Speaker remtihna-in thudik haichhuak tura House rorelna enlet tura tih a ni

Mizo hmeichhe Footballer pakhat hliam inenkawlna sum pek chungchang ah Sports Minister leh ZPM Group Leader-te thu a inhmuh loh avangin nimin khan Assembly House-ah an inhnial buai nual a, Speaker remtihna-in thudik haichhuak tura House rorelna enlet tura tih a ni.

Nimin-a Assembly Budget Session-ah Mamit bialtu MLA H. Lalzirliana zawhna leh zawhbelhna dangte a chhannah Sports Minister Robert Romawia Royte hian, National Games neih tuma Mizo hmeichhe Footballer Miriam Lalnunsiami a inhliam chungchangah a inenkawlna senso atan tanpuina pe lo anga sawichhuah a ni chu tha lo a tih thu a sawi a, infiammite tanpuina pek chungchangah hian kalphung fel tak a awm a, MFA dilpuina in nikum December ni 15 khan Rs. 25,000/- tanpuina hi pek a ni a, Sawrkar-in tanpuina pe lo anga sawi chu hriatsual palh a nih a rin thu Sports Minister hian a sawi a. Mizoram Olympic Association pawhin Rs. 10,000/- a pe a, a mamawh zawng zawng phuhru lo mah se, tanpuiuna hi pek ngei a ni tih a sawi a ni.

Serchhip bialtu MLA, ZPM Group Leader nibawk Lalduhoma chuan, Miriam-i Bill hi pe vek angin Sports Minister-in a sawi niin a sawi ve thung a, a kanna hi a tirah Rs. 10,000/- Olympic atanga pek a ni a, a hnuah MFA in Rs. 25,000/- an khawnkhawm an pe leh a, hemi bak a inenkawlna senso Rs. 40,000/- chuang chu a thianten an thawhkhawm a, mimal pakhat account atangin thun sak a ni a, Sawrkar tum anga sawi talh tur a ni lo a ti ve thung a. Sports Minister chuan, Miriam-i inenkawlna a pek thu a sawi anga Lalduhoma'n a sawi chu thu dik lo a ni tih sawiin, Member pahnihte hi an ngaihdan a in-an theih loh avangin Speaker, Lalrinlaian Sailo a lo inrawlh a, Member pahnihte thu inchuh chu thudik hre tura House rorel enlet remtih a ni a, a dik lo zawk chu House-ah ngaihdam dil tura tih an ni.