Bussiness 20 Meeting inbuatsaihna thlirho

Aizawl khawpui in thla thar March 2-a G20 intawhkhawmna chi khat, ‘Bussiness 20 Meeting’ a thlen tur atana inbuatsaihna kal mek chu nimin khan G20 Core Committee Chairman leh Home Commissioner H. Lalengmawia hovin Secretariat Conference Hall-ah thlirho a ni.

He thlirhona hunah hian Sub-Committee 9-te hmalakna leh ruahmanna, hmachhawp leh hmabak te bakah harsatna an neih te sawiho a ni a. Aizawl khawpui chhunga hrui inzam hnawk te senghawi leh tawn fel hna P&E Department ruahmanna hnuaia kalpui mek chu tun thla ni 24 aia tlai lovah a tlangpui zawhfel beisei a ni a. Sub-Committee on Beautification, Cleanliness and Hoarding/Banner chuan Lengpui atanga Aizawl kawng dungte tifaiin bawlhhlawh leh hnawmhnawk te senghawi leh paih dan an ruahman mek a, hemi bakah hian khawpui hmun hrang hranga a theih ang anga tihfai leh tihhnum dan tur an ruahman mek bawk. Hemi atan hian Local Council te thawhpuia sawmin Vawiin leh tun thla ni 28-ah Hnatlangpui neih tura ruahman a ni bawk.