PTS-ah kum 4 chhungin mi 1677 te an training tawh

Serchhip District chhunga awm Thenzawl a Police Training Centre-ah kum 4 chhungin mi 1677 te an training tawh a, tunah hian mi 271 an Training mek bawk a ni.
Mizoram-ah hian kum 1973 atang khan Police Training hi kalpui niin a tirah Police Training Centre, Lungverh-ah Training hi neih thin a ni a, kum 2020 atang khan Thenzawl-a Police Training School-ah hian Training hi neih ni ve thungin tun thleng hian Police mi 17,249 an training tawh a. Kum 2020-a PTS Thenzawl-a Training kalpui a nih hnu hian tuna Training mek mi 271 tiamin mi 1677 an training tawh bawk a, heng te hi Batch 22-ah Course hrang hranga training te an ni.

PTS Thenzawl-a Police Training mek te hi 69th Batch, Recruit Constable Basic Training mi 261 leh 4th Batch Head Constable (Operator) Basic Traning mi 10, an vaiin mi 271 an ni a, mipa 162 leh hmeichhia 109 niin training hi kumin January ni 11 khan tanin chawlhkar 45, thla 9 chhung training an nei ang. Tun tuma Police training te hi Police, an service laia boral ta chhungte Compasonate ground-a sawrkarin a lak te an ni.