COVID-19 hri leng sawi nep chi a ni lo - Chief Minister

Chief Minister Zoramthanga'n COVID-19 hri leng vanga harsatna thleng chu Sawrkar dang Minister ten mahni intihhlum phahna atan hial an hman a nih avangin sawi nep chi a ni lo tih a sawi.

Sawrkar kumthar-a Mizoram budget a tlangpuia sawihona nimin-a a khaikhawmna ah Finance changtu nibawk Zoramthanga chuan, eptu member thenkhatin COVID-19 hri leng chu chhuanlam tur a nih lohn thu an sawi chu thil an hriat chian tawk loh vang a nih thu a sawi a. Mi ram Finance Minister-te chuan COVID-19 hri leng vanga harsatna chu mahni intihhlum phah nan an hman hial avangin COVID-19 hri lengin harsatna a thlen chu sawi nep chi a ni lo a, ram hausa leh changkang zawkte pawhin an manganpui a nih avangin engmah ni lo anga sawi tum chu a ni lo tih a sawi bawk.

Zoramthanga chuan COVID-19 hri leng vanga Mizoram Sawrkar sum hloh chu a nep lo hle tih sawiin, Central atanga sum hmuh tur an hmuh kim loh ringawt pawh State rethei Mizoram ang tan chuan retheihpui tham a ni a, hetiang a ni mek chung hian Vawk pul hri an tuar a, Vawk pul hri vanga Sawrkar sum hloh ringawt pawh kha a nasa, lir a lo nghing nen Sawrkar-in harsatna chi hrang hrang a tawk chungin tun dinhmun an thleng thei chu a lawmawm zawk hial tih a sawi bawk.

Opposition Group Leader Lalduhoma chuan ram pumah thil man tona a tlahniam zel a, ram pumah Infation Rate chu zaa 4 a nih laiin Mizoram chu zaa 8.41 a la ni a, thil man to chhanah Ukriane Indona puh a ni te chu thil awm lo tak a ni tih sawiin, Mizoram sum leh pai harsatna namen lo a thlen mek chu a manganthlak hle a ni, a ti a. Tar pension pek theih a ni lo te, Contract Bill an ba nsa lutuk te, pension sum pek theih a ni lo te, Health Care Bill ta a tam lutuk chu chinfel a, harsatna sukiang tura Sawrkar-in theihtawp a chhuah a tul tih a sawi.

Congress Group Leader Zodintluanga Ralte pawhin, Sawrkar kumthar atana Mizoram Budget pharh tak chu Budget awmze nei lo niin a sawi a. MNF kaihhruaina hnuaiah kum 4 chhung mipui chanpual tel lo, Sawrkar hnathawk hlawh tur ringawt Budget sawiho a ni tawh ni-a sawiin, thil nih phung tur a ni lo a, Minister te zingah ngei ngei pawh lungawi lo an awm nual niin a sawi. Zodintluanga chuan SEDP chu mirethei leh harsa zawkte khaichhuahna tura duan ni-a a lan loh thu sawiin, vote zawnna liau liau niin a sawi a, mipui hmangaihna tel lova kalpui a nih avangin a hlawhtlin a rin loh thu a sawi bawk.

A tlangpuia Budget sawi hona hi Ningani atang khan tan niin, nimin-ah chhunzawma zawhfel a ni a. Vawiin atang hian Minister hrang hrangte demand sawihona neih tan a ni dawn a ni.

Comments

Popular News (Last 30 Days)

Serchhip DCSO sawn a ni