Serchhip District-ah mihring-a sumdawnna kaihhnawih thubuai ziahluh a la awm lo

Serchhip District Superintendent of Police Stephen Lalrinawma chuan Serchhip District-ah mihring a sumdawnna kaihhnawih (Human Trafficking) thubuai ziahluh a la awm lo tih sawiin, Mizoram pumah kum 2000 hnu lamah thubuai 35 ziahluh a nih tawh thu a sawi.

National Commission for Women, New Delhi bultuma Mizoram State Commission for Women, Serchhip SP Office leh Anti-Human Trafficking Unit te buatsaih 'Capacity Building and Training for Anti-Human Trafficking and Rehabilitation of Victims of Trafficking' nimin a Serchhip SP Conference Hall-a neih a hmanpuina ah he thu hi sawiin Serchhip SP Stephen Lalrinawma chuan Serchhip District chhungah mihring a sumdawnna kaihhnawih thubuai ziahluh a la awm loh lai hian Mizoram pumah erawh thubuai 35 lai ziahluh a awm tawh thu leh a hmasa ber chu kum 2000 khan ziahluh a nih thu a sawi a. Nikum (2022) thleng khan hetiang kaihhnawih thubuai hi Mizoram-ah 35 ziahluh a nih tawh thu sawiin, heng kaihhnawih ah hian mi 64 man an nih tawh thu a sawi a, an zinga 47 te chu Mizo niin midang 17 te chu hnamdang an nih thu a sawi a. Mihring-a sumdawnna kaihhnawih thubuai ah hian a tuartu (victims) mi 95 awmin an zinga 62 te chu puitling niin midang 33 te chu naupang an nih thu a sawi bawk.


Serchhip SP chuan mihring a sumdawnna chu thil tha nen inhnaih tak a nih avangin a chhuina leh invenna kawngah pawh harsatna a awm thu sawiin, ngaih pawimawh a tul thu leh Serchhip District-ah pawh hetiang kaihhnawih thubuai hi ziahluh la awm lo mah se engtik-a lo thleng tur nge hriat lawk a nih loh avang leh kan him zel dawn em tih hriat a nih loh avangin inthlahdah theih a nih loh thu a sawi bawk.

Mihring-a sumdawnna chu in sal behna a nih avangin a rapthlak tih SP chuan sawiin, hetiang kaihhnawih thubuai ah hian hnathawk tura intirhchhuah chu a tam thu pawh leh kan thalai te ramdang ah hna thawka an chhuak chu sum hmuhna a nih avanga a that rualin a kawng a dik a tul thu a sawi a. India ram atang chuan dan ang ramdang-a hna thawk tura intirhchhuah dawnin a hautak thu te, buaipui ngai a tam avangin mi tam tak ten documents diklo hmanga ramdang ah an tirh thin thu te a sawi a. Heng mite hian harsatna an tawh palh hlauh chuan inbuaipui zui a harsat thin avangin fimkhur a tul thu te, Labour Law that lohna ramah chuan hna thawk tura kal loh a him thu leh mahni documents dik tak hmang ngeia kal a pawimawh tih kan hriat a tul thu a sawi bawk.


He Training hawnna hun hi Serchhip SDPO Kaste Romalsawma chuan kaihruaiin Human Trafficking chungchang sawizauna a nei a, Serchhip District Court-a Judicial Magistrate First Class (JMFC) Josangzeli Tlau, District Child Protection Office Lalsiampuii leh Serchhip SP Office RO Branch atangin SI John Malsawmtluanga ten thupui thlanchhuah hrang hrang hmangin kalkhawm te hi zirtirna an pe a. Sawihona hun te hman a nih hnuah tlai lamah Course Coordinator Insp. H. Biakchhuma kaih-hruaiin a kharna neih a ni a, Serchhip Addl. SP Saidingliana Sailo chuan a hmanpui bawk.

He huna tarlan a nih danin kum 2000 khan Mizoram-ah Human Trafficking thubuai pakhat ziahluh niin 2001-ah 2; 2002-ah 1; 2004-ah 4; 2005-ah 4; 2008, 2009 leh 2010-ah pakhat theuh, 2011-ah 3; 2012-ah 1; 2016-ah 3; 2017-ah 2; 2018-ah 2; 2019-ah 7 leh 2022-ah 2 ziahluh a ni a. Kum 2019 khan Human Trafficking tuartu mi 54 zet chhinchhiah niin an zinga mi 24 hi kum tlinglo an ni bawk.

Comments

Popular News (Last 30 Days)

Serchhip DCSO sawn a ni