Kalphung thar zawm ve rel

Serchhip District Sports Committee hnuaia Sports Association hrang hrangte chuan Mizo-ram Sawrkar in District Sports Committee te kalphung tura a duan chu zawm ve nise an ti.

Serchhip District Sports Committee hian Inrinni khan Serchhip-a SIRD Auditorium-ah Special General Body Meeting an nei a, he hunah hian SDSC hnuaia Recognised Association 19 zingah 17 ten aiawh tirin SDSC Special General Body Meeting-in Resolution a lo siam tawh, sawrkar in District Sports Committee hruaitu chungchang chu sawiho leh a ni a. Sports Association hrang hrang aiawhte hian an Association ngaihdan te an sawiho hnuah sawrkar in ruangam thar a lo siam tawh chu SDSC Special General Body Meeting in an duh loh thu lo sawi tawh mah se sawrkar in Gazette-ah a chhuah tawh avang leh an sum hmuh thin te an hmuh theih tak loh avangin infiammite hmakhua ngaihna avangin, sawrkar in kalphung thar a duan chu loh theihloh-a an zawm a ngai ta nia an ngaih thu an sawi a. Hei vang hian kalphung thar tur ang hian kal a ni dawn ta a ni.

Tarlan tawh angin District Sports Committee hruaitu turte hi Sports Association tin aiawh kalkhawm ten an thlang thin a, amaherawh chu sawrkar in kalphung ti danglamin District Bawrhsap te kaihhruaina hnuaiah kalpui a ni tawh dawn a, Member Secretary-ah District Sports & Youth Officer awmin hruaitu zingah hian thlan turte erawh an la awm dawn a, Member zingah sawrkar Department thenkhat aiawh leh ruatchhuah te pawh an awm dawn a ni.

He ruahmanna hi District thenkhat chuan an duhloh thu an lo sawi tawh hlawm a, amah-erawh chu District thenkhat ah chuan kalphung thar ang hian hruaitu inthlan a ni tawh thung a ni.