Union Minister in Kawlri leh Agri. Complex a tlawh

Serchhip-a rawn zin Union Minister of State for Communication Devusinh Chauhan chuan Inrinni khan Serchhip Kawlri tlang tlawhin Eklavya Model Residential School-a zirlaite a kawm bakah Serchhip-a Agriculture Complex a tlawh bawk.

Union Minister Devusinh Chauhan leh a nupuite hian Inrinni zing khan Serchhip Kawlri tlang-a ‘Chawngpuii Khawthlir’ chu tlawhin hemi hnu hian a bul lawka Eklavya Model Residential School chu tlawh lehin zirlai naupangte nen inkawmna an nei a, Kawlri tlang-a Zoluti (Mary Winchester) lakletna hmun hriatrengna tura lungphun pawh a tlawh nghal bawk a ni.

Hemi hnu hian New Serchhip-a Agricultural Complex chu tlawhin Serchhip DAO Tlangtimawia Zote leh a thawhpui ten an lo dawngsawng a, RKVY leh FOCUS tangkawpa din Mini Composite Feed Mill leh National Food Security Mission (Pulses) hnuaia sak Mini Oil Expeller te tlawhin hna an thawhdante a en a, hemi hnu hian DAO Pisa-ah Serchhip District-a Agriculture Department hnathawh dan chi hrang hrang thlalak tarlan te chu a en nghal bawk a ni.