Mau sawngbawl tur a tam tawk loh avangin Bamboo Industry te hna thawk thei lovin an chawl

Chief Minister Zoramthanga'n Mau sawngbawltur duhthusam a tam hmuh tur a awm loh avangin Mizoram-ah Bamboo Industry a kal hlei thei lo nia sawiin, Mizoram Venus Bamboo Products Pvt. Ltd. pawh hnathawh tur nei lovin a chawl niin a sawi.

Nimin-a Mizoram Legislative Assembly Budget Session-a Aizawl South-II bialtu MLA Lalchhuanthanga zawhna kal zela Aizawl North-II bialtu MLA, Dr. Vanlalthlana'n Mizoram Venus Bamboo Products Pvt. Ltd. chungchang a zawhna, Commerce and Industries Minister in a chhanna chu Chief Minister hian a sawifiah a. Mizoram Venus Bamboo Products Pvt. Ltd. chu a bultantu an nih thu leh sawrkar leh a enkawltute lamin beiseina sang tak nei-a an din ni mah se, thil tihfuh chiah loh an nei tih a sawi a ni.Chief Minisster chuan an sawngbawl ber tur Rua leh Mau chu Mizoram-ah tam viau mah se, a tira an rin ang aiin an chawlut tha hlei thei lo tih a sawi a, hei hi a chhan ber chu a phurhchhuahna tur kawng a awm mumal loh vang a nih bakah Mizoram-a Mau awm te chu a tha lutuk lo a, a pum lian tha te chu hmun kilkhawr lehzual, kawr kilah te a awm avangin lakchhuah a harsa a, lakchhuahna man a to lutuk bawk avangin an duh anga tam Rua leh Mau sawngbawl tur an hmuh thei lova, tuna an kal ang ni lo, kawng danga an kal a nih loh chuan tih ngaihna a awm loh avangin kha tihlaia khawl nei tha tak Mizoram Venus Bamboo Products Pvt. Ltd. chu a ding ta thup mai niin a sawi.

Nimin-a thutkhawm ah hian LAD Minister K. Lalrinliana chuan sawrkar laipui Scheme, Rashtriya Gram Swaraj Abhiyan (RGSA) hnuaiah VC House 150 sak a ni tawh thu Member te zawhna chhanga sawiin, RGSA hnuaiah hian VC House 98 thawmthat a nih tawh bakah VC House thar 23 sak a ni leh dawn tih a sawi a. VC 243 hnenah Computer set khat theuh pek a nih tawh thu leh Common Service Centre 20 pek a nih tawh bawk thu a sawi a. RGSA chuan Village Council-te theihna tipung tura training pek bakah tangkai taka mipui rawng an bawl theih nana anmahni tihchakna tur Scheme siamtu ber, VC kaltlanga hmalakna tur a nih thu a sawi bawk.