC Conference Hall-ah District Bawrhsap Nazuk Kumar IAS hovin hman a ni ang.

School Education Minister Lalchhandama Ralte chuan Samagra hnuaia thawkte dinhmun that lehzual nan sawrkarin ruahmanna tha tak a neih thu Zirtawpni-a Assembly thutkhawm ah a sawi a. FEMSE zawmtute Association 10-a inziaklut zingah hlawh la thei lo an awm loh thu leh a hun taka hlawh lak theih loh erawh a awm thin thu a sawi a. Nikum December atanga hlawh la pek loh pawh February thla hian tun thla hlawh nen pe turin pawisa a awm tawh thu a sawi bawk.

Mizoram-a rawn zin Union Minister of State for Communications Devusinh Chauhan chuan nimin khan Aizawl-a Chief Secretary Conference Hall-ah Department of Telecommunications, Department of Posts leh BSNL hotute chu Mizoram chhunga mipui tana an hnathawh leh rawngbawlna te thlirin Review Meeting a neihpui a. He huna tarlan a nih danin Mizoram-ah Head Post Office 1, Sub Postal Division 4 leh Post Office leh Branch Post Office 387 a awm mek a. DoP tarlan danin Assam tiam lovin Hmarchhak State hrang hranga khaikhinna ah Mizoram-a Post Office te chuan sum an thawkchhuak tha nia sawi a ni.

ZPM Party chuan ZPM Legislature Party Secretary, Dr. Vanlalthlana chuan tun Session ah Private Bill, 'The Mizoram Land Revenue (Amendment) Bill, 2023' a putluh bakah nikum lamah 'The Mizoram Private Transport Workers (Welfare) Bill 2022' a lo pulut tawh bawk nia sawiin, “Eptu member ni chunga a kum zawna Private Bill pulut thei khawpa Dr. Vanlalthlana taimakna hi a fakawm em em a, ZPM chuan kan chhuang takzet a ni,” an ti.

Lawngtlai Bawrhsap David Lalthantluanga chuan lawngtlai khawpui atanga hmarlam, Lawng-tlai District chhunga NH. 54 kawngpui zauh hna thawh mek chu Inrinni khan a hmunah kalin a enfiah a, Hna thawktute chuan kawngpui zauhna tura ram lak tawh chin kawngpui kam-a chenna In awm, In neitute'n an la chhuahsan loh avang leh an la thiah loh avanga hma lak theih lohna engemaw zat a awm thu an sawi a. Bawrhsap chuan Official te, Contractor te, Village Council leh ram neitute nen Joint Verification neia a mal te te-a an dinhmun a hmuna enfiah a, mipui harsatna siam lo zawng leh chak zawka hna kalpui a nih theih nan hma lak nise a ti bawk.

North Eastern Council (NEC) sum cheng Nuai 1403.4 senga sak tur Lunglei Market & Trade Centre Lungphum chu Inrinni khan Commerce & Industries Minister Dr. R. Lalthang-liana’n a phum a, he Project hi nikum chhunga NEC-in project an sanction zingah a lian ber niin Stall 339, Motor 30 lenna Car Parking, Two wheeler 71 lenna Parking, Police Beat Post, Market Office, Toilet 34 te bakah Godown, Bawlhhlawh dahkhawmna leh thil pawimawh dang te awm tura ruahman a ni.

Aizawl Republic Veng-a State Bank of India (SBI) ATM Booth chu Zirtawpni zan khan bomb hmanga beih niin ATM Booth beitute chanchin hrilh thei hnenah Mizoram Police te chuan Rs. 20,000/- thleng pek an tiam.

OSD to Chief Minister Rosangzuala Office enkawlna, zin veivahna leh thil dangah te Rs. 21,59,197 hman a ni.

Mizoram sawrkar chhinchhiah danin, January ni 27, 2023 thleng khan Mizoram-ah raltlan 31,508 an awm a, chung mite chhawmdawlna chuan Mizoram sawrkarin Rs. 4,14,66,000 a seng tawh.

Air India chu TATA in an lak hnuah Air India chuan March 18, 2023 atangin Lengpui Airport-a an flight neih te an titawp dawn a, tun dinhmun ah Lengpui Airport-a Flight awm te chu Air India, Indigo leh Alliance Air te an ni.

Mizoram tlawha rawn zin Union Minister of State for Communication Devusinh Chauhan Mizoram-in kawng hrang hrangah chak zawka hma a sawn theih nan e-connectivity tihchangtlun a pawimawh hle dawn a ni, a ti.

Mizoram-a Helicopter pahnih service turin Mizoram sawrkarin ruahmanna a siam fel tawh a, Union Home Ministry pawmpuina nghah mek a ni. Hetihlai hian Mizoram sawrkara Aviation Wing chuan Lengpui Airport-a Trolley hman dan tur chungchangah thupek tichhuakin, passenger-te bungraw nawr nan leh Cargo nawr nan tih lohah thil dang engah mah hman phal a ni lo.

Khawpui chhunga Traffic Jam nasa sutkian nana Parking space tam zawk siamna tura sawrkar Flagship Programme, ‘Parking House Support Scheme’ (PAHOSS) hnuaia sum pekchhuah zat chu cheng nuai 1,132.30 a tling tawh a, kalpui chhunzawm zel tum a ni.

Union Minister of State for Communications Devusinh Chauhan chuan zan khat riakin Serchhip a rawn tlawh mek a, nimin chawhnu khan Serchhip-a Sawrkar Department hotute leh tlawmngai pawl hruaitute a kawm bakah Serchhip District Hospital leh Serchhip Post Office te a tlawh bawk.

Serchhip-a Inter-District Cricket Tournament khelh mekah Vawiin hian Serchhip District leh Kolasib District ten Final an khel dawn.

Mizoram Journalists' Association (MJA) Serchhip District in January 26, 2023 zan-a Charity Free Concert an buatsaih atanga an sum hmuh te chu nimin khan Lawngtlai Bawrhsap kutah MJA Lawngtlai District kaltlangin an hlan.

Mizoram Upa Pawl (MUP) Serchhip South Area chuan nimin khan Lalpuithanga Hall-ah Conference vawi 8-na hmangin hruaitu thar thlanna an nei.

Supply Minister K. Lalrinliana chuan Ration Card var neitu te buhfai leina rate tihsan tumna chu sawrkar in a hriatpui tih nimin-a Assembly inkhawm zawhna leh chhanna hunah a sawi a, rate tihsan tumna hi Department rawt a nih thu leh Cabinet in lo en tura a tih angin Deputy Chief Minister kaihhruaiin Committee din a nih thu pawh sawiin, NGO hrang hrang te nen sawihoa ngaihtuah mek a nih thu a sawi bawk. Sawrkar in buhfai kg. khat Rs. 27.50 a a lei chu Ration Card var nei te hnenah hian kg. khat Rs. 15/- in hralhchhuah thin a ni.

Nimin-a Mizoram Legislative Assembly thutkhawm ah Aizawl North-II bialtu MLA, Dr. Vanlalthlana'n Private Member Bill a putluh, The Mizoram Land Revenue (Amendment) Bill, 2023 chu sawiho a nih hnuah Select Committee ngaihtuah tura dah a ni.

Mara Autonomous District Council (MA-DC) hnuaia Village Council inthlanna neih tur atana inbuatsaihna atan nimin khan Draft Electoral Roll tarchhuah a ni a, kumin January ni 1-a kum 18 tling chin te laa Elecoral Roll siamthat hna thawh turah hian thla thar March 17 khian Final Electoral Roll tarchhuah a ni ang. MADC hnuaiah hian Village Council 99 awmin chhungkua 11,968 an awm a, Vote nei thei 42,891 an awm mek a ni.

Tunkar Nilaini zan khan Champhai Police, Assam Rifles leh Forest Department te tang-kawp chuan Zokhawthar-ah dan lova ramdang atanga lakluh Saphai pali leh Green Anaconda pahnih an man a, heng te hi Rosangpuii, Cham-phai Venglaia khawsa ni-a insawi hnen atanga man niin a thurualpui mi 3 - Hanneihkuala Myan-mar, Sankhupmanga Falam leh Lalpeklawma Letpanchaung ni-a inchhal, tuna Zokhawthar-a khawsa mekte chu man nghal an ni. He thil kaihhnawih a man te hi thubuai siam sak an nih hnuah District Court-ah hruaiin nimin khan Jail-ah khung an ni a, ramsa an man te dahna tur hi Court in a ngaihtuah mek a ni.

Nimin khan Kolasib-ah District Bawrhsap John LT. Sanga hovin District Jail-a tang damlo leh boral an awm thulha hmalak dan tur leh Jail tangte hriselna uluk zawka enkawl a nih theih dan tur sawihona neih a ni a. Jail tang tur te chu Jail-a dahluh an nih hma ngeiin an hriselna te uluk tak a endik a tul thu leh Jail an awm chhung pawh a endikna uluk tak a kalpui a pawimawh thu sawilan a ni a, National Human Rights Commission-in kalphung a duan te zawm a pawimawh thu leh heng kalphungte hi thawktute pawhin an hriatchian a tul thu tarlan a ni bawk. Kolasib District Jail-ah hian tang mi 73 awm mekin an zinga 63 chu mipa an ni

Chief Minister Zoramthanga'n MLA bial hming tihdanglam emaw thlak emaw tumna a awm lo tih a sawi. Nimin-a Assembly zawhna leh zawhbelhna dangte a chhanna-ah Chief Minister hian Assembly bial zingah hming vuah dan emaw, ramri then dan fuh tawk lo a awm ni-a hriat a nih avangin party ang chuan thlirho a ni tawh tih a sawi a, inthlan a hnaih tawh avangin sawrkar ang chaun hmalak ala ni rih lo a. A area chungchang pawh sawrkar ang chuan ECI lamah thlen ala nih loh thu a sawi. MLA bial chungchangah hian Party te rilru pawh a inhmu tlang viau nia sawiin, ngaihtuah chhunzawm leh thuai tura hmachhawp a nih thu a sawi bawk.