Sum leh pai kaihhnawih ah Digital hmanga indawrtawnna chungchang inzirtirna leh Serchhip District huap Campaign hawnna chu nimin khan Keitum khua ah neih a ni.
District Mission Management Unit (DMMU) bultuma Minisitry of Rural Development hnuaia Programme kalpui mek pakhat, National Campaign on Promoting Digital Transactions at Panchayat Level tih hmanga Serchhip District huap Campaign hawnna hi Keitum khuaa BNRGSK Hall-ah neih niin he hun hmanpuitu Serchhip District Rural Development Office (DRDO)-a Project Director leh District Mission Director Malsawmtluanga chuan pawisa fai tel lova thil lei leh hralh leh insumdawn tawnna te lehkha hmang tlem zawnga kal chu India Prime Minister zahawm tak Narendra Modi-a'n a ngaih pawimawh thu sawiin, hun rei tak atang tawhin India ram hmun hrang hrangah kalpui tan a lo nih tawh thu a sawi a. Mipuiten sum leh hun senga Bank a kal kher lova Online Digitals Transtraction hrang hrang hmanga indawr hi a awlsamin a rintlak tih pawh sawiin, Serchhip District chhung khaw hrang hrang nu hote pawhin tangkai taka an hman thiam ve vek theih thil, awlsamna nasa tak min petu tur a nih thu a sawi bawk.
Serchhip-a Asst. Rural Development Officer (ARDO) Stephen Laltlansanga Auhmun kaihhruai he hunah hian Vanlalmuanpuia Bapui, District Functional Specialist, DMMU Serchhip chuan Digital Transtraction awmzia leh nihphung tlangpui sawiin, District chhung khaw hrang hrang atanga SHG member kalkhawmte chu an thil zir theuhte midangte zirtir zel tur leh a hmang uar hmasatu ni turin a fuih a. Mizoram Rural Bank (MRB) Bungtlang Branch-a Manager T. Lalrinchhana hnen atangin Internet & Mobile Banking nihphung leh a hman tangkai dan te, a hmangtute hriat tel tur dan pawimawh te leh Social Assistant hlutna leh thatna awm hrang hrangte ngaihthlak a ni bawk.
Digital Transaction chungchang inzirtirna hi tun thla, February 1, 2023 atanga tanin kumin August ni 15 thleng khian National Rural Livelihood Missions (NRLM) hnuaia khaw thlan bikah te neih tur a ni a. Nimin-a District Level Campaign hawnnaah hian Serchhip leh East Lungdar RD Block huamchhunga Self Help Group (SHG) Members te leh Keitum VC Member te an tel a ni.
Comments
Post a Comment