PHE in Tui sem hna rualkhai takin kalpui mek tih sawi

PHE Department Serchhip-a hotute chuan Tuikum lui atanga Tui pump chhuah theih zat a tlem avangin rualkhai taka Tui sem hna kalpui mek a nih thu sawiin, Tui harsatna hi ziaawm thuai tura an ngaih thu an sawi.
PHE Serchhip a thawktute hnen atanga LENKAWL in thu a dawn danin tunhnai khan Serchhip chawmna atana Tuikum lui tui an lak mekah Tui pump khawl thenkhat ah harsatna a awm avangin mipuite hnena Tui sem hi a khaihlak deuh a, heng khawl chhia te hi siamthat a nih hnuah Tuikum lui atanga Tui an pump chhuahna, VT Pump chu chirh in a hnawh thin avangin Tui hi pump hleih theih a ni lo leh a, heng chirh te hi nimin leh niminpiah khan a thawktute chuan hlawhfa rawih belhin then hna an thawk leh a, Tui ala tam avang leh Tui ala vawh bawk si avangin chak takin hna hi thawh theih a ni lo a. Heng harsatna hrang hrang awm te sutkian tum hian theihtawp an chhuah thu pawh sawiin, hun reilote ah dan pangngaia Tui sem hna hi kalpui leh theih an beisei thu an sawi a ni.

Hetianga Tui harsatna a awm avang hian Veng hrang hrangah rualkhai taka Tui sem hna hi kalpui mek a ni a, amaherawh chu Tui an pekchhuah hi a dawng thei tura ngaih zat in an dawn kim theih thin loh avangin Tui semna bial tinah Survey neih nawn leh an tum thu an sawi bawk a. Tui Connection pakhat chu chhungkaw mal rin tur anih thu leh lo inrintawm thin an awm avangin Tui sem tur hi an daih loh phah thin tih an sawi bawk.