IT Skill Development & Training Centre 7 din tum

Mizoram sawrkarin IT Skill Development & Training Centre pasarih (7) din a tum tih Information & Communication Technology (ICT) Minister Robert Romawia Royte chuan Assembly House a hrilh.

Nimin-a Assembly Session-ah zawhna chhangin ICT Minister chuan IT Skill Deeloment & Training Centre hi Block hrang hrang - Chawngte, Lawngtlai, Bungtlang South, Zawlnuam, West Phaileng, Lungsen leh West Bunghmun-ah te bun tum a nih thu a sawi a. Heng Centre tinah hian Computer Set kim 50 theuh dah tum a ni a; Zirtirtu leh Zirlaiten Information Technology (IT) zirna kawnga nasa zawka hma an sawn theih nan tangkai taka an hman a beiseiawm, a ti a. NIELIT nen tangdun tura hma lak a ni a; hmun kilkhawr zawka awmte pawhin anmahni kawt-chhuah ngeia I&CT Training Centre an nei tur hian zirna mai bakah khawtlang hmasawnna hrang hrang atan leh eizawnna kawng thlengin mipui nawlpui tan a tangkai dawn a ni, a ti.

I&CT Department-ah hian a ngheta thawk mi 32 leh a nghet lova thawk mi 7 an awm thu leh District Office din belh tumna a awm loh thu Minister hian a sawi a. State Budget pangngai ni lo, ICT Department-in kum 2021-22 leh 2022-23 chhungin sawrkar laipui atangin hmasawnna hna thawhna tur cheng nuai 7,561.85 dawn a nih thu a sawi a. Heng sum atang hian cheng nuai 7,250 chu State Budget pawn atanga hmuh ni mah se Finance Department kaltlanga hna thawh tur a nih avangin State Budget-ah khung a nih thu a sawi bawk.