Serchhip District Bharat Scouts & Guides ten Bawrhsap hovin World Thinking Day an hmang

Scouts & Guides Movement bultantu Lord Robert Baden-Powell leh a nupui Lady Olave Baden-Powell te pianchampha puala Scouts & Guides ten an hman thin ‘World Thinking Day’ chu nimin Feb. 22, 2023 khan hman leh niin Serchhip District Bharat Scouts & Guides te pawhin he ni pual hian hun an hmang a ni.

Chawngbuangi Memorial School Serchhip-a ‘World Thinking Day’ hman hi District Bawrhsap leh Bharat Scouts & Guides-a District President Nazuk Kumar chuan hmanpuiin Scouts & Guides hmalakna hian India chauh nilovin khawvel huapin min thlungkhawm a, hnam tinte inzahtawnna te, inhriatthiam tawnna leh thil tha ngaihhlut tur dik chawisang tura thawhhona te min pe tih a sawi a. Tunlai khawvelah pawh khawvel pum huapa harsatna, mitinten rilru hmunkhat pu-a kan hmachhawn tur tam tak a awm zel tih sawiin, khawvel muanawm zawk leh nuam zawk din turin Scout & Guides te hian nasa takin hma a la reng a ni, a ti a. “Khawvel ram tina kan unau kan hmalak ang bawka hma la mek te leh kan hmalak hona hlawkzia leh tangkaiziate hrereng chungin he Thinking Day hi i hmang ang u,” tiin he huna kalkhawmte chu a sawm a ni.


‘World Thinking Day’ puala hun hman ah hian Guide Captain J. Lalbiakmawii kaihhruaiin Scout & Guides Flag pawhparh a nih hnuah Guide Captain R. Lalneihthangi leh Mary Zothanpuii te kaihhruaiin hun hman zui a ni a, Little Flower Convent School, Chawngbuangi Memorial School leh Millenium High School, Chhiahtlang-a Scouts & Guides ten item hmuhnawm tak tak an entir a, District Assistant Commissioner Vanlalnunziri chuan Scouts & Guides dintute nupa chanchin tlangpui a sawi bawk a ni.

World Thinking Day hi 1926 atanga hman niin Scout & Guides din chhuaktu Lord Robert Baden Powell leh a nupui Lady Baden Powell te piancham February ni 22-ah amahni chawimawi nana hmaan thin a ni a. He ni hi Scouts & Guides ten khawvel hmun tina an unaute an rilru-a an hriatchhuahna ni, an hmalakna ten khawvel pumah hna a thawk zel a ni tih hriat tharna ni leh Scouts & Guides hmalakna chunga lawmthu sawina ni atan an hmang thin a. Tunhnaiah Scout leh Girls Guide ten ramdang leh hmun danga chengte nunphung, zia leh nunhlui chanchin inhriatpawhna atan leh inngaihhlut sak tawn nan an hmang uar zual ta a ni.

Comments

Popular News (Last 30 Days)

Serchhip DCSO sawn a ni