Sports Minister in thu dik a sawi zawk - Speaker

Assembly Session neih meka Sports Minister Robert Romawia Royte leh ZPM Member Lalduhoma ten thu inchuh an neih chungchang ah Speaker Lalrinliana Sailo chuan Assembly Official te hmuh danin, Sports Minister Robert Romawia Royte-in thudik a sawi zawk tih a puang.

Nimin-a Assembly Budget Session zawhna leh chhanna hun zawh hnuah, niminpiah-a Serchhip bialtu MLA Lalduhoma leh Sports Minister te inhnialna chungchanga Assembly Secretary lamin hma an lak dan Speaker in a sawi a, House chhung chauh an thlir thu sawi bawkin, “Ni 10.2.2023-a Proceeding a alan dan leh Officer te hmuh danin Pu Robert Romawia Royte hian thudik a sawi zawk a ni,” a ti.

Hemi hnu hian ngaihdam dilna thu sawiin Lalduhoma chuan, Miriam Lalnunsiami damloh chungchang leh inkhulchhuah dawn a an buai zia te, a thiante zarah a inkhulchhuah tak dan te House-ah a lo sawi chhuak tawh tih sawiin, “Zan lamah Social Media-ah inhnialna a chhuak a, chumi leng vel leh House chhunga kan thusawi te kan lo ngaihfin palh a, hre reng chunga tilui ka ni lo a, ka hriatsual palh liau liau a nih avangin kan Minister zahawm tak chungah ngaihdam ka dil a, nangmah (Speaker) leh Member zahawm tak takte leh mipuite ngaihdamna pawh tih takzetin ka dil a ni,” a ti a. “Nimin ah kan Minister zahawm takin Miriam-i nen kan inbe lo tih uar takin a sawi a, mahse Social Media lamah an inbiak zia te a lo lang nasa a, a hriat sual palh ah ngaihsak i la, ngaidam ve tho i la ka duh,” ti bawkin, “Mihring famkim lo kan ni a, tun kan Session-ah hian kan thu khel a nawi mah mah a, mipuite pawh an zahawm a, he Chapter hi titawpin, inngaidam tawh ang u,” a ti bawk.