Thla 10 chhunga chhiah hmuh vbc. 828.47 tling

Mizoram sawrkar-a Taxation Department chuan kum kal mek, April - January (thla 10) chhungin Chhiah chi hrang hrang Rs. 8,28,47,00,349 an hmu tawh a, hei hi 2022-23 a Chhiah hmuh beisei zat (revised estimate) cheng vbc. 900 atangin zaa 92.05 a tling.

    Taxation Department tarlan danin, Chhiah chi li, GST, Profession Tax, Sales Tax leh Entertainment Tax lak thin a ni a, kumin thla 10 chhungin GST-ah Rs. 7,06,53,25,068, Profession Tax-ah Rs. 13,53,97,097, Sales Tax-ah Rs. 1,08,36,29,615, Entertainment Tax-ah Rs. 1,16,876 leh Chhiah dang atangin Rs. 2,31,693 an hmu tawh a. Kum 2022-23 chhunga sawrkar in target a tuk chu cheng vbc. 730 niin cheng vbc. 900-ah tihsan a ni a, hei hi kumin hian an khum ngei beisei niin thla 10 chhung hian Chhiah Rs. 8,28,47,00,349 an hmu tawh a, kum kal mek chhung a an hmuh tam ber thla January, 2023-ah cheng vbc. 110.99 an hmu a ni. Nikum khan Chhiah an hmuh tura bituk hi vbc. 177.71 in an lo khum tawh a ni.