Mizo thalai tam zawk Sipai-a an luh theih nan MJA leh Assam Rifles in hmalak ho an tum
Serchhip-a rawn awm thar 42 Battalion Assam Rifles hian nimin khan Adjutant Capt. Pradeep Singh leh 2IC Col. JS. Sodhi hovin MJA Serchhip District Member te hi Serchhip-a an Battalion Hqrs. ah kawmin Assam Rifles leh khawtual mi ten thawhhona tha an neih theih dan tur hrang hrang an sawiho a, he hunah hian MJA hruaitute chuan Mizo thalai zingah Sipai tang duh tam tak an awm thu leh Online-a Application thehlut tura harsatna an neih te sawiin, kan hma lawka Sipai lak runpui Aizawl-a neih leh turah Mizo thalai sipai a tang duh te tan MJA Serchhip te nen tangrual in Online-a Application Form fill-up duhte tan Serchhip Press Club-ah hun buatsaih nise an ti a, he hunah hian Online-a Application Form thehlut duhte tan document pawinawh thiltel ngaite kengin Serchhip Press Club-ah Assam Rifles aiawh ten a tul ang te an buaipui anga, a hun atan thla thar March 1 khi ruahman a ni a. Assam Rifles hotute chuan Online Application thehluh sak mai bakah thalaite an thil tumah hlawhtlinna an chan ngei theina turin Physical Training bakah a tam zawkin an paltlang theih loh Personal Interview neih dan thlenga zirtirna an pek tur thu an sawi a ni.
Assam Rifles atanga Scheme tha tak tak awm te mipuiin an hmelhriat theih nan chanchinbu mite nen thawhhona tha neih a tul thu pawh he hunah hian sawiho niin, Vantlang tana hmalakna pawh a theih anga an kalpui thu leh an hnathawhna kawngah kalphung tha zawk a awm theih nan thurawn pe thin tur leh engtiklai pawha an inhawn reng thu Assam Rifles hotute chuan an sawi a. Tunhnai ah Serchhip District Boxing Association nen tangkawpin Boxing Championship an lo buatsaih tawh bakah Govt. Serchhip College NCC te nen thawhhona an nei bawk a, nakum lamah Football Tournament liantham tak buatsaih an tum thu an sawi bawk a ni.
Serchhip a hmunpui nei 42 Battalion Assam Rifles te hi August 1, 2004 khan din niin kum kalta December thla khan Manipur atangin Serchhip-ah hian an rawn insawn a. Mizoram leh Myanmar inrina ah ramri ven hna thawkin km 180-a thui ramri ven hna an thawk mek a. Ramri hnaih khaw hrang hrangah Duty Post neiin ramri ven hna leh ramri kaltlanga dan lova bungraw lakluh te ven hna an thawk mek bawk a ni.
Comments
Post a Comment