Mizoram sawrkar in Dan hnuaia Grape Wine zawrh a phal hnuah Serchhip District-a phalna a pek te chuan Grape atang siam Wine an zuarchhuak tan ta.
Serchhip District-ah hian Grape Wine zawrh phalna hi Sawrkar chuan mi 5 hnenah pein, an zinga mi 4 hi Serchhip khawchhung an nih bakah pakhat hi Thenzawl a hmu a ni thung a. Tunhnai khan heng Grape Wine zawrh phalna hmutute hian Champhai Grape Growers Society in phalna neia an siam Champwine te chu Serchhip-ah chah thlengin, dan phalna hnuaiah an zuarchhuak tan a. Grape Wine zawrhna hi Thenzawl bakah Serchhip Sailiam, Serchhip Bazar, New Serchhip Bazar leh Khawtetlang-ah te pakhat theuh a awm a ni.
Champhai Grape Growers Society in an siamchhuah Champwine hi a bottle puitling (750 ml) chu Rs. 300/- a hralh tur niin bottle te (375 ml) chu Rs. 150/- a hralh tur a ni thung a. Tun dinhmunah Serchhip-a Grape Wine zawrh phalna neitute chuan Champwine chauh la neiin Hnahlan Grape Grower & Processing Co-op Society Ltd. hnuaia Hnahlan Winery siam-chhuah Isabella Red Wine chu an la chah thleng thei lova, thla thar lamh chah thlen hman an in beisei thu an sawi a. Isabella hi Champwine ai hian a man a sang dawn a, a um puitling hi Rs. 500/- man bawr vel anih an rin thu an sawi bawk.
Serchhip-a Excise & Narcotics Department chuan dan hnuaiah Grape Wine chu zawrh a nih thu leh kumtlinglo hnena hralh phal a nih loh thu an sawi a, Sawrkar atanga zawrh phalna neilo te tan Grape Wine lo zawrh ve chu dan kalh a nih sawiin, Grape Wine rui sual te chu MLP Act hnuaiah hrem theih an nih thu leh a Zurui Case nen danglamna a awm loh thu an sawi bawk.
Comments
Post a Comment