Serchhip-ah State Day lawmna neih a ni

Mizoram in State a hmuh champha, Mizoram State Day vawi 36-na chu nimin khan District khawpui dangte rualin Serchhip-ah pawh a lawmna neih a ni.
Mizoram State Day lawmna Serchhip DC Conference Hall-a neih ah hian Khuallian Serchhip District Bawrhsap Nazuk Kumar IAS chuan Mizoram in State a nih theihna tura sul lo sutu hruaitu hmasate hrerengin kawng tinreng ah mitin thleng phak hmasawnna a lo awm zel theih nan thukhat vua-a thawkho zel turin he huna kalkhawmte chu a sawm a. “He ram mawi tak leh a chhunga cheng hnamte ziarang, Culture, rimawi leh pipute thil hlui duhawm tak tak te hi vawng nung zel ang u,” a ti bawk.

Serchhip-a Mizoram State Day lawmna hun hi Serchhip DIPRO leh I&PR Department Deputy Director K. Saitluanga chuan kaihruaiin Mizoram in State nihna a hmuh thlenga a lo inrel-bawl tawhna chanchin tlangpui a sawi bakah President of India leh Prime Minister of India ten Mizoram mipuite hnena State Day puala tweeter-a thu an ziak te a chhiar bawk a ni.

Mizoram State Day lawmna Serchhip a neih ah hian Head of Offices te, tlawmngai pawl hrang hrang YMA, MUP leh MHIP aiawh te, Joint VC aiawhte, chanchinbumite leh sawm bik mi pawimawhte an tel a ni.