Serchhip-ah bawlhhlawh tawih thei leh tawih thei lo lakkhawm hun a hranga siam a ni dawn

Serchhip khawpui chhungah bawlhhlawh tawih thei leh tawih thei lo lakhawm turin a hrangin chawlhkar tin Motor tlan tir a ni tawh dawn.
Nimin khan Serchhip DC Meeting Hall-ah Serchhip Town Sanitation Task Force chu thukhawmin Faina kawnga hmasawnna tur leh hmalakna tur hrang hrang an sawiho a, he hunah hian Serchhip khawpui-ah bawlhhlawh tawih thei leh tawih thei lo mipuite thliar tir an nih tawh thu leh amaherawh chu a lakkhawmna kalpui danah leh a sawngbawl zui danah hmalak a la tul dan te tarlan a ni a, he Meeting-a tel te hian bawlhhlawh tawih thei leh tawih thei lo thliarhran lakkhawm dan tur sawihoin, kar khatah tum khat bawlhhlawh tawih thei bik khawn turin bawlhhlawh paih Motor tlantir tawh nise an ti a, tawih theilo lakkhawm ni pawh ni khat dang kalpui a nise an ti bawk. Hei bakah hian bawlhhlawh sawngbawlna hmun thar Chhiahtlang daia buatsaih mek hman tangkai dan turte, Serchhip District Bawrhsap hmalakna a Plastic hersawmna khawl CSR hmanga Serchhip in a neih tawh hman tangkai dan turte pawh sawiho niin chhungkaw tin ten In lama bawlhhlawh tawih thei atanga leitha siamna an neih vek theihna tura Village Council te hmalak dan tur sawiho a ni a, Home Composting hmalakna hi NREGA hmanga thawh theih a ni a, chu chu hman tangkai theih a nih thu tarlan a ni bawk.

Hei bakah hian chhungkaw tinte chu Bazar bag tha tak kenga Bazar thin tura ngen niin thil leitu leh a zuartute pawh Plastic (Polythine) hmang lo tura beisei vek an ni a. Hman phal loh Polythine hmang luite pawh chak zawka dapchhuaha hremna pawh uar deuh nise an ti a. ODF Plus khua ni tura endikna paltlang tura hmalakna turte, Veng tina Plastic dahkhawmna tur siam dan turte leh faina lama hmalakna tur thil pawimawh hrang hrangte rel a ni bawk.

He thutkhawm hi Serchhip District Addl. DC Lalmuansanga Ralte chuan kaihruaiin bawlhhlawh paihna leh tihralna hi khawvel in a buaipui a nih tawh thu sawiin, Serchhip-ah ngei pawh mipui nawlpui te buaipui hmain sawrkar chuan nasa taka a buaipui tawh thu a sawi a. In tin leh chhungkaw tin te hi bawlhhlawh siamchhuaktu kan nih thu sawiin, bawlhhlawh tichhuak tam lo tura kan inzir a tul thu a sawi a, “Mumal leh felfai taka bawlhhlawh sawngbawl hi kan tan chona pawimawh leh tul tak a ni tih kan pawm a hun hle a ni,” a ti bawk.