ATM beitu nia hriat Police ten an man

Tun thla ni 18 zing dar 2:50 vela Aizawl Republic Veng-a SBI ATM Gelatine hmanga beitu nia hriat Emmanuel Lalbiakzauva (24), Mamit District chhunga Bawngthah khua, Aizawl Ramhlun North a khawsa mek nia insawi chu niminpiah khan Police ten an man.

Hemi chungchangah hian Aizawl SP C. Lalruaia chuan nimin khan Aizawl-ah thuthar thehdarhtute kawmin pawikhawihtu man a nih thu hi a puang a, Aizawl SP sawi danin, Republic Veng-a SBI ATM Bomb hmanga beih a nih chungchangah Special Investigation Team (SIT) din niin ngawrh takin hnuchhui hna thawh a ni a. SIT te hnuchhuina kal zelah pawikhawihtu hian a hma a alo chet tawh dan ang chiahin, Saikhama-kawn-a SBI ATM-ah hnuhma a nei tih an hmuchhuak a, Bomb erawh a tipuak lo a. CCTV atanga a chet vel dan an chhuizuina ah Republic Veng-a ATM a pawikhawihtu tho ni ngeiin an hria a, an chhuina kal zelah a chet velna hnuhnung ber chu Ramhlun bawr vel a nih vangin chak takin an umzui a, Ramhlun North-ah chhuiluh niin, niminpiah, February ni 22 khan Bike-a a kalchhuak leh tur chu man a ni.

Hemi hnu hian pawikhawihtu a ni ngei em tih chhuizui nghal ni bawkin, Republic Veng-a pawi a khawih laia a Bike khalh atangte, a thawmhnaw hak atangte leh a hmaikawr atangte in amah ngei a ni tih finfiah a ni a. Republic Veng-a SBI ATM bomb hmanga a beih laia a thawmhnaw hak te hmuhlet niin, a hmaikawr tichhia-a a lo paih tawh pawh hmuhlet a ni a, hmaikawr dang a lo siam leh tawh a. Niminpiah man a nih lai hian Gelatine an man sak tel bawk a, a bike kawl pawh hi Kulikawn atanga a ruk chhuah a ni.

Aizawl SP chuan thu an zawhfiahna atangin pawikhawihtu hian SBI ATM ngawr ngawr a bitum a, Emmanuel Lalbiakzauva hian SBI ah loan a dil a, a hmuh theih loh avangin SBI ATM hi a bitum zui ta nia sawiin, Aizawl SP chuan “Nimin-ah khan man lo i la chuan nizan velah SBI ATM-ah bomb a puak leh ngeiin a rinawm,” a ti bawk.

Comments

Popular News (Last 30 Days)

Serchhip DCSO sawn a ni