Raltlan ten theihtawp-a lo enkawl tum a ni

Home Minister Lalchamliana’n thenawm ram atanga sahimna zawnga Mizoram-a rawn raltlante sawrkarin theihtawpa lo enkawl a tum thu sawiin, sawrkar pachhe tak an nih avangin tih theih erawh a tam lo hle niin a sawi.

Zirtawpni kaltaa Assembly Session-a Private Member’s Resolution sawihona ah he thu hi sawiin Home Minister chuan, mahni In leh lo tlansana hmun danga kal a ngai hi raltlante an khawngaihthlak em em a; Mizo mipui, Kohhran, NGO leh zirlai pawl bakah mi hrang hrangin nasa takin raltlante an tanpui a. Vawiin thlengin an chenna te pawh duhthusam ni lo mah se an ei in an la in ve zel thei a, a lawmawm hle a ni, a ti. 

Home Minister chuan Mizoram-a District 11-ah raltlan an awm kim vek tih pawh sawiin, sawrkar chhinchhiah dan chuan an vaiin mi 31,050 an ni a, Relief Camp 162 siam a ni a; Relief Camp-a awm lo, In luah leh chhungte In-a awm an awm bawk a. ID Card te pawh siam sak an ni, a ti a. Raltlan zinga naupangten sikul an kal dan tur te ngaihtuah a nih thu leh zirlaibu te thlengin sawrkarin a ruahman sak thu te, Mizoram sawrkar chuan raltlante hi cheng nuai 384 velin a tanpui tawh thu te sawiin, Resolution-a ‘An awmkhawmna hmun bik buatsaih ni rawh se’ tih erawh chuan sawrkar mawhphurhna a pek len lutuk a hlauh thu leh zawh loh nghawngkawl a bahtir a hlauhthawn thu a sawi a. ‘A tul ang zela lo tuamhlawm chhunzawmin an mamawhte ngaihtuah zel ni se kan ti’ tia dah chu a him tawk viaua a ngaih thu leh hetianga tih a nih chuan ani pawhin a pawm thu a sawi a ni.

Comments

Popular News (Last 30 Days)

Vawiin-ah HSSLC Exam result