Hna thawhna atana Aizrport Passenger Trolley hmangtute hrem an ni dawn tih sawi

MNF Party chuan hnathawhna atana Lengpui Airport-a Passenger trolley hmangtute chu hrem an ni dawn niin an sawi.

Nimin-a thuchhuah an siamah MNF Party chuan Lengpui Airport-a passenger trolley engemaw zat hnathawh nan hman a nih chungchang chu Mizoram Assembly House-ah hial auchhuahpui a nih thu leh politics inbeihna a lo chhuak chu pawi an tih thu an sawi a. GAD (Aviation) chuan February 13, 2023 khan hnathawh nan Trolley hmangtute hrem an nih tur thu leh February 14, 2023 khan Office Order (thupek) thar a tihchhuah thu an tarlang bawk. MNF thuchhuah chuan October 20, 2022 khan Principal Consultant, GAD (Aviation) hovin Lengpui Airport-a passenger trolley indaihlohna sawiin Meeting neih a nih tawh thu leh sawrkar-ah trolley 100 lei belh dilin November 10, 2022 khan Finance Department chuan rem tiin, hun a duh rei loh zawk nan Restricted Tender hmangin February 17, 2023 thleng hawngin Quotation chhuah a nih thu leh Supplier thlanfel a ni tih an tarlang a. Supply Order issue atanga a rei lo berah ni 30 velah trolley chu hmuh beisei a nih thu leh hemi hma hian Baggage Trolley repair-na tur spare part pawh Delhi-ah chah niin Feb. 13 leh 14 khan repair zawhfel nghal a nih thu tarlangin, tun dinhmunah baggage trolley hman theih zat chu 74 a nih thu an tarlang bawk.

MNF thuchhuah chuan February 13, 2023 khan GAD (Aviation) chuan Office Order tichhuakin hnathawh nana baggage trolley hman a khap nghal thu leh an tihchhiat man hu chawi turin a hriattir nghal tih an tarlang a. February 14, 2023 khan trolley hman dan tur Order khauh tak a tichhuak bawk niin an tarlang a ni.