North Vanlaiphai khua atanga BAO Office sawnchhuah duhloh lantirin kawng zawh a ni
North Vanlaiphai Joint Action Committee bultuma he kawngzawh hi Vai Veng Kawn atanga tanin JAC Fin. Secretary H. Lalruatthanga chuan N. Vanlaiphai chu tunhma atanga Mizoram khaw pawimawh a nih zia te, Tuichangral-ah chuan Agriculture hmunhma neih tha ber khua a nih thu te sawiin, Mizoram sawrkârin N. Vanlaiphai atanga BAO Office sawnchhuah a nih avânga lungawi lohnaah hian lungrual taka ke pên zel a nih tur thu a sawi a. Heta tang hian mipuite chuan kawng zawhin Bangla Vêng Kawn; Gate Kawn, Rahsi Veng leh Venglai Kawn-ah te hun an hman hnuah Sanpoh Kawn-ah kawngzawh kharna hun hman a ni a. Hetah hian JAC Chairman Laltlanmawia kaihhruaia inkhawm neiin North Vanlaiphai VCP Laltanpuia chuan North Vanlaiphai chu Hrangturzo Constituency-a khaw lian ber a nih thu te, tuna an khaw dinhmun en in hmasawnna tur a awm thu leh N. Vanlaiphai atanga BAO Office sawn tur chu hi dahlet a nih loh chuan MNF VC an nihna atanga an bân tur thu a sawi a. North Vanlaiphai din thar leh tur leh lungrual taka ke pen zel turin a mipuite a sawm bawk.
He kawngzawh a tel te hian Resolution pathum pass in North Vanlaiphai khuaa hun engemaw chen funtion tawh BAO Office sawnchhuah a ni chu an khaw mipui ten hriatthiam har an tih thu leh North Vanlaiphai khaw mipui zahlohna ah an ngaih thu te; An Village Council-a Rulling Party VC Member-te leh North Vanlaiphai khuaa Rulling Party hruaitu zawng zawng ten Party-a an nihna bansan huama Mizoram sawrkar an karna chu an thlawp tlat thu leh an nihna bansan a lo tul ta a nih pawhin North Vanlaiphai mipui ten an thlahthlam ngai loh tur thu sawiin, North Vanlaiphai khua atanga Block Agriculture Office sawn chhuahna Order chu rang taka sut leh turin Mizoram sawrkar an ngen a. “Kan ngenna hi a hlawhtlin theihna turin theihtawp chhuahin hma kan la zui zel dawn a ni. Hma kan lakna ah hian North Vanlaiphai mipuite hi kan lungrual tlat dawn a ni,” an ti bawk.
He hunah hian Mizoram sawrkar in North Vanlaiphai atanga BAO Office a sawnchhuahna Order chu hal niin mipui thahnem tak an tel a, kawng zawh a nih chhung hian North Vanlaiphai khaw chhunga sawrkar Office zawng zawng leh Dawr zawng zawng pawh khar a ni bawk.
Comments
Post a Comment