Rubber Board hotu ten CM leh CS an kawm

Rubber Board of India Executive Director Dr. KN. Raghavan leh a thawhpuite chuan nimin zing khan Chief Minister Zoramthanga chu kawmin Mizoram-a Rubber chin kalpui mek chungchang an sawipui.

Chief Minister Pisa-a an inkawmna ah hian Chief Minister chuan Rubber Board hmalakna chu lawmawm a tih thu leh Economy tihhmasawnna atan thil tha tak, Mizoram leh hmarchhak State dangte pawhin an thatpui phah ngei a beisei thu a sawi a. Transportation cost tihhniam nana Link Road siam chungchanga mamawhna an thlen chu thil pawimawh tak a nih thu leh a remchan dan ang zela theihtawp a chhuahpui tur thu a hrilh a ni.

He hunah hian Dr. KN. Raghavan chuan Mizoram-a Rubber chin hmalakna chungchang Chief Minister hi sawipuiin, State sawrkarin a tawiawm tawhna zawng zawngah lawmthu a sawi a. India hmarchhak State in potential a neih that avanga ngawrh taka Rubber chin ah hmalak a nih mek dan te sawiin, hmarchhak bial-ah kum nga chhunga hectare nuai hnih a zau Rubber hmun siam tumna a awm thu leh Mizoram pawh a huam tel thu a hrilh a. Kumin chhung hian Mizoram-ah hectare 1600 a zau a Rubber phun tum a nih thu leh a tiak hi a thlawn vek a sem a nih dan te, awlsam zawk nan nursery siam tum a nih thu te a sawi bawk.

Rubber Board hotute hian Chief Secretary Dr. Renu Sharma pawh nimin khan kawmin Rubber chin chungchanga an hmalakna te an sawipui a, Chief Secretary chuan Mizoram-ah Thelret hmun siam leh tharchhuah hi loneituten an la hmelhriat lutuk loh avang leh mi tam tak tan thil thar a nih avangin inhrilhhriatna leh inzirtirna neih tul a tih thu a sawi a. Rubber hian puitling turin kum engemawzat a duh avangin thlai leh thei dangte nen a chin pawlh dan ngaihtuah chu thil finthlak nia a ngaih thu a sawi bawk a ni.

Comments

Popular News (Last 30 Days)

Serchhip DCSO sawn a ni

Bawngchawm tlang khualbuk rawktu nia hriat mi 2 man