Air India in Lengpui Airport-a service an titawp dawn

Air India chu TATA in an lak hnuah Air India chuan March 18, 2023 atangin Lengpui Airport-a an flight neih te an titawp dawn a, tun dinhmun ah Lengpui Airport-a Flight awm te chu Air India, Indigo leh Alliance Air te an ni.

Lengpui Airport-a Flight an tihtawp tur thu hi February ni 18, 2023 khan Arun Bardoloi, Station Manager, Air India, Aizawl chuan Lengpui Airport thuneitute a hriattir a. Aviation Wing hotute sawi danin, Air India in flight an tihtawp chhan chu TATA in Air India an takeover tak vang a ni niin, “Air India thlaktu tur kan ngaihtuah a, kan dawr kual mek, mipui tan harsatna a awm lo turah kan ngai, hma kan la mek,” tiin Aviation Wing hotute chuan an sawi a ni.

TATA in Air India an takeover vangin Business Module an Reshuffle a, chu chu thil hriat sa a nih thu Aviation Wing hotute chuan sawi bawkin, “Nikum lam atanga Winter Schedule a kal laklawh tawh avangin anni tan Schedule hmang zo lo a in withdraw chu dan a ni lo a, Schedule a zawh hnuah chauh an in withdraw thei, Winter Schedule nei sa lo ila chuan TATA in an takeover tirah an in withdraw ang,” an ti bawk.

Aviation Wing hotute sawi danin, Air India in an flight titawp dawn mahse, a thlaktu tur zawn mek a ni a, Air India a tawp hnu hian Alliance Air leh Indigo Service a la awm dawn a. Lengpui Airport a Flight ngah ber chu Indigo niin 80% vel Flight an nei a, Air India leh Alliance Air te flight neih zat a intluk thuak a, Air India in an ngah hret zawk a ni.