Valentine's Day pualin Serchhip-ah thisen pek pawimawh zia inzirtirna neih a ni

Nimin February 14, 2023 khan Valentine's Day 2023 denchhenin Serchhip DIET-ah thisen pek pawimawhna inzirtirna hun hmangin damlo a mamawhte tan a thlawna thisen pekna hun buatsaih a ni bawk.
Association for Voluntary Blood Donation (AVBD) Serchhip Branch leh District Hospital Serchhip Blood Bank buatsaihValentine's Day puala hun hman hi Serchhip District Medical Superintendent Dr. ZD. Lalmuanawma chuan khuallian nia hmanpuiin thisen hi a aiawh thei thildang a awm loh avangin kan mihring pui damlo te tana kan pek theih hlu ber chu thisen a nih thu a sawi a, hetianga pawimawh a nih avang hian thisen pek hi kan Society-ah kan uar zel a tul thu sawiin, chutih laiin Thisen thianghlim midangte pek tlak kan neih reng theih nan HIV leh natna dang laka him turin kan nun fimkhur a ngai tih a sawi bawk. Serchhip DMS chuan HIV leh AIDS chungchang ah Serchhip District dinhmun sawiin, January 2022 atanga December 2022 chhungin ICTC Serchhip-ah mi 2131 te thisen endik zingah HIV hrik pai mi 57 hmuh an nih thu leh Naupai 665 thisen endik zingah HIV hrik pai mi 6 hmuh an ni tih a sawi a, hei vang hian mitin kan fimkhur angai hle tih sawiin, midangte tana thisen pe thei turin zirlaite chu an nun fimkhur turin a chah bawk a ni.

AVBD Serchhip Branch Secretary Hmingthansiama kaihhruai he hunah hian AVBD Serchhip Branch Vice President Zonunsanga Kawlni chuan Mizoram leh Serchhip-a Valentine's Day denchhena thisen pek kalpui tan a nih dan te, AVBD leh an hnathawh tlangpui te, thisen pek tulna te a sawi a. Tun dinhmunah Serchhip District hian thla khat ah thisen Unit 80 vel bawr a mamawh thu sawiin, heng te hi mi tlawmngai te atang lo chuan hmuh theih a nih loh avangin tlawmngaia thisen pek kan uar zel a tul thu a sawi a. Mi tlawmngai te avangin Serchhip District chu a thlawna thisen pe tam pawl a nih thu a sawi bawk. He hunah hian Serchhip DIET atangin John Zorammawia chuan thu a sawi a, Serchhip Blood Bank Officer Dr. Lalnunhlima chuan thisen pe tura ruihhlo leh HIV laka fimkhur a pawimawh dan hrang hrangte a lem nen a entir bawk.

Hemi hnu hian a thlawna thisen pekna hun buatsaih zui niin Mipa 5 leh Hmeichhia 6, an vaiin mi 11 ten thisen an pe a, heng thisen petute hnenah hian Valentine's Day pualin thilpek hlan theuh an ni bawk.