Latest News

MKHC in mipui bumna ang thil tiam lo turin Mizoram-a Political Party te an ngen

Mizoram Kohhran Hruaitute Committee (MKHC) in Mizoram in inthlanpui a hmachhawn turah Political Party te chu a taka tih theih loh tur zuara mipui bumna ang thil tiam lo turin a ngen.

Mizoram in kumin-a Inthlanpui a hmachhawn tur puala thuchah an tihchhuah-ah MKHC hian Mizoram in hruaitu tha an neih theih nan Candidate siam chungchangah Political Party hruaitu zawng zawng te fimkhur leh uluk taka ngaihtuahna seng turin an sawm a, Candidate atan Pathian tih mi, mi hming tha leh rinawm, Ruihtheih thila fihlim, Hlepna bawlhhlawh leh thamna duh lo, Mipat hmeichhiatna kawnga hming hliauna nei lo leh Mahni awmna Kohhran, Sakhua leh Pawl-a mi rinawm thlang turin an ngen a ni.

Inthlanna thianghlim leh felfai a awm a, mipuiten zalen taka an duh zawng an thlan theih nan hel pawl rawih emaw, invau leh ralthuam lam chi emaw hmang lo tur te, vote nei zawng zawng chu vote thlak vek tur te, Sawrkar siamtu chu eng pawl pawh ni se, Pathian ruat an ni tih hria a, sawiselna tur ringawt ngaihtuah lova ram leh hnam tan dik taka hna an thawh theih nana tawiawm tur leh ram hruaitu tur mi tha an thlanchhuah theih nan leh muanawm taka inthlan a nih theih nan Pathian hnenah tawngtai-a tan la turin an ngen bawk.

Heng an ngenna hi Kohhran mipui leh Political Party zawng zawngin ngaipawimawha zawm vek turin MKHC chuan a ngen a ni.

Comments

Popular News (Last 30 Days)