Sports Minister leh DC&MA Minister insawifiah phut

ZPM Party chuan Sports Minister leh District Council & Minority Affair (DC&MA) changtu Minister te chu insawifiah tura an phut thu an sawi.

Nimin-a Aizawl Press Club-a thuthar thehdarhtute an kawmna ah ZPM hruaitute chuan tun thla ni 13 khan Tourism Dept hnuaia hnathawh ‘Component 1 of Development of Immediately Required Infrastructure for Tourist Development at Reiek tlang’ chu a hmunah kala an enfiah thu sawiin, he hna atana estimate chu cheng nuai 560 a nih thu leh Restricted Tender hmangin DJ Consultancy Services, Peter Street, Sikulpuikawn chu pek an nih thu an sawi a. July 30, 2020 ah hna thawk tanin thla 18 chhunga zo tura tih chu an zawh hman loh avangin thla 13 chhung hun pek belh lehin chu pawh chu an la zo thei chuang lo niin an sawi a. He hna hi Works Components 12-ah then a nih thu leh Sanction Amount leh hnathawhte a inmil lo hle ah ngaih thu an sawi a ni.

He hna hi DJ Consultancy Services hminga hmuh ni mah se a hmuna kal-a an zawh chuan hnathawktute leh viltute hi NECS hnuaia thawk vek an ni tih pawh ZPM hruaitute chuan sawiin, “He hna hi a inziak danah DJ Consultancy Services hming ni mah se, a tak takah chuan Minister fapa Consultancy Firm NECS thawh ngei a ni tih a lang chiang hle a. A Department chan hnuaia hna hrang hrang te pawh hi duhsak taka Restricted Tender hmanga pek vek niin, heng hna thawktu hrang hrang Consultancy Firm te hi a kawr mai niin a phenah hian Minister hi a biru ngeiah kan ngai a ni,” an ti a. “Hetiang mai maia hna thawh an chin avangin PMJVK hnuaia hna ngawt pawh vbc. 107 zet Utilization Certificate (UC) an pek theih loh vangin, sum lo kal leh zel tur pawh central sawrkarin min block ta vek a ni,” an ti bawk.

ZPM hruaitute chuan NECS hi District Council & Minority Affair (DC&MA) chuan duhsakna uchuak, ‘Single Source Selection’ hmangin Memorandum of Understanding a ziahpui thu leh hei hi Mizoram Public Procurement Act leh Rules hnuaiah hman pawh a la nih ngai loh thu sawiin, Minister Robert Romawia Royte hian Assembly House-ah ngei NECS hi a fapa ta a nih thu a sawi thu leh District Council & Minority Affair (DC&MA) changtu Minister nena an inlaichin dan pawh tlang hriat a nih thu an sawi a. “ZPM Party chuan Minister Pu Robert Romawia Royte hi insawifiah tur leh a insawifiah thei lo a nih chuan Moral Responsibility laa bang ngam turin kan phut a ni,” an ti a. District Council & Minority Affair (DC&MA) Minister R. Lalzirliana pawh he hna Special taka an inpek dan sawifiah tura an phut thu an sawi bawk a ni.