JJM hnuaia Solar Pump siamte a taka hman hunah ni khat-ah tui litre mtd. 10.2 pek theih dawn

PHE Department changtu Deputy Chief Minister Tawnluia'n mipuiten tuithianghlim in tur an neih vek theih nana Sawrkar laipuiin a ruahman, JJM hnuaia Solar Pump siamte a taka hman a nih hunah ni khatah tui thianghlim Litre Maktaduai 10.2 pek theih a ni dawn tih House a hrilh.

Nimin-a Assembly Budget Session-a Lunglei North bialtu MLA, Dr. Vanlaltanpuia zawhna leh zawhbelhna dangte a chhanaah Deputy Chief Minister Tawnluia chuan, Jal Jeevan Mission (JJM) hi kum 2024-a zawh hman vek tur a ni tih a sawi a. He Project hi a tawp hnuah pawh tui lama hmalakna chhunzawm a nih theih nan AMRUT-II hnuaiah ruahmanna siam niin, sum dil mek a nih thu a sawi a, hei hi Ministry lamin eng angin nge a dawnsawn dawn tih hriat ni lo mahse, an pawm ngei beisei a nih thu a sawi a ni.

Zawhna dang a chhannah Tawnluia chuan, JJM hian thingtlang khaw tin a huam a, he Scheme kengkawhtu an ni hi an lawm hle tih sawiin, nuam pawh an ti hle a. Department chhungah pawh hna puitling taka thawk turin an in hrilh niin a sawi a. JJM hmanga tuithianghlim pekna ah sawrkar laipuiin hman a remtih angin khaw thenkhatah Rubber Pipe, PVC pipe hman a nih thu a sawi a, PVC pipe hi tui lakna atan ni lo, a semchhuahna atan chauh hman a ni tih sawiin, a derthawng zawnga sawi tawh loh a duh thu a sawi bawk.

Deputy Chief Minister chuan Mizoram pumah JJM Scheme hi khua 263 (Har Ghar Jal) Village-ah thawh zawh tawh a ni tih pawh sawiin, khaw 465 hmabak la awmin December 2023-ah thawh zawh beisei a nih thu a sawi a. JJM Scheme kaltlangin Mizoram thingtlang tui lakna harsa bik khaw 11-ah Solar Pump hmanga tui pek tawh a nih thu leh Mizoram-ah Solar Pump atangin khaw 175-ah Tui pe tura hmalak mek a nih thu a sawi bawk.

Hei bakah hian Lunglei Greater Water Supply Scheme Phase-II atan ruahmanna a awm thu leh Phase-II ang ni lovin ‘Augmentation & Renovation of Greater Lunglei Water Supply Scheme’ angin ruahmanna siam a nih thu a sawi a. Preliminary DPR pawh peihfel ni tawhin Concept Paper pawh sawrkar ah thehluh thar leh a nih tawh thu a sawi bawk.