Congress Party in Poster tar hnatlang an nei

Congress Party chuan nimin khan Mizoram pumah MNF sawrkar duh lohna leh Zoram Chhanchhuahna Poster tar hnatlang neiin Serchhip-ah pawh Poster thahnem tak tar a ni.
He hnatlang hi Serchhip-ah chuan T. Rosiama In (Venglai)-ah bul tanin inkhawm an nei hmasa a, hemi hnu hian Serchhip Bazar Tual-ah chhuakkhawmin Aizawl atanga he hun hmanpui tura rawn kal MPCC hruaitute chuan sawrkar dinglai MNF kaihhruaiin mipui beisei a phak loh dan te an sawi a. Lengpui Airport a khualzin te bungraw nawrna tur Trolly chu Lengpui chei hna Kamrula te thawh mekah Brick leh thildang nawr nana an hman chhiat thu leh hei hi Congress thalai ten a hmuna kala an finfiah thu te sawiin, a thar thlak tura an phutna avangin tunah chuan hman tlak dah a nih tawh thu te an sawi bawk a ni. Hemi hnu hian Serchhip Block huamchhung Serchhip Veng hrang hrangah sawrkar dinglai duhkhawplohna leh thuziak hrang hrang an tar a ni.

He hnatlang pui puala Inkhawm Aizawl-a neih ah chuan MPCC Vice President Lal Thanzara chuan, “MNF sawrkarin SEDP nuai 3 semin chak takin sawrkar an kalpui kan lo beisei a. Mahse, kum 4 kan thlir hnuah thil awmdan hi a beidawn thlak takzet a ni tih Mizoram mipuiin kan lo hre ta. Chuvangin, Mizoram pumah Poster tar hnatlang kan nei ta hial a ni,” a ti.