Thu dik tawklo thehdarh E. Lungdar VC in pawi ti

East Lungdar Village Council/Court chuan Mizoram sawrkarin tunhnaia Block Agriculture Office E. Lungdar-a a dah chungchangah thudik tawklo leh thu belhchian dawllo vawrhdarh a ni chu pawi an tih thu an sawi.
Thuchhuah an siamah East Lungdar VC chuan East Lungdar-ah hian kum 1962 atang daih tawhin Agriculture Department a lo awm tawh thu leh Circle hmun niin ram tha tak leh zau tak neiin thawktu Agriculture Extension Officer (AEO) leh Staff engemawzah an lo awm tawh thin tih an sawi a. Tun thlengin Agriculture Department hian E. Lungdar-ah hian Office building, Staff Quarters, Godown leh a dangte la nei rengin E. Lungdar RD Block huamchhungah Agriculture Circle awmchhun a nih thu an sawi a. January 18, 1974-ah E. Lungdar khua chu RD Block Headquarters ni tura hawn niin tun thlengin a la nih thu leh hun lo kal zelah tunhmaa sawrkarin Agriculture-ah Circle, SDAO, SMS anga a lo function tir thin leh tunhnaia Agriculture SDAO hmuna a lo puan thar te chu Mizoram Agriculture Service Association ten Service Rules siamtha tura sawrkara an thlen angin sawrkarin siamtha (re-structuring) vekin SDAO, Circle, SMS post zawng zawng te chu nuai bo vek niin Block Headquarters awmna hmunah Block Agriculture Office chu function vek tawh turin Cabinet Meeting chuan thutlukna a siam ta tih an tarlang a ni.

An thuchhuah chuan Mizoram sawrkar Cabinet Meeting thutlukna January 12, 2021-a tihchhuah anga Mizoram sawrkar in Notification a tihchhuah ah Block Agriculture Officer (BAO) chu E.Lungdar khuaa awm tura chiang taka ziah a nih thu pawh tarlangin, “Mizoram sawrkarin Gazette a tihchhuah ah Block Agriculture Officer awmna tur hian E. Lungdar khua lo khawdang hming RD Block huamchhung ah ziahlan a awm lo. Tichuan, Mizoram sawrkar in Gazette chhuah anga order chhuah hmasak berah Pu T. Lalhmingmawia SDAO Zawlnuam chu E. Lungdar khuaa Block Agriculture Officer tura tih a ni,” an ti bawk.

E. Lungdar khuaa Block Agriculture Office a dah chungchang ah thudik tawklo leh thubelhchian dawllo vawrhdarh a ni chu pawi an ti takzet tih an thuchhuah aah chuan tarlangin, “Thudik tawklo tanchhana N. Vanlaiphai khua ten E. Lungdar khuaa Block Agriculture Office dah min chuhpui tlat hi pawi kan tiin NGO Coordination Committee hminga tidanglam leh tura diklo taka sawrkar an nawr hi hriatthiam har kan ti hle. E. Lungdar Block Agriculture Office hi function thuai turin sorkar kan ngen a. Function tir lova a awm reng a nih chuan a tul dan ang zelin E. Lungdar khawtlangin hma kan la zel dawn,” an ti bawk.

Comments

Popular News (Last 30 Days)

Serchhip DCSO sawn a ni