Sawrkar laipui atanga sum dawn leh State Treasury sum pekchhuah ang zelin In sak tanpuina sem a ni

Rural Development Minister Lalruatkima'n PMAY (Gramin) hnuaia In sak tanpuina First Installment dawng tawhte chu sawrkar laipui atanga sum dawn mil leh State Treasury-in sum a pekchhuah ang zela pek chhunzawm an nih tur thu Assembly House a hrilh.

Assembly Budget Session neih mekah nimin khan Thorang bialtu MLA Zodintluanga zawhna a chhanna ah RD Minister chuan PMAY (Urban) chu UD&PA Department hnuaiah kalpui niin PMAY (Gramin) chu RD Department-in a kalpui tih a sawi a, PMAY (Gramin) hnuaia Insak tanpuina dawngtute chu mi pakhat zelah Rs. 1,30,000/- zel pek tur a ni tih a sawi a, an sum dawn tur hi thawh 4-a pek tur a nih thu leh za zela 30 in tum thum leh a tawp berah zaa 10 pek tur an ni tih sawiin, sum pekchhuah inkar chu a changkhat deuh thin avangin tanpuina dawngtuten harsatna an tawk thin niin a sawi a, an harsatna sukiang turin Sawrkar chuan theihtawp a chhuah tih a sawi bawk.

Minister chuan, kum 2017-2018-a Mizoram sawrkar ngen angin kum 2019 February thla khan PMAY (Gramin) dawngtu tur tihfel a ni a, a dawngtu tur mi 20,512 zingah First Installment dawng tawh 14,862; Second Installment dawng tawh mi 7,966; Third Installment dawng tawh mi 6,493 leh dawn tur zawng zawng dawng tawh mi 6,069 an awm a tih a sawi a, heng bakah hian la dawng miah lo mi 5,650 an awm thu pawh sawiin, tuna dawn dan hi In satute tan a buaithlak hle a, Mizoram sawrkar-in theihtawp chhuahin a bawhzui tih a sawi bawk.

RD Minister Lalruatkima chuan, Hnam tlem zawk chenna, Minority area-a cheng zinga Insak tanpuina dawngtu zingah Aadhaar Card leh Bank Account inmil loh avanga harsatna an tawh mek chu BDO te ngun taka lo en tha tura tih an ni tih sawiin, Insak tanpuina chu a dawngtu tur ten an dawn ngei theih nan ruahmanna siam a nih thu a sawi a. Aadhaar leh Account inthlunzawm fu tawk lo te pawh inzawm tha leh vek turin thawktute pawh hrilh an ni a, theihtawp chhuaha hmalak zel a nih tur thu a sawi. Minister chuan, Insak tanpuina dawng zinga sum thawh khatna dawng tawh te chu Central atanga sum dawn mil leh State Treasury-in sum a pekchhuah ang zela pek chhunzawm a nih tur thu a sawi bawk.