Chin National Day vawi 75-na CM in a hmanpui

Chin National Day vawi 75-na pualin nizan hmasa khan Aizawl Vanapa Hall-ah inkhawm neih niin he hun hi Chief Minister Zoramthanga chuan a hmanpui a ni.

Chief Minister chuan Chin National Day kum 75-na lai a thleng chu lawmawm a tih thu sawiin, Ramchhung buai avanga Myanmar ram-a Chin unau chengte'n mahni sahimna zawnga an ram an tlansan a ngai chu pawi a tih pui thu leh an lo luh tirh kha COVID-19 hripui len nasat zual lai nen a in nang chu vanduaithlak a tih chu a sawi a. An tan Mizoram chhunga chengte chuan theihtawp an chhuah thu leh Myanmar rama remna leh muanna a awm leh ngei an beisei pui thu a sawi bawk. Chief Minister Zoramthanga chuan harsatna te hi Pathian remruat vek a nih avangin tunah chuan hrethiam rihlo mah ila beiseina nen hmalam hun thlir phawt a tul chang a awm thu a sawi a, Zohnahthlak te kan inpumkhatna leh inunauna chu chhawmnun zel pawimawh a tih thu a sawi bawk.

He hunah hian Former Chin State Chief Minister Salai Lian Luai leh Former Chin State MP Dr. Naih Tam Maung te hnen atangin thusawi ngaihthlak ni bawkin, Mizoram sawrkar leh mipuiin raltlante an lo tuamhlawma an lo puihna zawng zawngah lawmthu an sawi a. YMA, MZP, MSU, ZORO leh Manipur Kuki Inpui aiawhin thusawi ngaihthlak a ni bawk.