Dragon Fruit chingtute intawhkhawmna neih a ni

Serchhip District chhunga Dragon Fruit chingtute intawhkhawmna leh Dragon Fruit chin dan zirhona chu nimin khan Serchhip-ah neih a ni.

Horticulture Department bultuma Dragon Fruit chingtute intawhkhawmna DHO Office Conference Hall, Serchhip-a neih hi Serchhip District Horticulture Officer R. Lalrintluanga chuan kaihruaiin Mizoram Dragon Fruit Farmer Association (MIDFA) President Vanlalnuntluanga Renthlei chuan Mizoram a Dragon Fruit chingtu ten an thlai rah tharchhuah mumal taka a tihralna an hriat theih nan a huho a hmalak a pawimawh thu leh Serchhip-a Dragon Fruit chingtuten an thlairah tharchhuah te mumal taka an hralh theih nan an pawl-a inziaklut turin a sawm a, pawl anga an thlai rah tharchhuah tiralna kawng dap turin Statistic vawnthat a pawimawh thu a sawi bawk.

He hunah hian Serchhip atangin Dragon Fruit chingtu mi 10, Thenzawl atangin 17, Hmuntha atangin mi 16 leh Khawlailung atangin mi 10, an vaiin mi 54 an tel a. District Horticulture Consultant K. Lianhmingthanga chuan Dragon Fruit chin dan ah zirtirna a pe a. Hemi hnu hian Serchhip District Dragon Fruit Farmers Association hruaitu tur thlanna an nei nghal a. President-ah MJ. Zakunga (Serchhip); Vice President-ah Thangbuaia (Khawlailung); Secretary-ah Zothansanga Hauhnar (Serchhip); Asst. Secretary-ah K. Vanlalhruaia (Hmuntha); Treasurer-ah Roliana Hnamte (Thenzawl) leh Fin. Secretary-ah Lalthanchuanga (Thenzawl) te thlan an ni. He hun hman zawh a nih hnu hian Serchhip DHO R. Lalrintluanga hovin Mizo-ram Dragon Fruit Farmers Association hruaitute hian Serchhip leh a chhehvela Dragon Fruit chinna hmun te an tlawh nghal bawk.