YMA in a zawnin kum 4 chhungin In 4 sak sak

Keitum Branch YMA ten an huamchhung a chhungkaw pakhat chenna In an sak sak chu nimin khan luah theih tura peihfel a ni.
Keitum Branch YMA hruaitute hnen atanga thu kan dawn danin In an sak sak hi Lalhmunsiama te chhungkua niin amah hi khua hmu thei lo a ni a, a nupui leh a fate pahnih nen an khawsa a, hun engemaw chen an unau te nen an khawsak ho hnuah In hrang changa mi In luahin chenna tur an neih mumal loh avangin Keitum Branch YMA te hian In hi an sak sak a, Assam Type hmangin a dung ft. 24 leh a vang ft. 15-a zau in an sak sak a ni. In sakna atana hman tur thingzai hi Branch YMA leh Section-a Executive Committee ten thawhin a bang tur Tile hi Keitum VC ten an tum sak bawk a, Kohhran leh NGO dang ten sum leh pai thawh bawkin a bak zawng tul dang chu Branch YMA in an tum a ni.


Keitum Branch YMA hruaitute chuan In sa tur hian ni 4 chhung hnatlang an neih thu leh nimin khan luah theih tura peihfel a nih thu sawiin, Electric Wiring pawh tih nghal niin Connection pawh tihfel nghal a ni a, amaherawh chu nimin lamah thlunfel hman a nih loh avangin Vawiin lam hian In neitute hian an luahluh theih an beisei thu an sawi bawk a ni. Keitum Branch YMA te hian kum 2020, 2021 leh 2022-ah te khan an huamchhunga chhungkaw harsa te tan In an lo sak sak tawh bawk a ni.

Comments

Popular News (Last 30 Days)

Vawiin-ah HSSLC Exam result