Aizawl Bazarpui Building sak chungchang sawifiah

Commerce & Industries Minister Dr. R. Lalthangliana'n Aizawl Bazarpui Building sak zawh har a nih chhan chu Geo Technical Investagion leh AMC-a thil tihfel ngai a tam bakah COVID-19 hri leng vang a nih thu House a hrilh.

Nimin-a Assembly inkhawm ah Aizawl South-II bialtu MLA Lalchhuanthanga zawhna leh zawhbelhna dangte a chhanna ah Commerce & Industries Minister hian, Aizawl Bazarpui building hmasa kha a hlauhawm tawh avangin thiah a ni tih a sawi a, Bazarpui thiah tur chungchang hi helai hmuna inzuar Association hruaitute nen an sawi a, Bazar Building thar sak zawh a nih hunah an luah leh theih beisei a nih avangin Building hi thiah an remti tlang niin a sawi.

Dr. R. Lalthangliana chuan, tunhmaa Foreign Lane tia hriat thin hmuna Aizawl City Market Annexe sakna tura sum ruahman chu cheng nuai 3641.59 a nih thu leh hnathawktu tur pawh kum 2008 khan Restricted Tender hmanga thlanfel tawh a nih thu a sawi a, inremna an ziah atanga thla khat chhunga hna tan tur a tih a ni a, kum 3 chhunga sa zo hman tura ngaih niin, hna an tan dawnin thil tihfel ngai a tam hle a, Geo Technical Investigation bakah AMC lamah tihfel ngai engemawzat a awm thu a sawi. Building an thiah hma kum 2019 Krismas dawnah helaiah hmuna inzuar thin ten khawngaih dila Krismas chhung inzawrh phal sak tura an ngen avangin inzawrh tir leh an nih thu pawh Minister chuan sawiin, hemi hnua thil tihfel ngai te tih fel a nih meuh chuan kum khat dawn a lo ral hman a, kum 2020-ah COVID-19 hri a len chhunzawm bawk avangin hna hi an zo har ta niin a sawi a. Hna zo thuai turin thawktute pawh hrilh an nih thu leh hma pawh an chak taka an lak thu sawiin, tun dinhmunah zaa 50 aia tlem lo zawh a ni tawh tih a sawi bawk.

Aizawl Bazarpui Building hlui thiah taka Aizawl City Center sak tur chu Smart City Project sum cheng nuai 4,200 senga sak tur a ni tih Dr. R. Lalthangliana chuan a sawi a, building sak dan tur pawh an uluk hle a, hna zawh a nih hunah Bazar chhunga dawr nei thin mi 1103 te chu dah luh theih vek an ni dawn a, sawrkarin sum tam tak a hmu thei dawn bawk niin a sawi.