Govt. Serchhip College-a Women's Hostel Higher & Technical Education Minister in a hawng
Govt. Serchhip College-a Women's Hostel hawnna puala inkhawm tawi College Seminar Hall-a neih ah Dr. R. Lalthangliana chuan Serchhip chu Mizoram laili a awm, Chhim leh hmar, chhak leh thlang inkalpawhna kawngpui in a paltlang a nih avanga a chengte an vannei thu sawiin, hei hian hmasawnna tam tak a la keng dawn tih a sawi a, College chungchang ah pawh duhsak tlak a nih thu sawiin, Govt. Serchhip College anga Campus nei zau hi Mizoram-ah an awm loh thu leh zirna atan pawh hmun tha bik a nih thu a sawi a. He College in NAAC Accreditation-a Grade A a hmu chuan College dang tan chona siamin tunah chuan Mizoram hmun hrang hranga College te pawhin hetiang Grade hmu thei tura tan an lak thu leh Serchhip College pawhin a aia tha zawk, A+ Grade hmu thei tura tan la zel turin a chah a. Chutihrual chuan College in Grade tha tak a hmu te, result tha tak an neih te chu duhtawk tur a ni lo tih sawiin, zirlai te chhawr tlak ni tura zirna pe turin a chah bawk. H&TE Minister chuan sawrkar in building a sak tam tak hman theihloha a awm thu pawh sawiin, hetianga hmalakna kalpui a nih dawn hian a building sak chauh ni lo thil tam tak a kentel te ngaihtuah tel thin a tul thu a sawi bawk.
He hun kaihruaitu Govt. Serchhip College Principal K. Laldinpuii chuan he Women's Hostel sakna sum hmuh a nih theihna tura hma lak saktu Dr. R. Lalthangliana chungah lawmthu sawiin, chumi rual chuan zirlai ten luah an duh tawh si avanga a chhung cheibawlna tur sum petu bialtu MLA Lalduhoma chungah lawmthu a sawi a. Hei bakah hian College a thawktu ten bungrua chi hrang hrang an thawhkhawm thu sawiin, tunah hian building tihchangtlunna atana mamawh hrang hrang an la neih te a sawi bawk.
Nimin-a Govt. Serchhip College-a Women's Hostel hawnna hunah hian Serchhip District Bawrhsap Nazuk Kumar IAS leh Higher & Technical Education Department atangin NEP State Nodal Officer Prof. Benjamin Lalrinsanga te pawhin thu an sawi bawk a ni.
Comments
Post a Comment