State pum huap Financial Literacy Campaign hawng

Sawrkar laipui Ministry of Corporate Affairs hnuaia Investor Education and Protection Fund Authority (IEPFA) leh Mizoram sawrkar Tourism Department tangkawpin an buatsaih ‘State Level Conference on Financial Literacy in Amrit Kaal’ chu nimin khan Aizawl Vanapa Hall-ah neih a ni.

India ram zalenna kum 100 champhaphak thlen hma kum 25 ‘Amrit Kaal’ hmalakna peng pakhat hnuaia he hun hman hi Tourism Minister Robert Romawia Royte chuan khuallian nia hmanpuiin sum leh pai peipunna lam hawi inzirtirna hi Mizoram mipuiten kan mamawh hle tih a sawi a, “Literacy (ziak leh chhiar thiam) ah Mizoram State chu India ramah a ti tha ber pawl a ni a, chutihlai erawh chuan sum leh pai lama thiamna Financial Literacy -ah erawh chuan India ramah a hniam pawl a ni thung a, hei hian Financial Literacy kan mamawhna sanzia a tilang chiang hle a ni,” a ti bawk.

He hunah hian Khual Zahawm Chief Secretary Dr. Renu Sharma pawhin zirna leh hriatzauna kawnga tha leh sum hman chu thil dang zawng aiin a hlawk thu leh hlep a tam ber thu a sawi a. Mizoram chu kawng hrang hrangah a chetha in, Hmarchhak State te zingah Agriculture, Hrticulture, Trade and Commerce-ah te phei chuan a hmahruaitu a ni tih a sawi a, amaherawhchu, Financial Literacy lamah hian hmabak ko tak, kawng thui tak zawh tur kan la nei, a ti bawk.

He hunah hian Tourism Minister Robert Romawia Royte chuan ‘75 Iconic Investor Awareness Programme (IAP) for Mizoram’ chu a hawng a. Mizoram chhung hmun 75 ah Financial Literacy Campaign hi neih chhunzawm tur a ni.