Chief Minister Office inrelbawlna hautak tih sawi

 PC Party President Vanlalruata chuan Chief Minister Office (CMO) inrelbawlna hautak lutuk chu veiawm a tih thu sawiin, Minister 11 dang te inenkawlna aiin a hautak zawk niin a sawi.

Nimin-a PC Party OB Meeting neih ah an President Vanlalruata chuan Minister dang 11 enkawlna aiin Chief Minister enkawlna hi a hautak zawk tih sawiin, “Council of Ministers Budget hi a pumpuiin Budget tharah hian cheng nuai 713.18 a ni a; Hemi atan hian 2021-22 khan cheng nuai 603.91 hman a ni. Kum kal lai 2022-23 budget-ah hian cheng nuai 702.34 ruahman anih laiin cheng nuai 754.04 hman tur anga pawisa dil belh a ni,” a ti a. “He Council of Minister budget-a 55.14%, cheng nuai 393.25 hi Minister 11 enkawlna tur a ni a. A bâk 44.85%, cheng nuai 319.93 hi Chief Minister enkawlna tur a ni thung a. Hetianga CM enkawlna hautak em em chhan hi Chief Minister's Office tia kan sawi thin, Chief Minister's Secretariat hranpa, ropui tak mai Zarkawt-a kan neih vang a ni a. Hemi enkawl nan hian 2021-22 khan cheng nuai 255.94 hman a ni a. Kum kallai 2022-23 hian a tirah cheng nuai 250.23 hman tura chhut niin cheng nuai 273.23 hman leh zawk tura ruahman nawn a ni a. Budget tharah hian cheng nuai 274.39 hman tura ruahman a ni,” a ti bawk.